EPU 6

Kahurura kutja ongwaye tji mo lese etjangwa

Johanes 10:33-36

OUSUPI: O lese etjangwa uriri nokukayenda komurungu okuhungirira kepu rarwe. Ovapuratene voye mave sokumuna nawa kutja etjangwa ndi wa zu nokulesa mari hitasana nomapu ngu mo hungirire ko.

OMUANO WOKUTJITA NAO:

Toorora omambo omananḓengu. Tji wa zu nokulesa etjangwa, ṋunisa omambo ngu maye hitasana nawa nepu roye. Mo yenene okutjita nao mokutamuna rukwao omambo ngo, poo okupura epuriro ndi mari tjiti kutja ovapuratene voye ve mune omambo ngu mo hungirire ko.

Indu tji mo ungurisa omambo warwe okukahurura epu retjangwa, kondja kutja ovapuratene voye ve mune nawa kutja omambo nge ri mOmbeibela maye hitasana nepu ndi mo hungirire ko.
Ṋunisa epu ndi mo vanga kutja ovapuratene voye ve zemburuke. Indu tji mo kahurura kutja ongwaye tji mo lese etjangwa ndo, kahurura kutja omambo metjangwa ndo maye hitasana vi nepu ndo.

Ombeibela yoye ngai kare kamwaha tji mo hungirire ketjangwa ndo. Otjiṋa hi tji vatera ovapuratene voye okumuna kutja omambo ngu mo hungire maye hitasana netjangwa ndi wa zu nokulesa.
Tamuna omambo omaṱiṱi uriri. O hungirire komapu nge hi notjiṋa nepu ndi mo vanga okuṋunisa. Okuisira ku imbi ovapuratene voye mbi mave tjiwa rukuru ohunga nepu ndo, toorora kutja omapu yeṋe omananḓengu ngu mo hungirire ko, kokutja ve zuve nawa nokuyeṱakamisa.