Kayende komurungu okurikotamena ku Jehova oviungura vyetu tji vya tjaerwa

1-2. (a) Ongwaye tji twa ha sokutemisiwa indu omerikotameneno wetu tji ya tjaerwa? (b) Morupa ndwi matu ka hungirira ku tjike?

MOMBURA ndji 2018, ovazuvarise vombuze ombwa vokombanda 223,000 aave kara momahi oviungura vyetu mu vya tjaererwe poo tjiva ombya vi yandjerwa uriri. Tjiri ihi katjikumise. Otja tji twe rihongo morupa ndwa kapita, Ovakriste vatjiri ve undjira ko okutatumisiwa. (2 Tim. 3:12) Kainatja kutja tu kara pi, ozohoromende mape ya aze tjaere omerikotameneno wetu ku Jehova Mukuru worusuvero.

² Indu ohoromende tji ya tye kutja mai tjaere omerikotameneno wetu ku Jehova, ove mo yenene okuripura omapuriro nga: ‘Hapo ondatumisire i heya kutja Mukuru ke nohange na eṱe? Hapo omatjaerero maye tjiti kutja atu ha karere Jehova rukwao? Me sokutjindira kehi rarwe oviungura vyetu ku vya ha tjaerwa?’ Matu kahungirira komapuriro nga morupa ndwi. Nu wina matu katara komuano mbu matu yenene okurikotamena ku Jehova nokutja ozombate zeṋe nḓu matu sokunakaura.

HAPO ONDATUMISIRE I HEYA KUTJA MUKURU KE NOHANGE NA EṰE?

3. Otja 2 Ovakorinte 11:23-27, ondatumisire iṋe omuapostele Paulus ndja muna, nu matu rihongere ko tjike kotjihorera tje?

³ Indu ohoromende tja tjaere omerikotameneno wetu, eṱe mape ya atu utu okumunu kutja katu nozondaya za Mukuru. Posiya zemburuka kutja, ondatumisire kai he kutja Jehova ke nohange na eṱe. Otjotjihorera, ngatu tare komuapostele Paulus. Mukuru tjiri wa ri nonyuṋe mu ye. Eye wa ri nondjingonekero yokutjanga otutuu 14 twOmatjangwa wOtjigrike, nu wa ri omuapostele woviwaṋa. Posiya eye wa munine ondatumisire onḓeu. (Lesa 2 Ovakorinte 11:23-27.) Otjihorera tjomuapostele Paulus matji tu hongo kutja Jehova u yandjera ovakarere ve ovaṱakame okutatumisiwa.

4. Ongwaye eṱe tji twa tondwa i youye?

⁴ Jesus wa kahurura kutja ongwaye tji tu sokuundjira ko omapirukiro. Eye wa tja matu tondwa mena rokutja kaweṱe owouye mbwi. (Joh. 15:18, 19) Indu tji matu tatumisiwa ihi katji hee kutja katu nondaya ya Jehova, posiya tji raisa kutja matu tjiti imbi mbi ri ovisemba!   

HAPO OMATJAERERO YE TJITA KUTJA ATU HA KARERE JEHOVA RUKWAO?

5. Hapo ovandu ve nomasa okuyandisa omerikotameneno wetu ku Jehova? Kahurura.

⁵ Ovetupirukire kamaave yenene okuyandisa omerikotameneno wetu ku Jehova Mukuru oparukaze. Ovengi va rora nu kave toṋene. Ngatu tare kutja pa tjitwa tjike mOvita vyOuye Ovitjavari. Moruvezo ndo ozohoromende momahi omengi aaze tatumisa ovakarere va Mukuru. Otjiungura tjOvahongonone va Jehova tja tjaererwe kotjira hi oNazi moGermany na wina kozohoromende moAustralia, Canada nomahi warwe. Ngatu tare kutja pa kayenda tjike. Mombura ndji 1939 ovita tji vya uta, pa ri novazuvarise 72 475 mouye auhe. Pa raisiwa kutja mombura ndji 1945 indu ovita tji vya yanda, otjivarero tjovazuvarise tja rira 156 299. Otjivarero tjovazuvarise tja yerurukira ko!

6. Ovikwaye oviwa mbi mape ya avi tjitwa indu tji tu ri kehi yondatumisire? Yandja otjihorera.

⁶ Ondatumisire i tu vatere kutja tu karere Jehova nomasa nokutja atu ha tira okumukarera. Otjotjihorera, ovakupasane mbaa ri nokanatje va turire mehi ohoromende mu ya tya okutjaera omerikotameno wetu. Pendje nokutira okuungurira Jehova, ovakupasena mba va uta oukandjira woruveze aruhe. Omukazendu wa isa oviungura vye oviwa mbya vi mu sutu nawa kutja ma yenene okutjita nao. Omurumendu wa tja omatjaerero nga ya tjita kutja ovandu ovengi ve ute okukara nomapuriro omengi ohunga nOvahongonone va Jehova. Mena ranao ya ri oupupu ku ye okuuta okuhonga ovandu Ombeibela. Nu wina omatjaerero nga ya eta otjiṋa tjarwe otjiwa. Omunene wombongo mehi ndo wa tja ovandu ovengi mba isa okukarera Jehova va uta okuya kozombongarero zombongo nokuzuvarisa rukwao.

7. (a) Matu rihongere ko tjike ku Levitikus 26:36, 37? (b) Matu tjiti vi indu omerikotameneno wetu tji ya tjaerwa?

⁷ Indu ovanavita na eṱe tji mave tjaere omerikatameno wetu owo ve vanga kutja tu tire okukarera Jehova. Owo wina ve handjaura ovizeze ohunga na eṱe nokuhinda ouṋepo wohoromende okuhita mozondjuwo zetu, okututwara kotjombanguriro poo nandarire okutwara tjiva konḓorongo. Mena rokutja va yenena okutwamo otjivarero otjiṱiṱi tjovakambure ovakwetu monḓorongo owo ve vanga kutja tu kare nemuma. Indu tji twe ve yandjere okututirisa eṱe mape ya atu “isa” okukarera Jehova. Eṱe katu nokuvanga okurira tjimuna imbo mba tamunwa mu Levitikus 26:36, 37. (Lesa.) Katu nokuyandjera okutira ku tjite kutja tu ise okukarera Jehova. Eṱe tu nongamburiro okuura mu Jehova nu katu nokuurumisiwa i yotjiṋa. (Jes. 28:16) Tu paha omuhunga okuza ku Jehova okupitira mongumbiro. Mena rokutja Mukuru wetu me tu vatere, nandarire ovandu ovanamasa mohoromende kamaave roro okututjaera okurikotamena nouṱakame ku Mukuru.—Hebr. 13:6.

ME SOKUTJINDIRA KEHI RARWE?

8-9. (a) Ondando iṋe Omukriste auhe ndji ma sokutjita kourike we poo keṱunḓu re? (b) Otjikwaye tji matji vatere omundu okutjita ondando ombwa?

⁸ Indu ohoromonde tji ya tjaere omerikotameno wetu, ove mape ya outu okuripura kutja motjindire kehi rarwe omerikotameno wetu ku ye ha tjaerwa. Kape nomundu ngu me ku tjitire ondando ndjo. Ngunda au hiya tjita ondando, ma rire nawa tji wa konḓonona ovihorera vyOvakriste veserewondo etenga kutja va tjita vi indu tjaave tatumisiwa. Kombunda ya indu ovanavita tji va zepa Stefanus nomawe, ovakambure moJerusalem va ya koJudea noSamaria nu nandarire koFinisie, Syprus, na Antiokie. (Mat. 10:23; Oviung. 8:1; 11:19) Posi yokutja, indu Ovakriste veserewondo etenga tji va muna ondatumisire yarwe, omuapostele Paulus ka tjindire kwarwe. Nungwari, eye wa twa omuinyo we moumba mena rokutja eye aa vanga okuzuvarisa ombuze ombwa nokuyanḓiparisa ovakambure movihuro mu mwa ri ondatumisire onḓeu.—Oviung. 14:19-23.

⁹ Matu rikohongere ko tjike kovihorera mbi? Otjiuru atjihe tjeṱunḓu matji sokutjita ondando yokutjinda. Ngunda e hiya tjita ondando, eye ma sokukumba nokutara kongaro yeṱunḓu re, noviṋa oviwa novivi mbi ma vi yetwa i yomatjindiro ngo. Mongaro otja indji Omukriste auhe kourike we ma “sokutjinda omutwaro we omuini.” (Gal. 6:5) Eṱe katu sokupangura varwe mena rondondo ndji va tjiti.

MATU RIKOTAMENE MOMUANO UṊE INDU OVIUNGURA VYETU TJI VYA TJAERWA?

10. Orutavi romberoo novanene vombongo ve yandja omarakiza yeṋe?

¹⁰ Ove mo kayenda vi komurungu okurikotamena ku Jehova ngunda oviungura vyetu a vya tjaerwa? Orutavi romberoo maru yandja omarakiza kovanene vombongo ohunga nomuano wokumuna oviṋa mbi kurisa oupanga wetu kuna Mukuru, okukara nozombongarero zombongo nomuano wokuzuvarisa ombuze ombwa. Indu orutavi romberoo tji ru hi nokuyenena okuhakaena ku novanene vombongo, ovanene vombongo mave vatere imba mbe ri mombongo na ove okukayenda komurungu okurikotamena ku Jehova. Owo mave tupe omuhunga okupitira mOmbeibela na momambo wetu.—Mat. 28:19, 20; Oviung. 5:29; Hebr. 10:24, 25.

11. Ongwaye tji u sokukara nongamburiro kutja mokara noviṋa avihe mbi mohepa okupamisa ongamburiro yoye nu mo yenene okutjita ye okutjevera Ombeibela nomambo woye?

¹¹ Jehova wa kwizika kutja ovakarere ve mave munu avihe mbi mave hepa okupamise nawo ongamburiro yawo. (Jes. 65:13, 14; Luk. 12:42-44) Kunao kara nongamburiro kutja otjira tje matji kupe avihe mbi mohepa kutja u kayende komurungu okurira omuṱakame. Posi yokutja pe notjiṋa tji mo yenene okutjita wina. Omerikotameneno weṋu tji ya tjaerwa, paha oruveze oruwa pu mo yenene okuhoreka Ombeibela yoye nomambo woye warwe. Kengeza kutja o ha isa oviṋa ovinanḓengu otja imbyo kutja omambo poo oviṋa vyomorungovi potuveze pu mavi munikwa tjimanga. Auhe wetu ma sokuungura pu ma yenene okupamisa ongamburiro ye.

12. Ovanene vombongo mave yenene vi okurongerisa ozombongarero zombongo momuano ovandu mu ve hi nokumuna kutja mape ungurwa tjike?

¹² Hapo tjike nozombongarero zomakati kotjivike? Ovanene vombongo mave rongerisa ozombongarero zombongo momuano ovetupirukire mu ve hi nokumuna. Owo mape ya ave mu raere kutja mu hakaene moumbumba ouṱiṱi, nokurundurura oiri notuveze pu ma mu tjitire ozombongarero zombongo. Ove mo yenene okutjevera ovakambure ovakweṋu mokuhungira neraka rokehi indu tji mo ya nokupita pozombongarero zombongo. Ove wina mo sokurihwikika momuano mbu hi nokunana ombango yovandu.

13. Matu rihongere ko tjike kovakambure ovakwetu mbaari mamahi nga ri kehi yoSoviet Union?

¹³ Omuano wokuungura otjiungura tjokuzuvarisa ku haṋika otja kozongaro momahi pekepeke. Posi yokutja matu paha omuano wokuzuvarisa, mena rokutja twa suvera Jehova nu tu nondjoroka okuraera varwe ohunga nOuhona we. (Luk. 8:1; Oviung. 4:29) Ohunga nomazuvarisiro wOvahongonone va Jehova mehi rimwe nda ri kehi yo Soviet Union, omutjange womakuruhungi wena Emily B. Baran wa tja: “Ohoromende tja raera Ovahongonone va Jehova kutja kave nokuyenena okuzuvarisa rukwao, owo va uta okuzuvarisa momiano vyarwe mokuhungira ku novararanganda, ovandu mba ve ungura pamwe, nomapanga. Indu tji va paterwa monḓorongo mena rotjiṋa hi, owo aave zuvarisa kovakamburwa ovakwao.” Nandarire kutja oviungura vyetu momahi ngaa ri kehi yoSoviet Union vya tjaererwe, ovakambure ovakwetu va kayenda komurungu okuzuvarisa. Indu oviungura vyokuzuvarisa tji vya tjaerwa pu u kara, kayende komurungu okukara nonḓero otjingeyo!

MATU SOKUKENGEZA TJIKE?

14. Epsalme 39:1 ri tu rakiza ohunga na tjike?

¹⁴ Kengeza ohunga noviṋa mbi mo raere varwe. Indu omerikatameneno wetu tji ya tjaerwa, matu sokutjiwa “oruveze rwokumwina.” (Omuzuv. 3:7) Eṱe katu sokuraera ondjivisiro ndji ha sokutjiukwa, tjimuna omana wovakambure ovakwetu, otuveze pu tu woronganena, omuano mbu tu ungura otjiungura tjokuzuvarisa, nomuano mbu tu muna oviṋa mbi kurisa oupanga wetu kuna Mukuru. Eṱe katu sokuraera ovandu mbe ungura mohoromende, poo omapanga poo ovazamumwe vetu mba tura mehi retu poo momahi yarwe. Tji twa tjiti nao matu twamo ovakambure ovakwetu moumba.—Lesa Epsalme 39:1.

15. Satan u kondja okututjita tjike nu matu yenene vi okunakaura ombate ye?

¹⁵ O yandjere omauzeu omaṱiṱi okutuhaṋa. Satan u tjiwa kutja ondjuwo ndja haṋika kaizikama. (Mar. 3:24, 25) Eye aruhe ma kondjo okutwamo ohaṋi mokati ketu. Momuano mbwi eye u vanga kutja eṱe turwe mokati ketu pendje nokumurwisa.

16. Omukazendu omukambure Gertrud Poetzinger we tupa otjihorera tjiṋe otjiwa?

¹⁶ Nandarire Ovakriste mbe kura mongamburiro ve sokuritjevera kutja ave ha wire mombate ndji. Ngatu tare kovihorera vyovakazendu ovakambure 2 ovatwirisiwa vomana, Gertrud Poetzinger na Elfriede Löhr. Owo vari pu nOvakriste ovakazendu varwe mokamba yovakamburwa yoNazi. Gertrud wa uta okukara neruru na Elfriede indu tja yandja omahungi omayanḓiparise kovakambure ovakwao mokamba. Kombunda, Gertrud wa ṱohoṋi nu we riheka ku Jehova okumuvatera. Eye wa tja: “Eṱe matu sokuyakura indu varwe tji ve novikaṋena oviwa poo omerizirira omengi kombanda yetu.” Eye wa isa vi okuṱa eruru nomukwao? Gertrud wa yandja ombongo kovikaṋena oviwa vya Elfriede nongaro ye ombwa nombore. Momwano mbwi, owo va rira omapanga omawa rukwao. Nu owo va karera Jehova nouṱakame ngaa komaandero wehupo rawo kombanda yehi. Indu tji twa ungura oukukutu kutja atu ha kara nomauzeu pokati kovakambure ovakwetu eṱe katu nokuyandjera otjiṋa okutuhaṋa.—Kol. 3:13, 14.

17. Ongwaye tji matu sokukongorera omuhunga mbu matu pewa i yotjira tja Jehova aruhe?

¹⁷ Aruhe kongorera omirari. Indu tji matu ṱakamisa omirari mbi matu munu okuza kovakambure ovaṱakame mbe nomerizirira, matu nakaura omauzeu. (1 Petr. 5:5) Otjotjihorera, mehi oviungura vyetu mu vya tjaerwa, ovarumendu mbe nomerizirira va raera ovazuvarise kutja ave yandja oumbo motjiungura tjokuzuvarisa. Posi yokutja omurumendu omukandjira ngo ka kongorere omirari mbyo nu eye wa yandja omambo. Hapo ovikwaye mbya kongorera ko? Katjisupi indu tji va mana okuzuvarisa owo va puriwa i yovaporise. Pe munika tjimuna, ovaporise aave ve kongorere nu va kambura omambo owo ngaave yandja. Matu rihongere tjike kotjihorera hi? Eṱe matu sokukongorera omirari nandarire kutja katu nokuyenda kumwe navyo. Jehova aruhe utu sera ondaya tji matu ungura pamwe novarumendu ovakambure eye mba zika kutja vetu hongorere po.—Hebr. 13:7, 17.

18. Ongwaye tji tu ha sokutwapo ozoveta nḓe he ri ohepero?

¹⁸ O twapo ozoveta nḓe he ri ohepero. Ovanene vombongo tji va twapo ozoveta nḓe he ri ohepero, owo ve tjita kutja oviṋa vi rire ovizeu kovakambure ovakwao. Mbuti Juraj Kaminský wa hungira ohunga noviṋa mbya tjitwa indu oviungura vyetu tji vya tjaererwe motjirongo tja tji tjiukwa otja Czechoslovakia. Eye wa tja: “Kombunda ya indu ovarumendu ovakambure mbe nomerizirira novanene vombongo ovengi tji va kamburirwe, ovarumendu ovakambure tjiva mbe hina va kamburirwe va uta okutwapo ozoveta zawo oveni nu aave raere ovazuvarise kutja ngave tjite vi nu ave tjiti vi.” Jehova kee tupa ousemba wokutwapo ozoveta kovakambure ovakwetu. Omundu tji ma twapo ozoveta nḓe he ri ohepero, eye ke nokutjevera omukambure omukwao posi yokutja eye ma honaparere po ongamburiro ye.—2 Kor. 1:24.

O ISA OKURIKOTAMENA KU JEHOVA

19. Otja 2 Ekuruhungi 32:7, 8, ongwaye tji matu yenene okurira ozombanḓe nandarire kutja Satan u tjita ozongondjero?

¹⁹ Omunavita na eṱe, Satan Omudiaboli, kamaa isa okutatumisa ovakarere va Jehova ovaṱakame. (1 Petr. 5:8; Omavan. 2:10) Satan na imba mbe ri munda we ve kondja okutjaera omerikotameno wetu ku Jehova. Nandarire kutja matu tira, eṱe kamaatu isa okukarera Jehova! (Deut. 7:21) Jehova u ri munda wetu, eye ma kayenda komurungu okukara kuna eṱe nandarire kutja oviungura vyetu vya tjaerwa.—Lesa 2 Ekuruhungi 32:7, 8.

20. Ove we rimanene okutjita tjike?

²⁰ Ngatu rimanene okukara tjimuna Ovakriste veserewondo etenga, mba raera ovahonapare womayuva wawo kutja, “ripureye nawa kutja osemba komurungu wa Ndjambi okwo ngwi okuzuva ku eṋe poo okwo ngwi okuzuva ku Ndjambi? Tareye, eṱe kamaatu sora okuhinakuhungira imbi mbi twa muna na imbi mbi twa zuva oveni.”—Oviung. 4:19, 20.