Pemandang

11 Udah nya, aku diberi batang kayu ke baka tungkat,* lalu bisi nyawa bejaku ngagai aku: “Angkat, lalu sukat meh alta enggau Rumah Sembiang* Petara, lalu itung meh penyampau orang ke nyembah Petara ba dia. 2 Tang, anang nyukat laman ba luar Rumah Sembiang nya. Tejuka aja, laban laman nya udah diserahka ngagai bansa bukai, lalu sida deka ngindik nengeri ti kudus nya pengelama 42 bulan. 3 Aku deka ngasuh dua iku saksi aku ngena kain guni, lalu nusui jaku ti benabi pengelama 1,260 hari.” 4 Dua iku saksi nya digambarka ngena dua iti pun kayu kana sereta dua iti penuduk lampu. Seduai iya bediri ba mua Tuan ke bekuasa atas dunya.

5 Enti bisi sapa-sapa deka ngemediska seduai iya, api deka pansut ari mulut seduai iya lalu nganguska munsuh seduai iya. Sapa-sapa ke deka ngemediska seduai iya mesti dibunuh baka nya. 6 Seduai iya bisi kuasa kena nutup langit ngambika hari enda ujan ba timpuh seduai iya nusui jaku ti benabi. Seduai iya mega bisi kuasa kena ngubah ai nyadi darah, sereta ngasuh tiap macham bencana ninggang dunya nitihka penyuah ti dikedekaka seduai iya.

7 Lebuh seduai iya udah tembu nusui jaku ti benabi, jelu ti siga ke pansut ari lubang ti amat dalam* deka beperang enggau seduai iya, ngalahka seduai iya, lalu munuh seduai iya. 8 Bangkai seduai iya ditejuka garing-garing ba jalai besai ba nengeri ti besai, endur Tuan seduai iya dibunuh ba tiang. Nengeri nya digambarka ngena Sodom enggau Ejip. 9 Pengelama tiga hari setengah, orang ari bemacham bansa, raban bansa, jaku, enggau menua, deka meda bangkai seduai iya. Sida enda ngemendarka bangkai seduai iya dikuburka. 10 Orang ba dunya balat gaga, berami, sereta meri hadiah ngagai pangan diri, laban ngelama tu sida udah balat merinsa ninga berita ke ditusui dua iku nabi nya.

11 Pengudah tiga hari setengah, Petara mulaika seput seduai iya, lalu seduai iya angkat bediri. Semua orang ke meda seduai iya pan balat takut. 12 Seduai iya lalu ninga nyawa ti inggar bejaku ngagai seduai iya ari langit: “Niki kitu.” Seduai iya pan niki ke langit dalam remang, lalu munsuh seduai iya meda seduai iya. 13 Maya nya, gempa bumi ti balat nyadi, lalu satu persepuluh ari nengeri nya runtuh. Ketegal gempa bumi nya, 7,000 iku orang mati. Sida ke bukai nyadi takut, lalu ngemuliaka Petara ti ba serega.

14 Tulah ti kedua udah nyadi. Peda! Tulah ti ketiga deka datai enggau jampat.

15 Melikat ti ketujuh nyepu terumpit iya, lalu bisi nyawa ti inggar bejaku ari serega: “Perintah Petara kitai enggau Kristus Iya benung merintah dunya, lalu Iya deka merintah nyadi raja belama iya.”

16 Udah nya, 24 iku bala tuai ke duduk ba kerusi diraja ba mua Petara, lalu besugang ngendukka pala nyembah Petara. 17 Ku sida madahka: “Kami beterima kasih ngagai Nuan Petara Jehovah ke Pemadu Bekuasa, ke bisi diatu, enggau ke bisi suba, laban Nuan udah ngena kuasa Nuan ti besai lalu berengkah merintah nyadi Raja. 18 Tang semua menua ba dunya nyadi ringat, lalu pengeringat Nuan mega datai. Maya ke ditetapka kena ngakim orang mati udah datai. Maya mega udah datai alai Nuan meri upah ngagai bala ulun Nuan, iya nya bala nabi, bala nembiak Nuan ti kudus, enggau bala sida ke nangika nama Nuan, sekalika nya orang biasa tauka orang ke tinggi pangkat. Maya nya mega, Nuan deka ngemunaska orang ke nganchurka dunya.”

19 Udah nya, Rumah Sembiang* Petara ba serega tebuka, lalu peti lampang batu Adat Iya ulih dipeda ba Rumah Sembiang Iya. Kilat nyelar, lalu bisi bunyi nyawa, enggau guntur. Gempa bumi nyadi, lalu ujan batu ti balat nurun.