1 Raja

6 Ba taun ti keempat, pengudah Solomon nyadi raja orang Israel, iya berengkah ngaga Rumah Jehovah* ba bulan Ziv,* iya nya bulan ti kedua. Nya ba taun ti ke-480, pengudah orang Israel ninggalka Ejip. 2 Pemanjai Rumah ke digaga Raja Solomon ke Jehovah nya 60 kiubit,* buka iya 20 kiubit, lalu peninggi iya 30 kiubit. 3 Buka ruang depan Rumah Sembiang nya 20 kiubit, sama enggau pemesai buka Rumah Sembiang nya empu. Pemanjai ruang nya 10 kiubit.

4 Iya ngaga jenila ke bisi bingkai dalam Rumah Sembiang. Bingkai nya besai ba dalam, lalu digaga majak mit ke luar. 5 Iya mega ngaga dinding ba luar ke ngelingi dinding Rumah Sembiang, iya nya ngelingi Endur ti Kudus sereta Endur ti Pemadu Kudus. Nya alai, bisi ruang ba entara dinding nya enggau dinding Rumah Sembiang. Lalu ba ruang nya bisi beberapa iti bilik. 6 Ruang nya bisi tiga tingkat. Pemesai buka bilik ba baruh lima kiubit, pemesai buka bilik ba tengah enam kiubit, lalu pemesai bilik ba atas tujuh kiubit. Dinding ba tiap iti tingkat digaga majak nipis ke tingkat atas ngambika kayu ulih diengkahka ba entara dinding luar enggau dinding Rumah Sembiang, lalu enda ibuh nebuk lubang ba dinding nya.

7 Rumah Sembiang digaga ngena batu ke udah diputung sereta ke udah disediaka dulu. Nya alai, nadai munyi tukul, kapak, tauka perengka besi ke bukai didinga, lebuh Rumah nya digaga. 8 Pintu penama ngagai bilik ba tingkat baruh bisi ba begian selatan* Rumah Sembiang. Ari tingkat baruh, bisi tangga ke bepusin digaga nuju ngagai tingkat tengah sereta nuju ngagai tingkat atas. 9 Solomon neruska pengawa begagaka Rumah Sembiang sampai tembu. Iya ngena kayu enggau papan sidar kena ngaga atap Rumah nya. 10 Peninggi ruang ba tiap tingkat ke digaga ngelingi Rumah Sembiang lima kiubit. Kena nyambung dinding luar enggau dinding Rumah Sembiang, kayu sidar diengkahka ba entara kedua-dua dinding nya.

11 Ku Jehovah bejaku ngagai Solomon: 12 “Bekaul enggau Rumah ke digaga nuan tu, enti nuan nitihka adat, atur, enggau semua pesan Aku, Aku deka ngamatka semaya ke udah digaga Aku enggau apai nuan, David. 13 Aku deka diau enggau bala nembiak Aku, orang Israel. Lalu Aku enda sekali-kali ninggalka sida.”

14 Solomon neruska pengawa begagaka Rumah Sembiang sampai tembu. 15 Iya ngelapis dinding ba begian dalam Rumah Sembiang ngena papan kayu sidar ari lantai nyentuk ngagai siling, lalu iya ngelapis lantai Rumah nya ngena papan kayu juniper. 16 Ba begian paling ujung dalam Rumah Sembiang, iya ngaga siti bilik. Pemanjai bilik nya 20 kiubit. Iya ngaga bilik nya ngena papan kayu sidar ari lantai nyentuk ngagai atap. Bilik nya Endur ti Pemadu Kudus. 17 Ba begian depan dalam Rumah nya Endur ti Kudus. Pemanjai iya 40 kiubit. 18 Iya ngukir gambar buah labu enggau bungai ke ngerembai ba papan kayu sidar dalam Rumah nya. Semua dinding dalam Rumah nya dilapis ngena kayu sidar nyentukka semua batu ke dikena ngaga dinding nya nadai ayan agi.

19 Solomon nyediaka Endur ti Pemadu Kudus dalam Rumah nya, alai nyimpan peti lampang batu Adat Jehovah. 20 Pemanjai bilik nya 20 kiubit, buka iya 20 kiubit, lalu peninggi iya 20 kiubit. Iya ngelapis bilik nya ngena emas ti tulin, lalu alta dilapis iya ngena kayu sidar. 21 Solomon ngelapis begian dalam Rumah Sembiang ngena emas ti tulin. Kelimpah ari nya, iya ngengkahka rantai emas ba depan Endur ti Pemadu Kudus, ke mega udah dilapis ngena emas. 22 Iya ngelapis semua begian dalam Rumah nya ngena emas. Iya mega ngelapis alta semak Endur ti Pemadu Kudus ngena emas.

23 Ba Endur ti Pemadu Kudus, iya ngaga dua iku cherub ngena kayu pain.* Peninggi tiap iku cherub nya 10 kiubit. 24 Tiap iku cherub bisi dua iti sayap, lalu pemanjai tiap iti sayap nya lima kiubit. Penyauh ari puting sayap siti ngagai puting sayap siti nya 10 kiubit. 25 Peninggi cherub ti kedua mega 10 kiubit. Dua iku cherub nya sama bentuk enggau sama pemesai. 26 Cherub nya sama tinggi enggau cherub ke siku da agi, iya nya 10 kiubit. 27 Udah nya, iya ngengkahka dua iku cherub nya ba Endur ti Pemadu Kudus. Sayap seduai iya ngerembai nyentukka sayap cherub ke siku negu dinding ba sepiak, lalu sayap cherub ke siku da agi negu dinding ba sepiak. Sayap seduai iya ke siti agi negu sayap pangan diri ba tengah-tengah bilik nya. 28 Iya ngelapis dua iku cherub nya ngena emas.

29 Iya ngukir gambar cherub, pun kayu engkerema, enggau bungai ke ngerembai ba semua dinding Endur ti Pemadu Kudus sereta Endur ti Kudus. 30 Iya ngelapis lantai kedua-dua bilik nya ngena emas. 31 Ba jalai penama ngagai Endur ti Pemadu Kudus, iya ngaga dua iti pintu ngena kayu pain lalu masang bingkai pintu enggau tiang pintu. Nya nyadi begian ti kelima.* 32 Kedua-dua pintu nya digaga ngena kayu pain. Iya ngukir gambar cherub, pun kayu engkerema, enggau bungai ke ngerembai ba pintu nya. Udah nya, iya ngelapis semua pintu nya ngena emas. Iya ngetuk emas nya ngena tukul kena nentuka gambar cherub enggau pun kayu engkerema amat-amat dilapis emas. 33 Iya mega ngaga tiang ba jalai penama Endur ti Kudus enggau chara ti sama. Tiang nya digaga ari kayu pain, lalu nyadi begian ti keempat.* 34 Iya ngaga dua iti pintu ngena kayu juniper, lalu tiap iti pintu nya ulih dilipat. 35 Iya ngukir gambar cherub, pun kayu engkerema, enggau bungai ke ngerembai ba pintu nya. Lalu semua nya dilapis ngena emas.

36 Iya ngaga dinding ngelingi laman dalam. Dinding nya bisi tiga lapis batu ti udah diputung enggau selapis kayu sidar.

37 Ba taun ti keempat, kena bulan Ziv,* asas Rumah Jehovah digaga. 38 Ba taun ti ke-11, kena bulan Bul,* iya nya bulan ti kelapan, Rumah nya tembu digaga magang nitihka pelan iya. Solomon ngaga Rumah nya pengelama tujuh taun.