Bansa Israel ti Kedua
21 Pengujung iya, Jehosapat mati lalu dikuburka begulai enggau aki ini iya ba Kuta David. Anak lelaki iya, Jehoram, nganti iya nyadi raja. 2 Bala menyadi Jehoram ke bukai, iya nya Asariah, Jehiel, Sekariah, Asariah, Mikael, enggau Sepatiah. Semua sida bala anak lelaki Jehosapat, raja Israel. 3 Apai sida meri sida mayuh pirak, emas, utai ti berega, enggau kuta-kuta ke bedinding ba Judah. Tang, iya meri perintah iya ngagai Jehoram laban Jehoram anak tuai.
4 Lebuh Jehoram megai perintah apai iya, iya negapka penuduk iya. Iya munuh semua menyadi lelaki iya enggau beberapa iku pegawai Israel ngena pedang. 5 Umur Jehoram 32 taun lebuh iya nyadi raja, lalu iya merintah ba Jerusalem pengelama lapan taun. 6 Ketegal iya kawin enggau anak indu Ahap, iya nunda pengawa bala raja Israel, baka ke digaga ruang bilik Ahap. Jehoram majak ngereja utai ti jai ba mata Jehovah. 7 Tang Jehovah enggai ngemunaska ruang bilik David, ketegal semaya ke udah digaga Iya enggau David. Iya besemaya peturun David deka mengkang merintah nyadi raja.*
8 Maya Jehoram merintah, orang Edom angkat ngelaban perintah Judah, lalu ngelantik raja sida empu. 9 Nya alai, Jehoram enggau bala ketuai soldadu iya mai semua kerita kuda iya mansang ke seberai nyerang sida. Ba dia, orang Edom ngelingi iya enggau bala ketuai raban kerita kuda iya. Tang maya malam hari, iya mansang lalu ngalahka orang Edom. 10 Taja pia, orang Edom majak ngelaban Judah nyentukka seharitu. Maya nya, orang Libnah mega angkat ngelaban Jehoram laban iya udah ninggalka Jehovah, Petara aki ini iya. 11 Iya mega nirika endur alai orang nyembah petara pelesu* ba kawasan begunung ba Judah, sereta ngujungka bala orang ke diau ba Jerusalem enda setia ngagai Petara.* Iya udah nesatka orang Judah.
12 Udah nya, Nabi Elijah nulis surat ngagai Jehoram. Ku Elijah: “Tu pesan Jehovah, Petara David, moyang tuan: ‘Tuan enda nitihka teladan apai tuan Jehosapat tauka teladan Assa, raja Judah. 13 Tang, tuan nitihka jalai bala raja Israel. Tuan udah ngujungka Judah enggau bala orang ke diau ba Jerusalem enda setia ngagai Petara,* baka ruang bilik Ahap. Tuan indah munuh bala menyadi tuan empu, ruang bilik apai tuan ke jauh manah agi ari tuan. 14 Ketegal nya, Jehovah deka ngukum bala rayat tuan sereta bala anak bini tuan. Iya mega deka nganchurka semua utai ke enggi tuan. 15 Tuan deka merinsa ketegal mayuh macham penyakit, nyengkaum sakit ba gelung perut. Hari siti ngagai hari siti, penyakit ba gelung perut tuan deka majak balat-sebalat, nyentukka gelung perut tuan pansut.’”
16 Udah nya, Jehovah ngasuh orang Pilistin enggau orang Arab ke diau semak enggau orang Etiopia nyerang Jehoram. 17 Sida pan nyerang Judah, nguasa menua nya, lalu ngerampas semua reta ba istana. Sida mega nabanka semua anak bini Jehoram. Iya ke agi tinggal semina Jehoahas,* iya nya anak Jehoram ke pemadu biak. 18 Pengudah semua nya nyadi, Jehovah ngenataika penyakit gelung perut ke enda ulih diubat ngagai Jehoram. 19 Dua taun pengudah nya, penyakit ba gelung perut Jehoram majak balat-sebalat, nyentukka gelung perut iya pansut. Iya amat merinsa lalu ngujungka iya mati. Bala rayat iya enda nungkunka menyan ti bebau rengut baka ke digaga sida ke aki ini iya. 20 Jehoram beumur 32 taun lebuh iya nyadi raja, lalu iya merintah ba Jerusalem pengelama lapan taun. Nadai siku pan tusah ati lebuh iya mati. Iya dikuburka ba Kuta David, tang ukai ba pendam bala raja.