Surat Kereja Rasul
26 Raja Agripa bejaku ngagai Paul: “Nuan tau bejaku ngarika diri empu.” Paul pan ngangkatka jari lalu bejaku ngetanka diri. Ku iya:
2 “Raja Agripa, aku beterima kasih laban ulih ngetanka diri ba mua nuan seharitu bekaul enggau semua jaku tuduh ke disebut orang Judah pasal aku, 3 kelebih agi laban nuan landik amat pasal semua adat sereta kelikuh orang Judah. Nya alai, aku minta nuan ningaka aku enggau sabar.
4 “Mayuh orang Judah nemu gaya pengidup aku kenyau ari aku agi biak lebuh aku begulai enggau bansa aku nyentuk ngagai maya aku ba Jerusalem. 5 Sida udah lama ngelala aku. Enti sida ka, sida ulih madahka pasal aku ke kala nyadi orang Parisi. Nya raban pengarap ke pemadu terit. 6 Tang diatu, aku diakim laban aku arapka semaya ke diberi Petara ngagai aki ini kitai. 7 Kebendar iya, 12 iti raban bansa kitai mega arapka semaya nya dikeamatka. Nya alai, sida bebendar bejalaika pengawa ti tuchi siang enggau malam. Tuan, ketegal aku arapka semaya nya meh aku dituduh orang Judah.
8 “Nama kebuah kita enda pechaya Petara ulih ngidupka baru orang ke mati? 9 Suba aku empu pan ngasaika diri patut bebendar ngelaban nama Jesus, orang Nasaret nya. 10 Nya meh utai ke dikereja aku ba Jerusalem. Ngena kuasa ke diberi bala tuai imam, aku udah ngejil mayuh nembiak Petara ti kudus. Lebuh sida diukum bunuh, aku mega setuju enggau pemutus nya. 11 Aku suah ngukum sida ba semua balai gempuru kena mejal sida muai pengarap sida. Aku amat begedika sida nyentukka aku sanggup merinsaka sida indah ba nengeri bukai.
12 “Nyadi sekali, ketegal deka ngereja nya, aku mansang ngagai Damaskus pengudah nerima kuasa enggau pesan ari bala tuai imam. 13 Tuan, maya tengah hari lebuh ba rantau jalai, bisi penampak ari langit ke terang agi ari mata panas manchar ngelingi aku sereta orang ke enggau aku. 14 Kami lalu rebah ke tanah. Udah nya, aku bisi ninga nyawa bejaku enggau aku dalam jaku Hebrew: ‘Saul, Saul, nama kebuah nuan merinsaka aku? Enti nuan majak ngelaban aku,* nuan deka ngemediska diri empu.’ 15 Aku lalu nanya: ‘Sapa nuan, Tuan?’ Tuan pan nyaut: ‘Aku tu Jesus, orang ke diperinsaka nuan. 16 Angkat nuan lalu bediri. Aku mandangka diri ngagai nuan, laban aku deka milih nuan nyadi ulun sereta saksi kena nusui utai ke udah dipeda nuan sereta utai ke deka ditunjukka aku ngagai nuan pasal aku. 17 Aku deka nyelamatka nuan ari orang Judah enggau ari bansa bukai. Aku deka nganjung nuan ngagai sida 18 kena muka mata sida, ngambika sida pansut ari pemetang lalu tama ngagai penampak. Enggau nya, sida deka dilepaska ari kuasa Sitan lalu nguing ngagai Petara. Enti sida arapka aku, dosa sida deka diampunka lalu sida deka nerima pesaka begulai enggau orang ke dikuduska Petara.’
19 “Nya alai, Raja Agripa, nya meh kebuah aku ngasika genera ke datai ari serega nya. 20 Aku nusui berita ti madahka, orang patut nesal ati sereta nguingka diri ngagai Petara, lalu ngereja pengawa ke nunjukka sida udah nesal ati. Aku nusui berita nya berengkah ari Damaskus. Udah nya, Jerusalem, lalu ba serata Judea sereta ngagai bansa bukai. 21 Nya meh kebuah orang Judah nangkap aku lebuh aku ba Rumah Sembiang, lalu sida nguji deka munuh aku. 22 Taja pia, ketegal bantu ari Petara, nyentukka seharitu aku terus meri saksi ngagai semua orang, enda ngira ngagai orang biasa tauka ngagai orang ke tinggi pangkat. Aku semina madahka utai ke deka nyadi baka ke ditulis bala nabi enggau Moses, 23 iya nya pasal Kristus ke deka merinsa sereta nyadi orang keterubah ke diidupka baru ari mati. Iya deka nginjil lalu meri penampak ngagai bansa tu sereta ngagai bansa bukai.”
24 Pengudah Paul nyebut utai nya kena ngetanka diri, Festus lalu bejaku enggau nyawa ti inggar: “Nuan tu udah gila, Paul! Penemu nuan ke mayuh nya udah ngasuh nuan gila!” 25 Tang Paul nyaut: “Enda aku gila deh, Tuan Festus ti Bemulia. Semua utai ke disebut aku nya amat, lalu ukai datai ari runding ti enda betul. 26 Kebendar iya, aku ulih bejaku terus terang* ngagai Raja Agripa laban iya udah nemu pasal pekara tu. Aku pechaya nadai siti pan ari utai tu ke enda ditemu iya, laban utai tu enda dikereja belalai. 27 Tuan Raja Agripa, kati nuan pechayaka utai ke ditulis bala nabi? Aku nemu nuan sigi pechaya.” 28 Tang Raja Agripa nyaut Paul: “Landik amat nuan bejaku, Paul. Enti aku majak ningaka nuan, enda lama agi aku ke nyau nyadi orang Kristian.” 29 Paul madahka: “Aku besampi ngagai Petara ngambika pekara nya deka nyadi enda ngira jampat tauka enda. Kebendar iya, aku besampi ukai aja ngambika nuan tang mega ngambika semua orang ke ningaka aku seharitu nyadi baka aku. Tang, aku enggai kita dirantai baka tu.”
30 Udah nya, Raja Agripa, gabenor, Bernis, enggau semua orang ke duduk begulai enggau sida, bediri magang. 31 Lebuh sida mupuk, sida bejaku enggau pangan diri: “Orang tu nadai ngereja nama-nama utai ke tau ngasuh iya diukum bunuh tauka dijil.” 32 Udah nya, Raja Agripa bejaku enggau Festus: “Kebendar iya, orang tu ulih dilepaska enti iya enda minta diakim raja Rome.”*