Isaiah
45 Jehovah milih Sairus lalu megai jari kanan iya
Kena ngalahka mayuh bansa ke ba depan iya,
Kena ngerampas senyata* bala raja,
Kena muka pintu kuta ke ba depan iya,
Ngambika pintu penama enda ditutup.
Tu meh utai ke dipadahka Petara ngagai Sairus:
2 “Aku deka bejalai dulu ari nuan,
Lalu Aku deka ngerataka bukit.
Pintu temaga deka dianchurka Aku,
Lalu palang besi deka dipatahka Aku.
3 Aku deka meri nuan reta ke ba endur ti petang,
Enggau reta ke dilalaika ba endur ti enda ditemu orang,
Ngambika nuan nemu Aku tu meh Jehovah,
Petara orang Israel, ke ngangauka nuan ngena nama nuan.
4 Ketegal nembiak Aku, Jakop, enggau Israel ke dipilih Aku,
Aku ngangauka nuan ngena nama nuan.
Aku deka ngasuh nama nuan nerima mulia, taja pan nuan enda ngelala Aku.
5 Aku meh Jehovah, lalu nadai ke baka Aku.
Nadai Petara bukai kelimpah ari Aku.
Aku deka ngeringka nuan, taja pan nuan enda ngelala Aku.
6 Ari timur ngagai barat,
Awakka orang nemu,
Nadai Petara bukai kelimpah ari Aku.
Aku meh Jehovah, lalu nadai ke baka Aku.
7 Aku ngaga penampak enggau pemetang.
Aku mai pengelantang enggau penusah.
Aku, Jehovah, ke ngaga semua utai tu.
8 O langit, awakka ujan nurun ari atas;
Awakka remang* mansutka pengelurus.
Awakka dunya tebuka lalu ngasilka pengelepas ti belimpah,
Lalu awakka pengelurus tumbuh ba maya ti sama.
Aku, Jehovah, udah ngasuh utai nya nyadi.”
9 Tulah meh orang ke bekelikuh enggau Iya ke ngaga sida,
Laban orang nya semina kerimpak periuk tanah aja
Ke begulai enggau kerimpak periuk tanah ke bukai ba tanah!
Patut tanah liat madah ngagai Tukang Periuk Tanah:* “Nama utai ke digaga nuan?”
Tauka patut asil pengawa nuan madah: “Nuan nadai jari”?*
10 Tulah meh orang ke nanya apai iya: “Nama kebuah nuan nyadi apai aku?”
Lalu nanya indai iya: “Nama kebuah nuan ngadaka aku baka tu?”
11 Tu meh utai ke dipadahka Jehovah, Petara Israel ti Kudus, ke nempa* Israel:
“Patut nuan nanya Aku pasal utai ke deka nyadi,
Lalu madahka Aku utai ke patut digaga Aku ngagai bala anak Aku sereta utai ke digaga jari Aku?
12 Aku meh ke ngaga dunya enggau mensia ke ba dunya.
Aku meh ke ngerembaika langit ngena jari Aku Empu,
Lalu Aku meh ke meri atur ngagai semua utai ke ba langit.”
13 “Ketegal Aku Petara ti lurus, Aku nyediaka siku orang,
Lalu Aku deka ngasuh semua jalai iya lurus.
Iya meh ke deka nirika kuta Aku,
Lalu iya enda ibuh mayar nama-nama tauka meri rasuah lebuh ngelepaska bala nembiak Aku ke ditangkap,” ku Jehovah, ketuai soldadu serega.
14 Tu meh utai ke dipadahka Jehovah:
“Untung* ke diulih Ejip sereta utai ke dijual* Etiopia enggau orang Seba ke tinggi,
Deka datai ngagai nuan lalu diempu nuan.
Sida deka ditanchang ngena rantai lalu bejalai ba belakang nuan.
Sida deka datai lalu besugang ngagai nuan.
Ngagai nuan sida deka nyebut tu enggau penuh basa: ‘Petara tentu bisi enggau nuan.
Semina Iya aja meh Petara, nadai Petara bukai.’”
15 O Petara enggau Penyelamat Israel,
Endang amat, Nuan meh Petara ke enda mandangka utai ke dikereja Diri.
16 Semua orang ke ngaga patung deka dikemaruhka sereta dikelese;
Semua sida deka mupuk mai ati ti malu.
17 Tang Jehovah deka nyelamatka Israel ngena pengelepas ti meruan.
Kita enda dikemaluka tauka dikeleseka belama iya.
18 Tu meh utai ke dipadahka Jehovah,
Petara ti bendar ke ngaga langit,
Ke nempa* dunya, sereta ke ngasuh dunya nyadi tegap.
Iya enda ngaga dunya ngapa,* tang Iya ngaga dunya ngambika nyadi endur diau:
“Aku meh Jehovah, lalu nadai Petara bukai kelimpah ari Aku.
19 Aku enda bejaku ba endur ti enda ditemu tauka ba menua ti petang;
Aku enda madah ngagai peturun Jakop:
‘Giga meh Aku, tang kita deka lebu ngapa.’
Aku meh Jehovah ke bejaku pasal utai ti lurus sereta nusui pasal utai ti betul.
20 Datai meh lalu begelumu.
O kita ke udah ngerarika diri ari bansa bukai, datai semak.
Orang ke ngesan patung nya orang ke enda nemu utai.
Sida besampi ngagai petara ke enda ulih nyelamatka sida.
21 Padahka lalu bantaika pekara kita.
Awakka sida beserakup berandau enggau pangan diri.
Sapa ke madah pasal utai tu suba,
Lalu nusui utai tu kenyau ari kelia menya?
Endaka Aku, Jehovah, ke ngereja nya?
Nadai Petara bukai kelimpah ari Aku;
Aku meh Petara ti lurus lalu Aku meh Penyelamat, nadai Petara bukai kelimpah ari Aku.
22 O semua kita ke diau ba serata dunya, kuingka diri ngagai Aku lalu kita deka selamat,
Laban Aku meh Petara lalu nadai Petara bukai kelimpah ari Aku.
23 Aku udah besumpah;
Jaku ke pansut ari mulut Aku Empu tu amat
Lalu tentu deka dikeamatka:
Tiap iku orang deka besugang ngagai Aku,
Lalu tiap iku orang deka besumpah deka setia ngagai Aku.
24 Sida madahka: ‘Jehovah seruran ngereja utai ti betul lalu Iya amat kering.
Semua orang ke ringat ngagai Iya deka berasai malu lebuh datai ngagai Iya.
25 Semua peturun Israel deka nemu diri ngereja utai ti betul laban sida nyembah Jehovah,
Lalu sida deka temegahka utai ke udah digaga Iya ke sida.’”