Hebrew

1 Kelia menya, Petara mayuh kali bejaku ngagai aki ini kitai nengah bala nabi sereta ngena mayuh chara. 2 Tang ba pengujung jeman tu, Iya bejaku ngagai kitai nengah siku Anak, ke udah dipilih Iya nyadi waris semua utai, lalu nengah Anak nya, Iya ngaga semua utai ba dunya raya.* 3 Iya mandangka mulia Petara lalu amat-amat ngambarka Petara. Nengah jaku Petara ti bekuasa, iya ngetanka semua utai. Pengudah iya nuchi kitai ari dosa, iya duduk ba sepiak kanan Petara ti Bekuasa ba serega. 4 Iya nyadi manah agi ari bala melikat ketegal iya bulih nama ti bemulia agi ari nama sida.

5 Ambika chunto, ngagai melikat ke siku ni Petara kala nyebut: “Nuan meh anak Aku; lalu seharitu Aku nyadi apai nuan”? Tauka: “Aku deka nyadi apai iya; lalu iya deka nyadi anak Aku”? 6 Tang lebuh Iya sekali agi nganjung Anak Tuai Iya ke dunya, Iya madahka: “Awakka semua melikat Petara besugang ngagai iya.”

7 Iya mega bejaku pasal bala melikat: “Iya ngaga bala melikat Iya ngambika ngembuan tubuh serega, lalu bala ulun Iya nyadi baka api ti mau.” 8 Tang pasal Anak Iya, Iya madahka: “Petara nya kerusi diraja nuan nyentuk ke belama iya, lalu tungkat diraja Perintah nuan nya tungkat diraja pengelurus. 9 Nuan rinduka pengelurus, tang begedika penyai. Nya kebuah Petara, Petara nuan, milih* nuan ngena minyak lalu ngasuh nuan lebih agi gaga ati ari bala raja ke bukai.”* 10 Bup Kudus mega madahka: “O Tuan, ba pun iya kelia, Nuan nudukka pugu dunya lalu langit nya asil ari pengawa jari Nuan. 11 Semua nya deka lenyau, tang Nuan deka meruan belama iya. Baka gari, semua nya deka nyadi jai, 12 lalu Nuan deka ngulung semua nya baka ke ngulung baju jubah tauka gari, lalu semua nya deka ditukar. Tang Nuan deka meruan enda berubah, lalu pengidup Nuan nadai pengujung.”

13 Tang, pasal melikat ke siku ni Iya kala madahka: “Duduk ba sepiak kanan Aku, datai ke Aku udah ngaga munsuh nuan nyadika pelasar kaki nuan”? 14 Endaka semua melikat* nya bejalaika pengawa ti tuchi, lalu dianjung ngambika nulung sida ke deka diselamatka?