Surat Kereja Rasul
6 Maya nya, penyampau bala murid Jesus majak nambah. Orang Judah ke bejaku ngena jaku Gerika belabuh mut-mut pasal orang Judah ke bejaku ngena jaku Hebrew, laban bala indu balu ke bejaku ngena jaku Gerika enda dikeibuhka lebuh pemakai disadung ninting hari. 2 Nya alai, 12 iku rasul nya ngempuruka bala murid Jesus lalu bejaku: “Kami enda patut ngetu ngajar jaku Petara, semina ketegal deka nyadung pemakai. 3 Nya alai, bala menyadi, pilih tujuh iku lelaki ari bala kita ke ngembuan nama* ti manah, ke penuh laban kuasa kudus Petara, sereta ke bepenemu-dalam. Enggau tu, kami ulih milih sida kena bejalaika pengawa ke beguna nya. 4 Tang kami deka ngena awak sereta pengering kami kena besampi sereta ngajar jaku Petara.” 5 Semua murid berasai lantang ati lebuh ninga utai ke disebut bala rasul. Nya alai, sida milih Stepen, siku lelaki ke ngembuan pengarap ti besai sereta penuh laban kuasa kudus Petara. Sida mega milih Philip, Prokorus, Nikanor, Timon, Parmenas, enggau Nikolaus. Nikolaus datai ari Antiok sereta megai pengarap orang Judah. 6 Sida dibai ngagai bala rasul, lalu pengudah besampi, bala rasul ngengkahka jari ba atas sida ke dipilih.
7 Asil iya, jaku Petara majak ngelekai, lalu penyampau murid Jesus ba Jerusalem ngenyit nambah. Indah mayuh bala imam mega arap.
8 Stepen penuh laban kuasa Petara sereta amat dikerinduka Petara. Iya ngaga kereja ajih enggau tanda ba bala orang mayuh. 9 Tang beberapa iku orang ari raban Orang ke Udah Dilepaska datai enggau beberapa iku orang ari Sairin, Aleksandria, Kilikia, enggau Asia. Sida deka bekelikuh enggau Stepen. 10 Tang sida enda ulih nyangkal jaku iya, laban iya diiring kuasa kudus Petara lalu bejaku enggau penemu-dalam. 11 Udah nya, enggau chara ti belalai, sida ngasuh orang nyebut: “Kami ninga iya bejaku ngelaban Moses enggau Petara.” 12 Sida mega ngasut* orang mayuh, bala tuai bansa orang Judah, sereta bala penulis Adat. Semua sida tu datai ngenyit lalu nangkap Stepen. Sida kasar enggau iya, lalu mai iya ngagai Raban Kunsil Orang Judah. 13 Beberapa iku saksi pelesu ke dibai sida madahka: “Lelaki tu enda ngetu nyebut utai ke ngelaban Adat enggau endur ti kudus tu. 14 Ambika chunto, kami ninga iya nyebut pasal Jesus, orang Nasaret nya, deka ngerubuh endur tu sereta ngubah adat ke diberi Moses ngagai kitai.”
15 Lebuh semua orang ba Raban Kunsil Orang Judah ke benung duduk merening ngagai Stepen, sida meda mua iya baka mua melikat.