Pemungkal

17 Lebuh Abram beumur 99 taun, Jehovah mandangka Diri ngagai iya. Ku Petara bejaku: “Aku tu Petara ti Pemadu Bekuasa. Nuan patut seruran ngasika Aku, lalu nentuka diri enda bepenyalah. 2 Aku deka ngamatka sempekat ke digaga Aku enggau nuan. Lalu Aku deka meri nuan mayuh peturun.”

3 Abram pan besugang lalu ngendukka pala. Ku Petara agi: 4 “Aku udah ngaga sempekat enggau nuan. Nuan deka nyadi apai ke mayuh bengkah bansa. 5 Nama nuan ukai agi Abram,* tang Abraham,* laban Aku deka ngasuh nuan nyadi apai ke mayuh bengkah bansa. 6 Aku deka meri nuan mayuh peturun, lalu mayuh bengkah bansa deka datai ari nuan. Sekeda bala raja deka datai ari peturun nuan.

7 “Aku deka ngamatka sempekat ke digaga Aku enggau nuan, sereta enggau bala peturun nuan. Aku deka nyadi Petara nuan enggau Petara bala peturun* nuan, lalu sempekat tu deka meruan belama iya. 8 Lalu Aku deka meri nuan enggau bala peturun nuan semua tanah ba Kanaan, ke alai nuan diau nyadi orang asing. Tanah tu deka diempu kita belama iya, lalu Aku deka nyadi Petara bala peturun nuan.”

9 Ku Petara bejaku enggau Abraham: “Nuan enggau peturun nuan patut nitihka utai ke disebut Aku ba sempekat tu. 10 Tu sempekat entara Aku enggau nuan, ke patut dititihka nuan enggau bala peturun nuan: Semua bala kita ke lelaki patut disunat. 11 Kita mesti besunat. Lalu nya nyadika tanda sempekat entara Aku enggau kita. 12 Semua anak mit lelaki ke beumur lapan hari, ke ada ba ruang bilik nuan, mesti disunat. Sida ke lelaki ke ukai ari peturun nuan sereta sida ke dibeli nuan ari bansa bukai, mega mesti disunat. Nuan patut ngereja tu ari generasi ke generasi.* 13 Semua lelaki ke ada ba ruang bilik nuan, nyengkaum bala ulun enggau semua lelaki ke dibeli nuan, mesti disunat. Tu kena nunjukka sempekat Aku enggau nuan endang meruan belama iya. 14 Enti bisi lelaki ke enggai disunat, iya mesti dibunuh laban iya udah ngelanggar sempekat Aku.”

15 Udah nya Petara madah ngagai Abraham: “Nama bini nuan ukai agi Sarai,* tang Sarah.* 16 Aku deka merekat iya, lalu nuan deka bulih siku anak lelaki nengah iya. Aku deka merekatka Sarah, lalu iya deka nyadi indai ke mayuh bengkah bansa sereta raja.” 17 Abraham pan besugang lalu ngendukka pala. Iya belabuh ketawa lalu bejaku dalam ati iya: “Baka ni ku lelaki ke beumur 100 taun tau bisi anak? Baka ni ku Sarah ke beumur 90 taun ulih ngadaka anak?”

18 Nya alai Abraham bejaku ngagai Petara ti bendar: “Awakka Ismail diberekat nuan!” 19 Tang ku Petara nyaut: “Bini nuan Sarah deka ngadaka siku anak lelaki ke nuan. Lalu nuan deka meri iya nama Isak.* Aku deka ngaga sempekat enggau iya sereta bala peturun iya. Sempekat nya deka meruan belama iya. 20 Aku udah ninga peminta nuan pasal Ismail. Nya alai Aku deka merekatka iya. Iya deka bisi mayuh anak. Dua belas iku anak lelaki iya deka nyadi tuai raban bansa, lalu siti bansa ti besai deka datai ari iya. 21 Tang Aku deka ngaga sempekat Aku enggau Isak. Sarah deka ngadaka iya taun depan, ba maya tu.”

22 Pengudah Petara bejaku enggau Abraham, Petara pan ninggalka iya. 23 Nya alai ba hari nya, baka ke diasuh Petara, Abraham lalu nyunat anak iya Ismail enggau sida ke lelaki ke ada ba ruang bilik iya, nyengkaum sida ke ulun sereta sida ke udah dibeli iya. 24 Abraham disunat lebuh iya beumur 99 taun. 25 Lalu anak iya Ismail beumur 13 taun lebuh iya disunat. 26 Ba hari nya mega, Abraham enggau anak iya Ismail disunat. 27 Semua sida ke lelaki ke ba ruang bilik iya, nyengkaum sida ke udah enggau iya kenyau ari ada sereta sida ke udah dibeli iya ari bansa bukai, mega disunat sama enggau iya.