Pengulu

6 Tang sekali agi, orang Israel ngereja utai ti jai ba mata Jehovah. Nya alai, Jehovah nyerahka sida ngagai orang Midian pengelama tujuh taun. 2 Orang Midian nguasa orang Israel. Ketegal nya, orang Israel ngaga endur alai belalai* ba gunung, dalam gua, enggau ba endur ke tusah ditengah orang. 3 Tiap kali orang Israel betanamka utai, orang Midian, orang Amalek, enggau orang ari Timur deka datai nyerang sida. 4 Sida nirika kem ba kawasan orang Israel. Sida nyerang orang Israel lalu nganchurka semua utai tanam sida sampai ngagai Gaza, nyentukka orang Israel nadai utai diempa agi. Sida mega ngerampas semua jelu bedus, sapi, enggau keledai. 5 Sida datai laban deka nganchurka menua nya. Sida mai langkau kain sida sereta jelu tupi ke ngemayuh buntak. Penyampau sida enggau unta sida enda alah diitung. 6 Ketegal orang Midian, orang Israel balat suntuk nyentukka sida ngangauka Jehovah minta tulung.

7 Lebuh orang Israel minta Jehovah ngelepaska sida ari orang Midian, 8 Jehovah nganjung siku nabi ngagai sida. Ku nabi nya madahka: “Tu meh utai ke dipadah Jehovah, Petara orang Israel: ‘Aku udah mai kita pansut ari Ejip, menua alai kita nyadi ulun. 9 Aku ngelepaska kita ari Ejip sereta ari semua orang ke merinsaka kita. Aku udah muru sida ke kita, lalu meri menua sida ngagai kita. 10 Aku mega madah ngagai kita: “Aku tu meh Jehovah, Petara kita. Kita enda tau nangika petara orang Amor, ke ba endur alai kita diau.” Tang, kita enda ngasika* Aku.’”

11 Udah nya, melikat Jehovah datai lalu duduk ba baruh siti pun kayu ti besai ba Oprah. Pun kayu nya enggi Joas, ari peturun Abi-eser. Maya nya, anak lelaki iya ke benama Gideon benung nungku* gandum ba endur alai nganchurka buah anggur, ngambika enda dipeda orang Midian. 12 Melikat Jehovah ngayanka diri ngagai Gideon. Ku melikat nya madah: “Pahlawan ti kering, Jehovah bisi enggau nuan.” 13 Ku Gideon nyaut iya: “Minta ampun, tuan. Enti amat Jehovah bisi enggau kami, nama kebuah Iya nejuka semua utai tu nyadi ba kami? Ni semua pengawa Iya ti luar biasa ke dipadahka aki ini kami? Sida madah: ‘Jehovah mai kami pansut ari Ejip.’ Tang diatu, Jehovah ninggalka kami lalu nyerahka kami ngagai orang Midian.” 14 Jehovah* merening Gideon lalu bejaku: “Kena meh pengering ke dikembuan nuan. Nuan tentu deka nyelamatka orang Israel ari orang Midian, laban Aku meh ke ngasuh nuan ngereja nya.” 15 Ku Gideon nyaut: “Minta ampun Jehovah. Baka ni ku aku ulih nyelamatka orang Israel? Ba raban bansa Manasi, suku kami meh ke pemadu mit. Nambahka nya mega, aku tu meh orang ke pemadu enda penting ba ruang bilik apai aku.” 16 Tang, Jehovah madah ngagai iya: “Aku deka enggau nuan. Nuan deka ngalahka Midian enggau senang, baka ke belaban enggau siku orang aja.”

17 Udah nya, Gideon madahka: “Enti Nuan lantang ati enggau aku, ayanka siti tanda ke nunjukka Nuan meh ke benung bejaku enggau aku. 18 Anang guai mupuk Nuan. Nganti aku datai kitu baru, laban aku deka nyediaka pemakai lalu mai pemakai nya ke Nuan.” Ku melikat nya nyaut: “Au. Aku nganti nuan ba ditu.” 19 Gideon pan mupuk lalu mela siku anak kambin. Iya mega ngaga roti ti enda beragi ngena 11 kilogram* tepung. Iya ngengkahka dagin nya ba dalam bakul, lalu kuah dagin nya diengkahka iya ba dalam periuk. Udah nya, iya mai pemakai nya ngagai melikat nya. Ba baruh pun kayu ti besai, iya ngenahka pemakai nya ke melikat nya.

20 Ku melikat Petara ti bendar bejaku ngagai iya: “Engkahka dagin enggau roti ti enda beragi tu ba batu ti besai nya, lalu tuangka kuah dagin nya.” Gideon pan ngereja utai ke diasuh iya. 21 Udah nya, melikat Jehovah negu dagin enggau roti nya ngena ujung tungkat ke dipegai iya. Api lalu pansut ari batu nya lalu nganguska dagin enggau roti nya. Melikat Jehovah nya pan lalu lesap. 22 Nya baru Gideon sedar nya melikat Jehovah.

Ku Gideon madah tekala nya: “Endai, Jehovah, Tuan ti Pemadu Tinggi! Aku udah meda melikat Nuan, Jehovah!” 23 Ku Jehovah nyaut iya: “Anang irau.* Anang takut. Enda nuan mati.” 24 Gideon lalu ngaga siti alta ke Jehovah ba dia. Alta nya dikumbai orang Jehovah-shalom* sampai ke seharitu. Alta nya agi bisi ba Oprah, kuta orang Abi-eser.

25 Malam nya, Jehovah bejaku ngagai Gideon: “Bai anak sapi lelaki apai nuan, iya nya anak sapi ti kedua ke beumur tujuh taun. Runtuhka alta Baal apai nuan, lalu tebang tiang kayu keramat ke bisi ba sepiak alta nya. 26 Udah nya, ba atas kubu nya, tusun batu nyadika alta ke Petara nuan, Jehovah, lalu serahka anak sapi ti kedua nya nyadika pemeri tunu. Kena tiang kayu keramat ke udah ditebang nuan nya nyadika kayu api.” 27 Nyadi, Gideon mai 10 iku ulun iya ngereja utai ke diasuh Jehovah. Tang, iya enda berani ngereja nya maya siang hari, laban iya balat takutka ruang bilik apai iya enggau orang ke diau ba kuta nya. Nya alai, iya ngereja nya maya malam hari.

28 Pagi hari siti, orang ke diau ba kuta nya dani tumu. Sida meda alta Baal udah diruntuhka lalu tiang kayu keramat ke ba sepiak alta nya udah ditebang. Sida mega meda anak sapi ti kedua udah diserahka ba atas alta ke baru digaga nya. 29 Sida nanya pangan diri: “Sapa ngereja tu?” Pengudah sida mansik, sida madah: “Tu pengawa Gideon anak Joas.” 30 Nya alai, orang ke diau ba kuta nya bejaku ngagai Joas: “Bai pansut anak nuan. Iya patut mati, laban iya udah ngeruntuhka alta Baal lalu nebang tiang kayu keramat ke ba sepiak alta nya.” 31 Ku Joas nyaut sida ke benung ringat nya: “Patut kita ngetanka Baal? Patut kita nyelamatka iya? Sapa-sapa ke ngetanka Baal patut dibunuh pagi tu. Enti iya amat petara, awakka iya ngetanka diri empu, laban bisi orang udah ngeruntuhka alta iya.” 32 Ba hari nya, Joas ngangauka Gideon Jerubaal,* lalu madahka: “Awakka Baal ngetanka diri empu, laban bisi orang udah ngeruntuhka alta iya.”

33 Semua orang Midian, orang Amalek, enggau orang ari Timur pan begelumu. Sida meraka sungai lalu nirika kem ba Lebak Jesril. 34 Udah nya, kuasa kudus Jehovah nurun ngagai Gideon. Gideon nyepu terumpit,* lalu peturun Abi-eser pan nitihka iya ari belakang. 35 Iya ngasuh orang ngirumka pesan ngagai semua raban bansa Manasi, lalu sida nitihka iya. Iya mega ngasuh orang ngirumka pesan ngagai raban bansa Aser, Sebulun, enggau Naptali, lalu sida mega datai betemu enggau iya.

36 Udah nya, Gideon bejaku ngagai Petara ti bendar: “Enti Nuan amat ngena aku nyelamatka orang Israel baka ke disemayaka Nuan, 37 beri meh aku siti tanda. Aku deka ngengkahka bulu bedus ba endur alai ngindik gandum.* Enti bisi ambun ba bulu bedus nya, tang tanah ke ngelingi bulu bedus nya rangkai, nya baru aku nemu Nuan endang deka ngena aku nyelamatka orang Israel, baka ke disemayaka Nuan.” 38 Utai nya lalu amat-amat nyadi. Pagi hari siti, iya dani tumu. Lebuh iya mulaska bulu bedus nya, ai ambun ari bulu bedus nya ulih ngisi siti mangkuk besai. 39 Tang, Gideon madah ngagai Petara ti bendar: “Anang meh ringat ngagai aku. Aku bisi siti da agi peminta. Beri meh aku siti da agi tanda ngena bulu bedus tu. Kali tu, awakka bulu bedus tu rangkai, tang tanah ke ngelingi iya basah laban ambun.” 40 Nya meh utai ke digaga Petara malam nya. Semina bulu bedus nya aja ke rangkai, tang tanah ke ngelingi bulu bedus nya basah magang laban ambun.