Luke

7 Pengudah Jesus tembu nyebut semua utai nya ngagai orang mayuh, iya mupuk ngagai Kapernaum. 2 Ba dia bisi siku pemesai soldadu. Iya bisi siku ulun ti amat dikesayauka iya. Ulun iya nya sakit raya lalu nyauka mati. 3 Lebuh pemesai nya ninga pasal Jesus, iya nganjung sekeda tuai bansa orang Judah betemu enggau Jesus, lalu minta Jesus datai ngeraika ulun iya. 4 Sida datai ngagai Jesus lalu bebendar minta kasih ari iya. Ku sida: “Iya endang layak ditulung nuan, 5 laban iya rinduka bansa kitai lalu udah nirika balai gempuru ba ditu.” 6 Nya alai, Jesus mupuk enggau sida. Tang lebuh iya nyauka datai ba rumah pemesai nya, pemesai nya nganjung bala kaban iya bejaku ngagai Jesus: “Tuan, nuan enda ibuh kiruh datai ke rumah aku. Laban aku enda chukup badas nyambut nuan datai ba rumah aku. 7 Nya alai, aku ngumbai diri enda chukup badas deka datai betemu enggau nuan. Sebut aja, lalu ulun aku tentu deka gerai. 8 Laban aku empu pan bekereja di baruh orang. Lalu aku mega bisi bala soldadu dipegai aku. Lebuh aku ngasuh siku soldadu: ‘Mupuk nuan!’ iya lalu mupuk. Lebuh aku ngasuh siku agi soldadu: ‘Datai kitu!’ iya lalu datai. Lebuh aku ngasuh ulun aku: ‘Kereja tu!’ iya lalu ngereja nya.” 9 Lebuh Jesus ninga nya, iya balat alit ati enggau utai ke dipadahka pemesai nya. Iya malik ngagai orang mayuh ke nitihka iya lalu bejaku: “Aku madah ngagai kita: Aku bedau kala tetemuka pengarap orang ti ngemesai nya, indah ba menua Israel.” 10 Lebuh sida ke dianjung nya pulai ngagai rumah pemesai nya, sida meda ulun nya udah gerai.

11 Enda lama udah nya, Jesus mupuk ngagai nengeri ke dikumbai Nain. Bala murid iya enggau orang mayuh nitihka iya. 12 Lebuh iya nyauka datai ba pintu penama nengeri nya, bisi orang mai bangkai siku lelaki pansut. Lelaki ke mati nya anak tunggal siku indu balu. Mayuh orang ari nengeri nya bisi enggau indu balu nya. 13 Lebuh Tuan Jesus meda indu balu nya, Jesus kasihka iya lalu bejaku ngagai iya: “Badu agi nyabak.” 14 Udah nya, Jesus mansang lalu negu peninduk ke dikena mai bangkai nya. Orang ke ngesan bangkai nya pan ngetu. Ku Jesus madahka: “Anak, aku bejaku ngagai nuan. Angkat nuan!” 15 Lelaki ke mati nya pan duduk lalu belabuh bejaku. Udah nya, Jesus nyerahka lelaki nya ngagai indai iya. 16 Semua orang ba dia alit ati lalu belabuh ngemuliaka Petara. Ku sida: “Siku nabi ke bekuasa udah bisi ba bala kitai, lalu Petara udah kasihka nembiak Iya.” 17 Berita pasal Jesus lalu ngelekai ba serata menua Judea enggau ba serata endur ke ngelingi menua nya.

18 Bala murid John madahka semua utai ke nyadi nya ngagai John. 19 Nya alai, John ngangau dua iku murid iya, lalu ngasuh seduai iya nanya Tuan Jesus munyi tu: “Kati nuan tu Kristus ke dianjung Petara, tauka kami patut nganti orang bukai?” 20 Lebuh seduai iya betemu enggau Jesus, ku seduai iya bejaku: “John Pemaptisa ngasuh kami duai nanya nuan: ‘Kati nuan tu Kristus ke dianjung Petara, tauka kami patut nganti orang bukai?’” 21 Maya nya, Jesus baru udah ngeraika mayuh orang ke enda tentu dapat sereta sida ke sakit raya. Iya mega muru melikat ti jai sereta ngeraika mayuh orang ke buta ngambika sida ulih meda. 22 Ku Jesus nyaut seduai iya: “Mupuk seduai, lalu padahka ngagai John utai ke didinga enggau dipeda seduai. Orang ke buta ulih meda, orang ke pinchat ulih bejalai, orang ke sakit lan* ulih gerai, orang ke bengal ulih ninga, orang ke mati diangkatka idup baru, lalu Berita Manah ditusui ngagai orang ke seranta. 23 Gaga ati meh orang ke enda kakang,* tang arapka aku.”

24 Pengudah murid John mupuk, Jesus lalu belabuh bejaku ngagai orang mayuh pasal John: “Lebuh kita ngagai menua puang, nama utai ke deka dipeda kita? Rumput ti panjai ke beguyat dipuputka ribut? 25 Enti ukai, nama deka dipeda kita deh? Orang ke begari gap? Tang orang ke begari gap sereta kaya-raja diau ba istana. 26 Nyadi kebendar iya, lebuh kita kin, nama utai ke deka dipeda kita? Deka meda siku nabi? Au, iya endang siku nabi. Tang iya besai agi ari nabi. 27 Tu meh utai ke ditulis pasal iya: ‘Aku deka ngasuh siku orang ke mai pesan Aku bejalai dulu ari nuan, lalu iya deka nyediaka jalai ke nuan.’ 28 Aku madah ngagai kita: Ari semua orang ti udah diadaka, nadai siku ke besai agi ari John. Tang orang ke megai penuduk ti pemadu mit dalam Perintah Petara besai agi ari iya.” 29 (Lebuh orang mayuh sereta bala pengumpul chukai ninga nya, sida ngaku Petara endang lurus, laban sida udah dibaptisa John. 30 Tang orang Parisi enggau orang ke landik pasal Adat enda bedulika jaku lalau* ke diberi Petara ngagai sida, laban sida enggai dibaptisa John.)

31 “Enggau sapa aku patut mandingka rebak ke diatu? Sida baka sapa? 32 Sida baka bala anak mit ke duduk ba pasar lalu bekangauka pangan diri: ‘Kami nyepu kesuling ke kita, tang kita enggai betanda; kami bekeduie nyabak, tang kita enda nyabak enggau kami.’ 33 Pia mega, lebuh John Pemaptisa datai, iya enda makai roti tauka ngirup wain. Tang kita madahka: ‘Iya dirasuk melikat ti jai. 34 Lebuh Anak Mensia datai, iya makai sereta ngirup wain. Tang kita madahka: ‘Peda iya nya! Bam sereta udu ngirup wain. Iya bekaban enggau orang ke ngumpul chukai sereta enggau orang ke bedosa.’ 35 Taja pia, penemu-dalam siku-siku orang nyata dipeda ari utai ke dikereja iya.”*

36 Bisi siku orang Parisi suah deka mai Jesus makai enggau iya. Nya alai, iya mansang ngagai rumah orang Parisi nya lalu duduk makai ba mija. 37 Ba nengeri nya bisi siku indu, lalu mayuh orang nemu iya idup dalam dosa. Lebuh indu nya nemu Jesus makai ba rumah orang Parisi nya, iya datai mai sebutul* minyak wangi. 38 Iya besugang semak kaki Jesus ari belakang, nyabak lalu ngemasahka kaki Jesus ngena ai mata iya. Udah nya, iya ngendas kaki Jesus ngena buk iya. Iya mega nyium kaki Jesus lalu nuangka minyak wangi ba kaki Jesus. 39 Lebuh meda nya, orang Parisi ke mai Jesus makai bejaku dalam ati diri: “Enti lelaki tu amat nabi, tentu iya nemu sapa ke negu iya. Kati iya enda nemu indu tu idup dalam dosa?” 40 Tang ku Jesus bejaku ngagai iya: “Simon, bisi utai ka dipadah aku ngagai nuan.” Ku Simon: “Nama utai ke deka dipadahka nuan, Pengajar?”

41 Bisi dua iku orang nginjau duit ari siku lelaki. Siku berutang 500 denari,* lalu siku da agi berutang 50 denari. 42 Lebuh seduai iya enda tebayarka utang diri, lelaki nya muai utang* seduai iya. Nyadi, sapa ari seduai tu deka lebih agi rinduka iya? 43 Ku Simon nyaut: “Ba runding aku, lelaki ke mayuh agi utang.” Jesus madah ngagai iya: “Betul saut nuan nya.” 44 Udah nya, Jesus malik ngagai indu nya lalu bejaku ngagai Simon: “Bisi nuan meda indu tu? Maya aku tama ngagai rumah nuan, nuan enda meri ai kena aku masu kaki. Tang, indu tu masahka kaki aku ngena ai mata iya, lalu ngendas kaki aku ngena buk iya. 45 Maya ngelaluka aku, nuan enda nyium aku. Tang, indu tu enda ngetu-ngetu nyium kaki aku kenyau ari aku tama kitu. 46 Nuan enda nuangka minyak ba pala aku. Tang, indu tu nuangka minyak wangi ba kaki aku. 47 Ketegal nya, aku madah ngagai nuan: Taja pan dosa indu tu mayuh,* dosa iya udah diampun, laban* iya ngayanka mayuh agi pengerindu. Tang lebuh orang ke ngereja mimit aja dosa diampun, sida kurang agi ngayanka pengerindu.” 48 Pengudah nya, iya bejaku ngagai indu nya: “Dosa nuan udah diampun.” 49 Sida ke duduk makai enggau iya ba mija belabuh bejaku enggau pangan diri: “Sapa iya tu ke ulih ngampunka dosa orang?” 50 Tang iya bejaku ngagai indu nya: “Pengarap nuan udah nyelamatka nuan. Mupuk meh nuan. Anang irau.”*