Dua Peter
1 Aku, Simon Peter, siku ulun enggau rasul Jesus Kristus, nulis surat tu ngagai sida ke arapka pemendar ti berega* baka kami, nengah pengelurus Petara kitai enggau Jesus Kristus ti Penyelamat kitai:
2 Ngarapka semua kita bulih mayuh agi pemanah ati ti besai sereta pengelantang, ketegal kita bisi penemu ti betul pasal Petara sereta pasal Tuan kitai, Jesus. 3 Kuasa Petara udah meri kitai semua utai enggau pechuma, kena nulung kitai idup nyembah Petara enggau ati ti enda bebagi, nengah penemu ti betul pasal Iya ke udah ngangauka kitai ngena mulia enggau pemanah Iya. 4 Nengah semua nya, Iya meri kitai semaya ti chukup manah sereta berega enggau pechuma, ngambika kita bulih pemanah Petara pengudah kita ngelepaska diri ari penyai dunya ke datai ari pengingin ti salah.*
5 Ketegal nya kita patut enggau naka ulih meh bebendar ngayanka diri arap, lalu udah nya tambahka pemanah ngagai pengarap kita, lalu ngagai pemanah nya, tambahka penemu. 6 Ngagai penemu kita, tambahka ati ti nemu nagang diri. Ngagai ati ti nemu nagang diri, tambahka ati ti tan. Ngagai ati ti tan, tambahka ati ke enda bebagi nyembah Petara. 7 Ngagai ati ke enda bebagi nyembah Petara, tambahka pengerindu ke pangan diri baka diri menyadi, lalu ngagai pengerindu nya, tambahka pengerindu ke semua orang. 8 Enti semua nya bisi ba kita lalu iya majak nambah-menambah, nya deka nagang kita ari nyadi enda aktif tauka enda mansutka asil bekaul enggau penemu ti betul pasal Tuan kitai, Jesus Kristus.
9 Barang sapa ke kurang semua utai nya, orang ke buta laban iya nutup mata iya ari ke meda penampak,* lalu iya enda ingatka diri udah diberesi ari semua dosa iya ke suba. 10 Nya alai bala menyadi, kita ke nyadi orang ke udah dikangau sereta dipilih, enggau naka ulih meh bebendar agi nentuka diri tetap setia. Enti kita terus ngereja semua nya, kita enda sekali-kali deka ninggalka pengarap. 11 Enggau nya, kita deka diberi jalai penama ti bemulia ke nuju ngagai Perintah ti meruan belama iya, ke diempu Tuan enggau Penyelamat kitai, Jesus Kristus.
12 Nya meh kebuah aku seruran ngingatka kita pasal semua utai nya, taja pan kita udah nemu pasal nya sereta bepegai rat ba pemendar ke udah diterima kita. 13 Tang ba runding aku, seagi-agi aku ba dalam tubuh* tu, aku patut ngingatka kita baru pasal semua utai nya, 14 laban aku nemu enda lama agi aku deka ninggalka tubuh* tu baka ke udah dipadahka Tuan kitai, Jesus Kristus, enggau terang ngagai aku. 15 Aku deka seruran ngingatka kita enggau bebendar, ngambika kita ulih ingatka* semua utai nya kediri empu pengudah aku mupuk.
16 Lebuh kami madahka kita pasal kuasa Tuan Jesus Kristus sereta pasal maya iya pulai baru,* kami enda nusui nya nitihka cherita bula ke ditusui mensia enggau pintar. Tang, kami udah meda mulia iya ngena mata kami empu. 17 Iya udah nerima basa enggau mulia ari Petara ti Apai kitai, lebuh Petara ti bemulia madah ngagai iya: “Tu Anak Aku, ti dikesayauka Aku, lalu Aku Empu gaga ati ke iya.” 18 Au, nya meh jaku ke datai ari langit ke didinga kami lebuh kami enggau iya ba bukit ti kudus.
19 Nya alai, kami majak andalka jaku benabi. Kita manah amat laban kita beratika jaku benabi ke baka nya ke baka lampu kelita ti manchar ba endur ti petang ba dalam ati kita, nyentuk ke hari nyau tawas lalu bintang pagi ayan. 20 Kita nemu utai ti penting tu, iya nya jaku ti benabi ke ba Bup Kudus enda datai ari penemu mensia. 21 Nya ketegal nadai jaku ti benabi ke datai ari peneka mensia, tang mensia nyebut utai ke datai ari Petara lebuh sida diiring kuasa kudus.*