Titus
1 Aku, Paul, siku ulun Petara sereta rasul Jesus Kristus, ke ngembuan pengarap ti sejalai enggau pengarap nembiak ke dipilih Petara. Aku nyadi ulun sereta rasul sejalai enggau penemu ti betul pasal ajar ti bendar ke nunjukka chara nyembah Petara enggau ati ti enda bebagi. 2 Nya bepelasarka semaya ti dianti kitai enggau andal, iya nya pengidup ti meruan belama iya. Kenyau ari kelia menya, Petara ke endang enda nemu bula udah madahka semaya nya. 3 Tang, ba maya ke ditetapka Petara, Petara udah madahka jaku Iya nengah pengawa nginjil ke diserahka ngagai aku ke sejalai enggau pesan Penyelamat kitai, iya nya Petara. 4 Surat tu nuju Titus, ke baka anak aku empu, ke sama arap enggau aku:
Ngarapka nuan bulih pemanah ati ti besai sereta pengelantang ari Petara ti Apai kitai enggau ari Penyelamat kitai, Jesus Kristus.
5 Aku ninggalka nuan ba Krit ngambika nuan ngemetulka utai ti patut dikemetulka lalu milih bala tuai gempuru ba tiap iti nengeri, baka ke udah dipesan aku ngagai nuan: 6 Tuai gempuru patut* bibas ari jaku tuduh, sereta semina bisi siku aja bini. Bala anak iya patut sama arap lalu enda dituduh orang bisi pengidup ti enda menuku* tauka udu ngelaban. 7 Nya ketegal pengurus ke dipilih Petara, iya nya tuai gempuru, patut bibas ari jaku tuduh, enda bekeras enggau penemu diri, enda jampat ringat, ukai orang ke pemabuk, ukai orang ke kasar, sereta enda amu ngulihka penguntung enggau chara ti enda lurus. 8 Tang iya patut rindu ngelaluka orang, rinduka utai ti manah, nemu berunding enggau manah, lurus, tetap ati, sereta nemu nagang diri. 9 Iya patut bepegai rat ba pesan ke tau dikearapka* lebuh ngajar ngena chara ti landik, ngambika iya ulih meransang* orang ngena ajar ti manah* sereta ngerara orang ke ngelaban ajar nya.
10 Nya ketegal mayuh orang rindu ngelaban, nyebut pasal utai ke nadai reti, sereta rindu nipu, kelebih agi sida ke bepegai ba adat besunat.* 11 Nuan patut nagang sida ari bejaku laban sida ngajar utai ke enda patut diajar, lalu majak ngasuh mayuh ruang bilik lenyau pengarap ketegal deka ngulihka untung enggau chara ti enda lurus. 12 Siku nabi ari bala sida empu kala madahka: “Orang Krit selalu bula. Sida baka jelu siga, malas, sereta bam.”
13 Saksi ke dipadahka nya amat. Nya alai, anang ngetu ngerara sida enggau terit ngambika pengarap sida tegap, 14 lalu sida enda beratika ensera* orang Judah tauka pesan ari orang ke limpang ari ajar ti bendar. 15 Semua utai tuchi ba orang ke tuchi. Tang nadai utai ke tuchi ba orang ke enda tuchi sereta enda arap laban runding enggau ati* sida udah kamah. 16 Ba mua orang mayuh, sida ngaku diri ngelala Petara, tang pengawa sida nunjukka sida nulak Iya. Nya ketegal sida orang ti keji, enda ngasi, sereta enda layak ngereja nama-nama pengawa ti manah.