Jaku-Dalam
1 Jaku-dalam Solomon anak David, raja Israel:
2 Jaku-dalam tu ditulis kena meri penemu sereta meri disiplin,
Kena meretika jaku ti ngundan reti ti dalam,
3 Kena ngulihka disiplin ngambika ulih meretika utai enggau dalam,
Ulih ngereja utai ti betul, ulih ngaga pemutus ti manah, sereta ulih ngereja utai enggau adil;
4 Jaku-dalam tu ditulis kena ngasuh orang ke enda bepengalaman nyadi pintar,
Kena nulung orang ke biak ngulihka penemu sereta nemu berunding enggau manah.
5 Orang ke bepenemu deka mending sereta rindu belajar;
Orang ke nemu berunding ngiga iring ti manah,
6 Ngambika ulih meretika sempama enggau jaku ti dalam reti,
Sereta meretika jaku enggau teka-teki* orang ti bepenemu.
7 Nangika Jehovah nya pun penemu.
Semina orang ke beli ngemaruhka penemu-dalam enggau disiplin.
8 Anak, lebuh apai nuan meri nuan disiplin, pendingka iya;
Anang enda ibuhka utai ke diajar indai nuan.
9 Utai ke diajar sida ngagai nuan baka gelung bungai ba pala nuan,
Baka marik ti lawa ba rekung nuan.
10 Anak, lebuh orang ke bedosa mai nuan ngereja utai ti jai, anang nurutka sida.
11 Enti sema sida bejaku munyi tu: “Aram enggau kami;
Aram kitai munuh orang;
Kitai deka belalai, lalu nyerang orang ke nadai penyalah kena ngerinduka ati diri;
12 Baka lubang Kubur,* kitai deka nelan sida idup-idup;
Nelan sida segala-gala baka orang ke dikuburka;
13 Aram kitai ngerampas semua reta sida ti berega!
Kitai deka ngemenuhka rumah kitai enggau reta nya;
14 Aram mupuk enggau kami;
Kitai deka magi bela reta ke udah dichuri kitai!”
15 Anak, anang nitihka sida.
Jauhka diri ari jalai sida.
16 Sida berumban belanda deka ngereja penyai;
Sida enda sabar deka munuh orang.
17 Nadai guna nan pukat ba depan burung enti burung udah meda pukat nya.
18 Nya kebuah orang ke jai enggai ditemu lebuh deka munuh orang;
Sida belalai lebuh deka ngambi nyawa orang.
19 Baka nya meh orang ke jai ngulihka pengaya,
Lalu nya meh ke deka nabanka nyawa sida empu.
20 Penemu-dalam ti bendar ngangau ba sebelah jalai;
Bunyi nyawa iya inggar-seinggar ba sebelah dataran awam.
21 Iya manjung ba sukut jalai ke mayuh orang.
Ba pintu penama kuta, iya madahka:
22 “Kita ke nadai pengalaman, ni maya kita deka badu beli?
Kita ke rindu ngelese, ni maya kita deka badu ngeleseka orang?
Kita ke beli, berapa lama agi kita deka begedika penemu?
23 Pendingka jaku lalau aku,
Lalu aku deka meri nuan kuasa penemu-dalam* aku;
Aku deka nulung nuan meretika jaku aku.
24 Aku ngangauka kita, tang kita enggai mending.
Aku ngunjurka jari aku deka nulung kita, tang kita enda pedulika aku.
25 Kita majak enggai mendingka jaku lalau aku
Sereta nulak jaku rara aku.
26 Aku deka ketawaka kita lebuh kita dituntung penusah;
Aku deka ngeleseka kita lebuh kita dituntung utai ti ngenakutka kita.
27 Utai ti ngenakutka kita deka datai baka kabut;
Penusah kita deka mangka kita baka ribut ti balat.
Au, kita deka dituntung penusah enggau pemerinsa.
28 Maya nya ila, kita deka ngangauka aku, tang aku enggai nyaut;
Kita deka bebendar ngiga aku, tang kita enda tetemuka aku.
29 Nya ketegal kita begedika penemu
Sereta enggai nangika Jehovah.
30 Kita enggai mendingka jaku lalau aku;
Kita nulak semua jaku rara aku.
31 Nya alai, kita deka nerima balas ti setipak enggau pengawa kita,
Lalu kita deka bulih pemedis ketegal pelan kita ti jai.
32 Orang ke nadai pengalaman deka mati ketegal ulah sida ti ngelaban,
Lalu orang ke beli deka punas ketegal ulah sida ti enggai ibuh.
33 Tang orang ke mendingka aku deka diau likun;
Sida enda ibuh takutka penusah.”