Isaiah
14 Jehovah deka kasihka Jakop, lalu Iya deka milih Israel baru. Iya deka ngasuh sida diau ba menua sida empu, lalu orang asing deka datai lalu diau begulai enggau peturun Jakop. 2 Bansa bukai deka mai bansa Israel ngagai menua sida empu. Ba menua Jehovah, orang bansa bukai nya deka nyadi ulun lelaki enggau ulun indu sida. Bansa Israel deka nangkap orang ke kala nangkap sida, lalu sida deka nguasa orang ke kala maksa sida gawa.*
3 Ba hari Jehovah ngelepaska nuan ari pemedis nuan, ari pengirau nuan, sereta ari pengawa ti berat ke dikereja nuan nyadi ulun, 4 nuan deka madahka jaku kelese* tu ngagai raja Babilon:
“Mandur* udah nadai agi!
Pemerinsa udah ngetu!
5 Jehovah udah matahka tungkat orang jai,
Tungkat bala pemerintah,
6 Ke enda ngetu malu orang enggau ati ti ringat,
Ke nguasa bansa-bansa lalu enggai badu merinsaka sida.
7 Serata dunya pan nyau lantang, langsung nadai utai ngachau.
Bala orang manjung gaga ati.
8 Indah pun juniper gaga ati ke nuan,
Pia mega enggau pun sidar ba Lebanon.
Sida madah: ‘Sekumbang nuan ke udah labuh,
Nadai orang datai nebang kami.’
9 Indah Kubur* deh chapuh
Deka nyambut penatai nuan.
Ketegal nuan, semua pemerintah ti kejam ba dunya,
Ke nadai daya ketegal pemati, dani magang.
Semua raja ari mayuh bansa mega angkat ari kerusi diraja sida.
10 Semua sida madah ngagai nuan:
‘Nuan pan udah nyadi lemi baka kami, pia?
Nuan udah nyadi baka kami?
11 Penyumbung nuan udah dibai ke dalam Kubur,*
Pia mega enggau bunyi perengka musik nuan ke betali.
Ulat ngerembai nyadi tilam nuan,
Lalu belut nyadi pua nuan.’
12 Nuan ke manchar baka bintang maya pagi dini hari,
Nuan udah labuh ari langit!
Nuan ke udah ngalahka bansa-bansa,
Nuan udah tumbang ke dunya!
13 Dalam ati nuan madah: ‘Aku deka niki ke langit.
Lalu ngangkatka kerusi diraja aku tinggi agi ari bintang Petara,
Aku deka duduk ba gunung endur alai begempuru,
Ba endur ti pemadu jauh ba utara.
14 Aku deka niki tinggi agi ari remang* ti pemadu tinggi,
Lalu aku deka nyadi baka Iya ti Pemadu Tinggi.’
15 Taja pia, nuan deka dibai ke dalam Kubur,*
Ngagai lubang kubur ti pemadu dalam.
16 Sida ke meda nuan deka merening nuan,
Sida deka bebendar beratika nuan, lalu nanya:
‘Endaka tu orang ke ngusak dunya,
Ke ngasuh mayuh perintah getar-getar,
17 Ke ngasuh dunya nyadi baka menua puang,
Ke nganchurka kuta-kuta ba dunya,
Sereta ke enggai ngelepaska orang ke ditangkap iya?’
18 Semua raja bansa bukai,
Au, semua sida, gali dalam penuh mulia,
Ba kubur diri empu.
19 Tang nuan nadai kubur,
Nuan deka dibuai baka sumbuk* ke dipegedika orang,
Nuan deka dilamun bangkai orang ke dibunuh ngena pedang,
Ke labuh ngagai lubang ti bebatu,
Nuan deka nyadi baka bangkai ke diindik.
20 Nuan enda dikuburka begulai enggau bala raja,
Laban nuan nganchurka menua nuan empu,
Nuan munuh rayat nuan empu.
Nama peturun orang ke jai enda sekali-kali deka disebut agi.
21 Besedia meh deka munuh bala anak lelaki iya
Ketegal penyalah aki ini sida,
Ngambika sida enda angkat lalu nguasa dunya,
Sereta ngemenuhka dunya enggau kuta-kuta sida.”
22 Ku Jehovah, ketuai soldadu serega, madahka: “Aku deka angkat ngelaban sida.”
Ku Jehovah agi: “Aku deka ngemunaska nama Babilon, nyengkaum rayat iya ke agi idup sereta bala anak enggau peturun sida.”
23 Ku Jehovah, ketuai soldadu serega, madahka: “Aku deka ngasuh iya diempu bala landak, lalu ngasuh iya nyadi kawasan paya. Aku deka ngemunaska iya abis lengis.”*
24 Jehovah, ketuai soldadu serega, udah besumpah:
“Utai ke dikinginka Aku deka nyadi,
Lalu utai ke udah diputuska Aku deka dikeamatka.
25 Aku deka nganchurka Asiria ba menua Aku,
Lalu ngindik iya ba gunung-gunung Aku.
Tangkun ke diengkah iya ba sida deka dibuai,
Lalu utai ke diasuh iya san sida deka diambi.”
26 Nya meh utai ke udah diputuska kena ngelaban serata dunya,
Lalu nya meh jari ke besedia deka nyerang semua bansa.
27 Jehovah, ketuai soldadu serega, udah ngaga pemutus.
Sapa ke ulih nginsil pemutus nya?
Jari Iya udah diunjurka.
Sapa ke ulih nagang Iya?
28 Ba taun ti sama Raja Ahas mati, pemutus pechara tu dipadahka:
29 “Orang Pilistia, anang gaga ati,
Taja pan tungkat orang ke malu kita udah patah.
Laban ular ti bisa deka datai ari peturun ular nya,
Lalu peturun ular nya deka mansutka ular ti berachun ke nemu terebai.
30 Lebuh anak tuai orang ke nadai daya benung makai,
Lalu orang ke miskin benung likun gali,
Aku deka ngasuh peturun nuan mati lapar,
Lalu barang sapa ke agi idup deka dibunuh.
31 Nyabak meh pintu penama! Rauh-rauh meh kuta!
O Pilistia, semua kita deka nyadi lemi semengat!
Laban asap deka datai ari utara,
Lalu nadai siku pan ari raban soldadu munsuh ke deka tinggal.”
32 Nama patut dipadahka sida ngagai orang ke mai pesan ari bansa bukai?
Sida deka madahka Jehovah udah ngaga asas Sion,
Lalu nembiak Iya ke nadai daya deka belindung ba dia.