Isaiah
35 Menua puang enggau tanah ti rangkai deka balat gaga ati,
Lalu padang pasir deka balat rindu ati sereta bebungai baka safron.
2 Padang pasir nya tentu deka bebungai,
Lalu iya deka lantang ati sereta manjung gaga ati.
Mulia Lebanon deka diberi ngagai iya,
Nyengkaum pemanah Karmel enggau Saron.
Sida deka meda mulia enggau pemanah Jehovah, Petara kitai.
3 Keringka jari ke lemi,
Lalu teguhka pala patung ke gegutak.
4 Padahka tu ngagai orang ke bisi pengirau ati:
“Anang takut. Kita mesti kering.
Peda! Petara kita empu deka datai malas bala munsuh,
Petara deka ngukum.
Iya deka datai lalu nyelamatka kita.”
5 Maya nya, mata orang ke buta ulih meda,
Lalu pending orang ke bengal ulih ninga.
6 Maya nya, orang ke pinchat deka merejuk baka rusa,
Lalu dilah orang ke bisu deka manjung gaga ati.
Ai deka deras pansut ba menua puang,
Lalu sungai deka mengalir ba padang pasir.
7 Tanah ti angat sereta rangkai deka nyadi kolam ke bisi lalang,
Lalu tanah ti rangkai deka nyadi mata ai.
Ba sarang alai ukui ti siga diau,
Deka tumbuh rumput, lalang, enggau papirus.
8 Ba dia deka bisi jalai besai
Ke dikumbai Jalai ti Kudus.
Orang ke enda tuchi enda nengah jalai nya.
Semina orang ke dikemendarka deka nengah jalai nya;
Nadai orang ke beli ke deka datai kia.
9 Singa nadai ba dia,
Lalu jelu ti siga enda datai kia.
Nadai siku pan jelu nya bisi ba dia;
Semina orang ke udah ditebus deka bejalai ba dia.
10 Orang ke udah ditebus Jehovah deka manjung gaga ati pulai ngagai Sion.
Pengaga ati ti enda nemu abis deka nyadi makota sida.
Pengagit ati enggau ati ti lantang deka diempu sida,
Lalu penusah ati enggau demuh deka nadai agi.