Matthew

20 “Perintah serega baka orang siku ke bempu kebun anggur. Tumu pagi, iya mupuk ngiga orang ke tau digaji iya gawa ba kebun anggur iya. 2 Pengudah iya besetuju deka meri sesingkap duit seling denari* ke gaji sehari, iya lalu ngasuh sida bekereja ba kebun anggur iya. 3 Ba urung pukul semilan pagi,* iya pansut, lalu ba pasar iya tepedaka beberapa iku orang ke bediri ngapa nadai pengawa. 4 Iya lalu bejaku ngagai sida: ‘Alai kita gawa ba kebun anggur aku. Aku deka meri kita gaji ti patut.’ 5 Sida lalu mupuk. Ba urung pukul 12 tengah hari,* enggau urung pukul 3 ngalih hari,* iya pansut lalu ngereja utai ti sama. 6 Pengujung iya, ba urung pukul lima lemai,* iya pansut, lalu tepedaka beberapa iku orang ke bediri ngapa nadai pengawa. Iya nanya sida: ‘Nama kebuah kita sehari-hari bediri ba ditu nadai pengawa?’ 7 Ku sida nyaut: ‘Laban nadai orang ngaji kami gawa.’ Ku iya bejaku ngagai sida: ‘Enti pia, alai kita gawa ba kebun anggur aku.’

8 “Lebuh hari nyau lemai, orang ke bempu kebun anggur nya madah ngagai mandur: ‘Kangauka bala pekereja lalu bayar gaji sida, belabuh ari sida ke pemadu dudi, nyentuk ngagai sida ke pemadu dulu belabuh gawa.’ 9 Lebuh pekereja ke berengkah gawa ari pukul lima lemai* datai, tiap iku sida nerima sesingkap duit seling denari. 10 Lebuh pekereja ke dulu belabuh gawa datai, sida ngumbai diri deka nerima gaji ti besai agi. Tang sida mega diberi sesingkap duit seling denari. 11 Lebuh sida nerima gaji nya, sida lalu mut-mut ngagai orang ke bempu kebun anggur nya. 12 Ku sida: ‘Orang ke pemadu dudi semina bekereja sejam aja, tang nuan udah ngaga gaji sida sebaka enggau gaji kami ke udah bekereja sehari-hari tu natka diri laban panas.’ 13 Ku iya nyaut siku ari sida: ‘Unggal, nadai aku ngakal nuan. Endaka nuan empu ke besetujuka gaji sesingkap duit seling denari? 14 Ambi gaji nuan, lalu pulai. Aku deka meri gaji ngagai pekereja ke pemadu dudi tu sama penyampau enggau gaji nuan. 15 Kati nya salah enti aku deka ngena duit aku sepeneka ati aku? Tauka nuan kepapas* meda aku manah* enggau sida?’ 16 Enggau tu, orang ke dudi deka nyadi dulu, lalu orang ke dulu deka nyadi dudi.”

17 Lebuh Jesus benung ba rantau jalai mansang ngagai Jerusalem, iya mai 12 iku murid iya ke tisi. Ku iya bejaku ngagai sida: 18 “Dinga kita, kitai benung mupuk ngagai Jerusalem. Anak Mensia deka diserahka ngagai bala tuai imam enggau ngagai bala penulis Adat. Sida deka ngasuh iya diukum bunuh. 19 Udah nya, sida deka nyerahka iya ngagai orang bansa bukai. Iya deka dikelese, disipat, lalu dibunuh ba tiang. Tang ba hari ti ketiga, iya deka diidupka baru.”

20 Udah nya, indai bala anak Sebedi datai ngagai Jesus, mai dua iku anak lelaki iya. Iya besugang lalu minta Jesus ngereja siti utai. 21 Jesus nanya iya: “Nama utai dipinta nuan?” Ku indu nya nyaut: “Awakka anak aku dua iku tu, duduk ba sepiak kanan enggau kiba nuan dalam Perintah nuan.” 22 Ku Jesus nyaut: “Seduai enda nemu utai ti dipinta diri. Kati seduai ulih ngirup ari mangkuk* ti deka diirup aku?” Seduai iya lalu nyaut: “Ulih.” 23 Ku Jesus bejaku: “Seduai endang deka ngirup ari mangkuk aku. Tang sapa ke duduk ba sepiak kanan enggau kiba aku, ukai aku ke nentuka nya. Apai aku udah nentuka sapa ke duduk ba dia.”

24 Lebuh 10 iku murid ke bukai ninga nya, sida lalu pedis ati ngagai seduai menyadi nya. 25 Nya alai Jesus ngangauka sida, lalu bejaku: “Kita nemu, bala pemerintah orang bansa bukai enggau bala tuai sida, bekuasa sereta nekan pengidup rayat sida. 26 Tang kita enda tau baka nya. Barang sapa deka nyadi lebih agi ba bala kita, iya patut ngintu kita. 27 Lalu barang sapa ke deka nyadi dulu ba bala kita, iya patut nyadi ulun kita. 28 Laban Anak Mensia datai ukai minta diri diintu, tang iya datai laban deka ngintu orang bukai, lalu nyerahka nyawa diri nyadika tebus ke orang mayuh.”

29 Lebuh sida mupuk ari Jeriko, mayuh amat orang nitihka Jesus. 30 Bisi dua iku orang buta duduk ba tisi jalai. Lebuh seduai iya ninga Jesus mansa, seduai iya lalu ngangau: “Kasihka kami, Tuan, Anak David!” 31 Bala orang mayuh ngerara seduai iya, lalu ngasuh seduai iya badu agi ragak. Tang seduai iya ngangau inggar agi: “Kasihka kami, Tuan, Anak David!” 32 Nya alai, Jesus ngetu lalu ngangauka seduai iya. Ku iya: “Seduai deka aku ngereja nama ke seduai?” 33 Ku seduai iya nyaut: “Tuan, awakka kami duai ulih meda.” 34 Jesus kasihka seduai iya. Iya negu mata seduai iya. Tekala nya, seduai iya ulih meda, lalu nitihka Jesus.