Isaiah
57 Orang ke lurus udah nadai agi,
Tang nadai siku pan orang peduli.
2 Semua orang ke lurus tama ngagai pengelantang.
Semua orang ke bejalai dalam pengelurus, berehat ba peninduk* sida.
3 “Tang peturun indu ke nemu sihir,*
Bala anak orang ke butang* sereta anak pelacur,
Datai semak kitu kita.
4 Sapa ke dikemelika kita?
Sapa ke dikelese sereta dikemilutka kita?
Endaka kita anak orang ke bedosa,
Anak penipu,
5 Ke bisi pengingin seks ti balat ba entara pun kayu ti besai,
Ba baruh tiap iti pun kayu ti subur,
Ke munuh anak diri ba lebak,*
Ba baruh batu ke bisi lubang?
6 Nuan dekaka batu ti lichin ari lebak.
Nya meh utai ke dipilih nuan.
Nuan indah nuangka pemeri wain sereta nyerahka pemeri bukai ngagai sida.
Patut Aku bepuas ati enggau semua utai tu?
7 Ba atas gunung ti tinggi nuan nyediaka peninduk nuan,
Lalu nuan niki kia laban deka nyerahka pemeri.
8 Ba belakang pintu enggau tiang pintu, nuan nirika tanda pengingat.
Nuan ninggalka Aku lalu nelanjaika diri,
Nuan niki lalu ngaga peninduk nuan besai agi.
Nuan ngaga sempekat enggau sida.
Nuan rindu tinduk enggau sida,
Lalu nuan merening ngagai perengka seks lelaki.*
9 Nuan mai minyak enggau mayuh minyak wangi
Betemu enggau Melek.*
Nuan nganjung bala pengari nuan ngagai endur ti jauh,
Ngambika nuan nurun ngagai Kubur.*
10 Nuan udah bebendar nitihka mayuh jalai nuan,
Tang nuan nadai madah: ‘Semua nya lebu ngapa!’
Nuan bulih pengering ti baru.
Nya meh kebuah nuan enda putus asa.*
11 Sapa ke ngasuh nuan balat amat takut,
Nyentukka nuan nyau nyebut utai ti bula?
Nuan enda ingatka Aku.
Nuan enda pedulika utai.
Kati ketegal Aku enda memunyi sereta enda kiruhka pengawa nuan,*
Nya kebuah nuan nyau enda nangika Aku?
12 Aku deka mantaika ‘pengelurus’ nuan enggau pengawa nuan,
Lalu semua nya nadai meri penguntung ngagai nuan.
13 Lebuh nuan ngangau minta tulung,
Patung ke digumpul nuan enda ulih nyelamatka nuan.
Angin deka ngebuka semua sida,
Kesuh seput pan deka ngebuka sida,
Tang orang ke belindung ba Aku deka diau ba menua tu,
Lalu sida deka ngempu gunung Aku ti kudus.
14 Jaku tu deka disebut: ‘Gaga jalai! Sediaka jalai!
Buai nama-nama utai ke nekul jalai bala nembiak Aku.’”
15 Tu meh utai ke dipadahka Petara ti Pemadu Tinggi,
Ke idup belama iya sereta ke ngembuan nama ti kudus:
“Aku diau ba endur ti tinggi sereta kudus,
Tang Aku mega diau enggau orang ke anchur ati sereta orang ke baruh ati,
Ngambika Aku meri pengering ngagai orang ke baruh ati,
Sereta pengelantang ngagai orang ke anchur ati.
16 Aku enda ngelaban sida belama iya
Tauka mengkang ringat ngagai sida,
Laban mensia deka lemi ketegal Aku,
Pia mega enggau utai ti enseput ke udah digaga Aku.
17 Aku ringat ngagai dosa iya ke ngiga penguntung ngena chara ti enda jujur.
Nya alai, Aku ngukum iya, Aku ngelalaika mua Aku, lalu Aku ringat.
Tang iya majak ngelaban, lalu nitihka pengingin ati diri.
18 Aku udah meda jalai iya,
Tang Aku deka ngeraika iya lalu ngiring iya;
Aku deka ngelantangka ati iya enggau orang ke sama tusah ati enggau iya.”
19 Ku Jehovah: “Aku meh ke ngaga jaku puji.
Pengelantang ti enda nemu abis deka diberi ngagai orang ke jauh enggau orang ke semak,
Lalu Aku deka ngeraika sida.
20 Tang orang ke jai baka tasik ke begelumbang ti enda nemu teduh,
Lalu ai iya majak mai rumpai enggau tanah luchak.”
21 Ku Petara aku: “Orang ke jai nadai pengelantang.”