Isaiah
40 “Lantangka, lantangka meh ati bala nembiak Aku,” ku Petara kita.
2 “Bejaku meh enggau chara ti negu* ati Jerusalem.
Padah ngagai iya, timpuh iya wajib gawa udah abis,
Penyalah iya udah abis dibayar.
Semua ukum ketegal semua dosa iya udah diterima iya magang* ari Jehovah.”
3 Siku orang ngangau enggau nyawa ti inggar ba menua puang:
“Sediaka jalai ke Jehovah!
Gaga jalai ti lurus nengah padang pasir ke Petara kitai.
4 Tiap iti lebak patut ditimbuk enggau tanah.
Tiap iti gunung enggau bukit patut digaga nyadi baruh.
Tanah ti kasar patut dirataka,
Lalu tanah ti enda rata nyadi lebak ti rata.
5 Mulia Jehovah deka dipandangka,
Lalu semua mensia deka meda magang,
Laban Jehovah Empu udah bejaku.”
6 Dinga! Bisi orang nyebut: “Padahka!”
Ku siku da agi nanya: “Nama utai ke patut dipadahka aku?”
“Semua mensia baka rumput gadung.
Semua pengerindu sida ti setia baka bungai ba padang.
7 Rumput gadung nyau rangkai,
Lalu bungai nyau layu,
Ketegal dipuput seput Jehovah.
Sigi amat, mensia semina baka rumput gadung.
9 Indu ke mai berita manah ke Sion,
Niki meh ngagai gunung ti tinggi.
Indu ke mai berita manah ke Jerusalem,
Inggarka nyawa nuan enggau pengabis ati.
Inggarka nyawa nuan, anang takut.
Tusui tu ngagai kuta-kuta ba Judah: “Tu meh Petara kita!”
10 Peda! Jehovah, Tuan ti Pemadu Tinggi, deka datai enggau kuasa Iya,
Lalu lengan Iya deka merintah.
Peda! Iya bisi mai upah,
Lalu upah ke deka diberi Iya bisi ba depan Iya.
11 Iya deka nyaga raban bedus Iya baka siku pengibun bedus.
Iya deka ngempuruka anak bedus ngena lengan Iya,
Lalu merap bala anak bedus nya.
Enggau begadai-gadai, Iya deka nguluka indai bedus ke benung nusuka anak.
12 Sapa ke ulih nyukat pemayuh ai ngena tapa jari iya,
Lalu sapa ke ulih nyukat langit ngena sejengkal* jari iya?
Sapa ke ulih ngumpul debu ba dunya ke dalam sarang penyukat
Tauka nimbang gunung ngena penimbang
Sereta nimbang bukit ngena dachin?
13 Sapa ke ulih nyukat* kuasa kudus Jehovah,
Lalu sapa ke ulih nyadi penasihat* Iya ngambika ngajar Iya?
14 Ngagai sapa Iya betanya ngambika Iya ulih meretika utai?
Sapa ke ngajar Iya pasal jalai ti adil?
Sapa ke meri Iya penemu?
Sapa ke nunjukka Iya jalai pasal penemu ti bendar?
15 Peda! Semua bansa baka setitik ai ke neritik ari beledi,
Sereta baka lapisan debu ke ba atas dachin.
Peda! Iya ngangkatka pulau baka ke ngangkatka debu ti alus.
16 Indah semua pun kayu ba Lebanon enda chukup kena nentuka api enda padam,*
Lalu semua jelu ti liar ke ba dia enda chukup dikena nyadika pemeri tunu.
17 Ba depan Iya, semua bansa baka ke enda wujud;
Sida nadai reti sereta enda berega ba Iya.
18 Sapa ke ulih dibandingka kita enggau Petara?
Nama utai ke ulih dikumbai kita sama baka Iya?
19 Orang ke betukang ngaga patung besi,
Tukang besi ngelapis patung nya ngena emas,
Lalu ngaga rantai pirak ke patung nya.
20 Iya milih siti pun kayu nyadika pemeri iya,
Pun kayu ke enda nemu reput.
Iya ngiga siku orang ke landik betukang
Kena ngaga siti patung ke enda ulih labuh.
21 Kati kita enda nemu?
Kati kita nadai kala ninga?
Endaka nya udah dipadahka ngagai kita kenyau ari kelia menya?
Kati kita enda meretika bukti ke udah bisi kenyau ari asas dunya digaga?
22 Petara diau atas dunya ti segala,
Lalu orang ba dunya semina baka buntak.
Iya ngerembaika langit baka kain ti nipis,
Sereta nganchau langit baka langkau kain endur orang diau.
24 Sida baka utai tumbuh ke baru ditanam,
Baka benih ke baru ditabur,
Sereta baka utai tumbuh ke baru beurat ba dalam tanah.
Sida dipuput angin lalu nyadi rangkai,
Sida dikebuka angin baka ampa.
25 “Sapa ke ulih dibandingka kita enggau Aku? Sapa ke sebaka enggau Aku?” ku Petara ti Kudus.
26 “Engkadah ke langit lalu peda meh.
Sapa ke udah ngaga semua bintang nya?
Endaka Iya ke mai sida pansut baka raban soldadu?
Iya ngitung sida siku-siku, lalu ngangauka nama tiap iku sida.
Ketegal Iya bisi kuasa ti luar biasa enggau pengering ti amat besai,*
Nadai siku pan sida lenyau.
27 O Jakop, nama kebuah nuan madah baka tu,
O Israel, nama kebuah nuan bejaku munyi tu:
‘Jalai pengidup aku dilalaika ari Jehovah, Petara enda ibuhka utai ke enda adil ke nyadi ba aku’?
28 Kati nuan enda nemu? Kati nuan nadai kala ninga?
Jehovah ke ngaga semua utai ba dunya; Iya meh Petara belama iya.
Iya enda kala lelak tauka lembut tulang.
Nadai siku pan orang ulih faham utai ke dimeretika Iya.
29 Iya meri tenaga ngagai orang ke lelak
Lalu ngasuh orang ke nadai daya penuh laban pengering.
30 Bala nembiak lelaki deka berasai lelak sereta lemi,
Lalu bala lelaki ke agi biak deka tesangkut lalu labuh,
31 Tang sida ke arapka Jehovah deka bulih pengering baru.
Sida deka terebai tinggi baka ke bisi sayap burung menaul.
Sida deka belanda lalu enda berasai lelak;
Sida deka bejalai lalu enda berasai lemi.”