Kolosi

2 Aku deka kita nemu, aku bebendar amat deka nulung kita, sida ke ba Laudisia, sereta semua orang ke bedau kala betemu enggau aku. 2 Aku deka sida lantang ati sereta diserakupka dalam pengerindu. Enggau nya, sida deka bulih semua pengaya, ketegal sida amat meretika resia ti kudus ari Petara enggau terang. Pia mega ketegal sida bulih penemu ti betul pasal resia ti kudus nya, iya nya Kristus. 3 Semua reta, iya nya pemintar* enggau penemu, dilalaika enggau bejimat ba dalam Kristus. 4 Aku nyebut munyi nya, ngambika nadai orang ulih nipu kita ngena jaku ti manah didinga. 5 Taja pan aku nadai enggau kita, tang ati aku bisi enggau kita. Aku gaga ati meda kita diatur enggau manah sereta tegap ba pengarap kita ngagai Kristus.

6 Nya alai, laban kita udah nerima Tuan Jesus Kristus, terus meh beserakup enggau iya. 7 Baka ke udah diajar ngagai kita, awakka kita beurat, didirika ba atas iya, lalu tegap ba pengarap. Awakka kita mega lebih agi meri terima kasih.

8 Bejimat meh ngambika nadai orang nangkap kita* ngena penemu-dalam dunya sereta jaku ti bula ke nadai reti. Semua nya nitihka adat mensia sereta pekara asas ba dunya, tang enda nitihka ajar Kristus. 9 Nya ketegal Kristus penuh laban semua pemanah Petara. 10 Nyadi, nengah iya, iya nya kepala semua perintah enggau sida ti bekuasa, kita nadai kurang nama-nama. 11 Nengah Kristus, kita udah disunat.* Ukai ngena sunat* ke digaga mensia, tang ngena sunat ti bekaul enggau Kristus, iya nya kita muai pengingin tubuh kita ti bedosa. 12 Nya ketegal kita udah dikuburka sama enggau iya dalam baptisa iya. Nengah iya, kita mega diidupka baru sama enggau iya laban kita arapka pengawa ti bekuasa ke digaga Petara, ke udah ngidupka iya baru ari mati.

13 Kelimpah ari nya, taja pan kita udah mati ketegal penyalah kita sereta ketegal kita enda disunat, Petara ngidupka kita baru sama enggau iya. Petara enggau manah ati ngampunka semua penyalah kitai. 14 Petara madamka Adat ke ngembuan mayuh pesan sereta ke mantaika penyalah kitai. Iya muai Adat nya lebuh Iya mantang Adat nya ba tiang perinsa.* 15 Nengah tiang perinsa nya,* Iya ngalahka bala perintah sereta sida ke bekuasa, lalu mandangka sida ngagai orang mayuh kena nunjukka sida udah dialahka. Iya ngiring sida bejalai bebala mayuh kena nunjukka Iya udah menang.

16 Nya alai, anang nejuka sapa-sapa madah ngagai kita pasal utai ke patut diempa tauka diirup, tauka pasal ngintu siti-siti pengerami, bulan baru, tauka Hari Sabat. 17 Semua nya semina ayuk ari utai ti deka datai, tang pekara ti amat nya Kristus. 18 Anang nejuka sapa-sapa nagang kita ari nerima prais. Orang ke baka nya rindu ngaga diri baruh ati, lalu sida rinduka pengawa besembahka melikat. Sida “bepegai rat”* ba utai ke dipeda sida lalu nyadi sumbung, taja pan nadai kebuah ti manah, laban sida berunding baka mensia ti bedosa. 19 Sida enda nitihka kepala kitai. Nengah kepala nya, tubuh bulih utai ti diguna tubuh nya, lalu semua perengka tubuh ulih bejantil manah. Nengah kepala nya mega, tubuh ulih mansang, lalu Petara meh ke ngasuh tubuh nya mansang.

20 Enti kita udah mati begulai enggau Kristus lalu nulak pekara asas ba dunya, nama kebuah kita agi idup nyadi sebagi ari dunya? Nama kebuah kita majak nunduk nitihka pesan tu: 21 “Anang megai, anang nyepi, tauka anang negu”? 22 Semua nya semina atur enggau ajar ari mensia, ke bekaul enggau pekara ti deka dipunaska pengudah dikena. 23 Taja pan semua nya baka ke ngembuan penemu-dalam, tang nya enda ulih nulung orang ngelaban pengingin ti bedosa. Nya ketegal sida netapka kediri empu chara sida nyembah Petara, ngaga diri baruh ati, sereta balat merinsaka tubuh diri.