John
21 Udah nya, Jesus ngayanka diri baru ngagai bala murid iya ba Danau Tiberias. Tu utai ke nyadi lebuh iya ngayanka diri ngagai sida. 2 Maya nya, Simon Peter, Thomas (ke dikumbai Sapit), Natanel ke datai ari Kana Galili, bala anak Sebedi, enggau dua iku da agi murid Jesus ke bukai, benung begelumu. 3 Simon Peter lalu bejaku ngagai sida: “Aku deka mupuk nangkap ikan.” Sida ke bukai nya lalu bejaku: “Kami ka enggau nuan.” Sida mupuk lalu nepan perau. Tang malam nya sida nadai bulih utai.
4 Lebuh hari nyauka pagi, Jesus bediri ba tebing danau. Tang bala murid nya enda sedar iya nya Jesus. 5 Nya alai, Jesus bejaku ngagai sida: “O anak, bisi utai* diempa kita?” Ku sida nyaut: “Nadai.” 6 Iya lalu bejaku ngagai sida: “Ulurka pukat kita ngagai sepiak kanan perau lalu kita deka bulih ikan.” Sida pan ngulurka pukat nya, lalu bulih mayuh amat ikan nyentukka sida enda tetaritka pukat nya ari ai. 7 Murid ke dikesayauka Jesus lalu bejaku ngagai Peter: “Nya Tuan Jesus!” Maya nya, Simon Peter enda bebaju. Nya alai, lebuh iya ninga orang nya Tuan Jesus, iya ngerasukka gari luar iya lalu terejun ke ai. 8 Tang bala murid ke bukai datai nepan perau mit, lalu ngirit pukat ke penuh enggau ikan. Sida enda jauh, iya nya semina kira-kira 90 meter* ari tebing.
9 Lebuh sida udah datai ba tebing, sida meda ba dia bisi roti, lalu bisi mega beberapa iku ikan benung dipanggang ba atas bara api. 10 Jesus lalu bejaku ngagai sida: “Bai kitu sekeda ikan ke baru diulih kita.” 11 Simon Peter pan nepan perau lalu ngirit pukat ke tebing. Pukat nya penuh laban ikan ti besai, lalu penyampau iya 153 iku. Taja pan ikan nya mayuh amat, tang pukat nya enda charik. 12 Jesus lalu bejaku ngagai sida: “Aram makai.” Nadai siku ari bala murid nya berani nanya: “Sapa nuan?” laban sida nemu iya nya Tuan Jesus. 13 Jesus ngambi roti lalu meri roti nya ngagai sida. Iya mega meri ikan nya ngagai sida. 14 Tu kali ketiga Jesus ngayanka diri ngagai bala murid iya pengudah iya diidupka baru ari mati.
15 Pengudah sida makai, Jesus nanya Simon Peter: “Simon anak John, kati nuan sayauka aku lebih ari semua tu?” Ku Peter nyaut: “Au, Tuan. Nuan nemu aku sayauka nuan.” Nya alai, Jesus bejaku ngagai iya: “Beri makai bala anak bedus aku.” 16 Jesus nanya iya kali kedua: “Simon anak John, kati nuan sayauka aku?” Peter nyaut: “Au, Tuan. Nuan nemu aku sayauka nuan.” Jesus bejaku ngagai iya: “Ibun bala anak bedus aku.” 17 Jesus nanya iya kali ketiga: “Simon anak John, kati nuan sayauka aku?” Peter lalu tusah ati laban Jesus tiga kali nanya iya: “Kati nuan sayauka aku?” Nya alai, Peter nyaut: “Tuan, nuan nemu semua utai. Nuan nemu aku sayauka nuan.” Jesus bejaku ngagai iya: “Beri makai bala anak bedus aku. 18 Enggau bendar aku madah ngagai nuan, lebuh nuan agi biak nuan ngerasukka gari nuan kediri empu lalu bejalai ngagai sebarang endur ke dikedekaka nuan. Tang lebuh nuan nyau tuai, nuan deka ngunjurka jari lalu orang bukai deka ngerasukka gari ba nuan lalu mai nuan ngagai endur ke enggai digagai nuan.” 19 Iya bejaku munyi nya kena nunjukka baka ni Peter deka mati dudi hari kena ngemuliaka Petara. Udah nya, iya bejaku ngagai Peter: “Terus nitihka aku.”
20 Peter nguing lalu meda murid ke dikesayauka Jesus nya benung nitih ari belakang. Lebuh sida makai malam sehari nya, murid nya meh ke nyandih ba Jesus sereta nanya iya: “Tuan, sapa ke deka nyerahka nuan ngagai munsuh?” 21 Lebuh Peter meda iya, Peter nanya Jesus: “Baka ni enggau iya deh, Tuan?” 22 Ku Jesus nyaut: “Enti aku deka iya idup nyentuk ngagai aku datai, nama kaul nya enggau nuan? Tang nuan terus meh nitihka aku.” 23 Nya alai, berita pasal murid nya ke enda mati ngelekai ngagai bala murid ke bukai. Kebendar iya, Jesus ukai madahka iya enda mati. Tang Jesus madahka, “Enti aku deka iya idup nyentuk ngagai aku datai, nama kaul nya enggau nuan?”
24 Iya meh murid Jesus ke meri saksi, lalu nulis semua utai ke nyadi nya. Lalu kitai nemu, saksi ke diberi iya endang amat.
25 Kebendar iya, bisi mayuh agi utai ke dikereja Jesus. Tang ba runding aku, enti semua nya ditulis enggau silik, dunya tu pan enda chukup alai nyimpan semua gulung surat ke ditulis nya.