Pemandang

14 Udah nya, aku meda Anak Bedus bediri ba Bukit Sion enggau 144,000 iku orang. Ba kening sida bisi ditulis nama Anak Bedus enggau nama Apai iya. 2 Aku ninga bunyi ai ti deras enggau bunyi guntur ti inggar datai ari serega. Bunyi ke didinga aku nya baka nyawa bala penyanyi ke belagu sambil nebah belikan.* 3 Sida belagu ba mua kerusi diraja, empat iku melikat, enggau bala tuai. Lagu sida baka ke lagu baru, lalu nadai orang ulih belajarka lagu nya, kelimpah ari 144,000 iku orang nya ke udah dibeli ari dunya. 4 Sida tu meh orang ke enda ngamahka diri enggau bala indu. Kebendar iya, sida baka indu dara. Sida enda ngetu nitihka Anak Bedus enda ngira kini penunga iya. Sida meh ke dibeli ari bala mensia nyadi buah ti keterubah ke diserahka ngagai Petara enggau Anak Bedus. 5 Mulut sida enda bula, lalu sida nadai penimpang.

6 Udah nya, aku meda siku da agi melikat terebai ba tengah langit. Iya bisi Berita Manah ti meruan belama iya ke ditusui ngagai orang ke diau ba dunya ke datai ari tiap iti menua, raban bansa, jaku, enggau bansa. 7 Iya bejaku enggau nyawa ti inggar: “Nangika Petara lalu beri mulia ngagai Iya, laban maya alai Iya ngakim udah datai. Nya alai, sembah meh Iya ke udah ngaga langit, dunya, tasik, enggau pun penatai ai.”*

8 Udah nya, melikat ti kedua datai lalu bejaku: “Iya udah labuh! Babilon ti Besai udah labuh! Iya ngasuh semua bansa ngirup wain iya ke ngasuh sida bisi pengingin ti balat deka ngereja ulah seks ti kamah.”*

9 Udah nya, siku da agi melikat, iya nya melikat ti ketiga datai lalu bejaku enggau nyawa ti inggar: “Barang sapa ke nyembah jelu ti siga nya enggau patung iya, lalu nerima tanda ba kening tauka jari sida, 10 mega deka ngirup wain pengeringat Petara. Wain ti tulin nya deka dituang ngagai mangkuk pengeringat Iya. Ba mua bala melikat ti kudus enggau ba mua Anak Bedus, sida deka diperinsa ngena api enggau merirang. 11 Asap ari api ke dikena merinsaka sida deka niki nyentuk ke belama iya. Siang malam, orang ke nyembah jelu ti siga nya enggau patung iya sereta orang ke nerima tanda nama iya, enda ulih berehat. 12 Ketegal nya, nembiak Petara ti kudus patut tan ati. Sida tu meh orang ke ngasika pesan Petara sereta ke mengkang arapka Jesus.”

13 Aku lalu ninga nyawa bejaku ari serega, “Tuliska utai tu: Berengkah ari diatu, gaga ati meh orang ke udah mati ke beserakup enggau Tuan kitai. Kuasa kudus madahka, sida udah bebendar gawa lalu pengawa sida udah tembu. Awakka sida berehat, laban semua pengawa ke digaga sida seruran dikingatka Petara.”*

14 Udah nya, aku meda remang ti burak, lalu iya ke duduk ba remang nya baka anak mensia. Ba pala iya bisi makota emas lalu jari iya megai sabit ti tajam.

15 Udah nya, siku da agi melikat pansut ari Rumah Sembiang.* Melikat nya bejaku enggau nyawa ti inggar ngagai iya ke duduk ba remang nya: “Biauka sabit nuan lalu berengkah ngetau. Maya alai ngetau udah datai laban utai ke diketau ba dunya udah mansau.” 16 Iya ke duduk ba remang nya pan miauka sabit iya ke dunya, lalu ngetau utai ba dunya.

17 Siku da agi melikat pansut ari Rumah Sembiang ke ba serega. Iya mega bisi sabit ti tajam.

18 Udah nya, siku da agi melikat pansut ari alta lalu iya bekuasa atas api. Iya bejaku enggau nyawa ti inggar ngagai melikat ke bisi sabit ti tajam nya: “Biauka sabit nuan ti tajam, lalu gumpul tangkai anggur ba dunya laban buah anggur udah mansau.” 19 Melikat nya miauka sabit iya ke dunya, lalu ngumpul buah anggur ba dunya. Iya nikauka buah anggur nya ngagai endur ti besai alai nganchurka buah anggur. Endur nya ngambarka pengeringat Petara. 20 Buah anggur nya diindik ba luar nengeri. Darah pan pansut ari endur nganchurka buah anggur nya nyentukka penyauh kira-kira 300 kilometer* sereta ngeninggi kekang kuda.*