Pengulu

8 Udah nya, orang Efraim bejaku ngagai Gideon: “Nama nuan ngaga kami baka tu? Nama kebuah enda ngangauka kami lebuh nyerang orang Midian?” Sida pan balat amat bekelikuh enggau iya. 2 Tang iya nyaut sida: “Mesa ni utai ke digaga aku enti dibandingka enggau utai ke digaga kita? Endaka laluh utai ke diketau raban bansa Efraim manah agi ari anggur ke diketau peturun Abi-eser? 3 Petara udah nyerahka dua iku pegawai orang Midian, iya nya Orep enggau Zep, ngagai kita. Nama utai ke udah dikereja aku ti tau dibandingka enggau nya?” Lebuh iya bejaku munyi nya, sida pan badu agi ringat.

4 Udah nya, Gideon enggau 300 iku soldadu iya datai ba Sungai Jordan lalu sida meraka sungai nya. Sida majak begagaika bala munsuh taja pan sida lelak. 5 Lebuh datai ba Sukot, Gideon pan madah ngagai orang ke diau ba dia: “Beri meh roti ngagai bala aku, laban sida udah lelak lalu aku benung begagaika raja orang Midian, iya nya Zebah enggau Zalmuna.” 6 Tang, bala pegawai Sukot nyaut iya: “Nama kebuah kami patut meri roti ngagai bala soldadu nuan? Udah tangkap kita Zebah enggau Zalmuna, pia?” 7 Ku Gideon nyaut: “Enti pia, lebuh Jehovah nyerahka Zebah enggau Zalmuna ngagai aku, aku deka nyipat kita ngena duri ari menua puang.” 8 Gideon pan neruska pejalai iya ngagai Penuel lalu minta utai ti sama. Tang, orang ba Penuel meri saut ti sama baka ke dipadahka orang ba Sukot. 9 Nya alai, Gideon madah ngagai orang ba Penuel: “Lebuh aku pulai kitu pengudah aku menang, aku deka ngeruntuhka menara tu.”

10 Maya nya, Zebah enggau Zalmuna bisi ba Karkor enggau kira-kira 15,000 iku soldadu seduai iya. Nya meh soldadu orang ari Timur ke agi tinggal, laban 120,000 iku soldadu ke bukai ke bisi pedang udah dibunuh magang. 11 Gideon neruska pejalai iya nengah jalai ke biasa ditengah orang ke diau ba langkau kain, iya nya jalai ke ba timur Nobah enggau Jogbehah. Udah nya, iya ngenyit nyerang kem bala munsuh ke benung enda ngadang. 12 Zebah enggau Zalmuna pan ngerarika diri. Tang, Gideon ngagai lalu nangkap dua iku raja orang Midian nya, lalu bala soldadu ba kem nya begau magang.

13 Udah nya, maya Gideon anak Joas pulai beperang, iya nengah jalai ke niki ngagai Heres. 14 Ba rantau jalai, iya nangkap lalu nasat siku lelaki ke agi biak ari Sukot. Lelaki nya pan nulis ke iya nama 77 iku bala pegawai enggau bala tuai orang Sukot. 15 Gideon lalu mansang ngagai orang Sukot lalu madahka: “Tu Zebah enggau Zalmuna. Sehari nya kita ngeleseka aku: ‘Nama kebuah kami patut meri roti ngagai bala soldadu nuan? Udah tangkap kita Zebah enggau Zalmuna, pia?’” 16 Udah nya, iya nangkap bala tuai kuta nya, lalu nyipat sida ngena duri ari menua puang ngambika sida jera. 17 Iya mega ngeruntuhka menara ba kuta Penuel, lalu munuh bala lelaki ba kuta nya.

18 Udah nya, Gideon nanya Zebah enggau Zalmuna: “Orang ke baka ni ke dibunuh seduai ba Tabor?” Ku seduai iya nyaut: “Sida baka nuan. Tiap iku sida baka anak lelaki raja.” 19 Ku Gideon madahka: “Sida nya bala menyadi aku, bala anak indai aku. Aku besumpah atas nama Jehovah, Petara ti idup, enti seduai ngelepaska sida maya nya, enda aku munuh seduai.” 20 Udah nya, iya madah ngagai Jeter, anak iya ke tuai: “Angkat nuan lalu bunuh seduai iya.” Tang Jeter enda nyintak pedang iya. Iya takut, laban iya agi biak. 21 Zebah enggau Zalmuna pan madah ngagai Gideon: “Enti nuan amat lelaki ti kering, nuan empu meh munuh kami.” Gideon pan angkat lalu munuh Zebah enggau Zalmuna. Udah nya, Gideon ngambi barang kemas ke bentuk bulan sabit ari rekung unta seduai iya.

22 Orang Israel pan madah ngagai Gideon: “Kami deka nuan nyadi pemerintah kami, nyengkaum anak nuan enggau uchu nuan, laban nuan udah nyelamatka kami ari orang Midian.” 23 Tang Gideon nyaut sida: “Enggai aku nyadi pemerintah kita. Anak aku mega enda merintah kita. Jehovah Empu ke deka merintah kita.” 24 Ku Gideon nampung baru: “Tang awakka aku minta siti utai ari kita. Beri ngagai aku antin idung ke dirampas tiap iku kita ari bala munsuh.” (Munsuh sida bisi antin idung ke digaga ari emas, laban sida iya orang Ismail.) 25 Ku orang Israel nyaut: “Kami deka meri antin nya ngagai nuan.” Sida pan lalu nganchau siti baju jubah, lalu tiap iku sida muai antin ke dirampas sida ba dia. 26 Pemerat antin idung ke dipinta Gideon bisi lebih ari 19 kilogram,* enda nyengkaum barang kemas ke bentuk bulan sabit, antin, gari ungu ke digaga ari bulu bedus ke dikena bala raja Midian, enggau tenggak unta sida.

27 Udah nya, Gideon ngaga epod ngena emas nya, lalu mandangka epod nya ba kuta iya ba Oprah. Semua orang Israel lalu berengkah nyembah epod nya,* lalu nya mai penanggul ngagai Gideon enggau ruang bilik iya.

28 Baka nya meh chara orang Israel ngalahka orang Midian, lalu orang Midian enda berani agi ngelaban orang Israel. Orang ke diau ba menua nya lalu idup lantang pengelama 40 taun maya jeman Gideon.

29 Jerubaal anak Joas pan pulai ke rumah iya lalu diau ba dia.

30 Gideon bisi 70 iku anak lelaki, laban iya bisi mayuh bini. 31 Bini iya ba Shikem mega ngadaka siku anak lelaki, lalu anak nya diberi nama Abimelek. 32 Gideon anak Joas idup lantang nyentukka iya mati maya umur iya nyau tuai amat. Iya dikuburka ba kubur apai iya Joas, ba Oprah, kuta orang Abi-eser.

33 Pengudah Gideon mati, orang Israel lalu nyembah Baal* baru. Sida milih Baal-berit nyadika petara sida. 34 Orang Israel enda ingatka Petara sida, Jehovah, ke udah ngelepaska sida ari semua munsuh ke ngelingi sida. 35 Sida mega enda ngayanka pengerindu ti setia ngagai ruang bilik Jerubaal, iya nya Gideon, taja pan iya udah ngereja semua utai ti manah ke orang Israel.