Ulang Adat
30 “Lebuh Jehovah, Petara kita, ngachirka kita ngagai bansa bukai, lalu semua berekat enggau penulah ke dipadahka aku ngagai kita udah nyadi ba kita, lalu kita teingatka semua nya, 2 lalu kita enggau bala peturun kita pulai baru ngagai Jehovah, Petara kita, enggau pengabis ati kita sereta enggau pengabis pengidup kita, lalu nitihka semua pesan Iya ke dipadahka aku ngagai kita seharitu, 3 Jehovah, Petara kita, deka mai kita pulai baru ari nyadi orang tangkap. Jehovah, Petara kita, mega deka kasihka kita lalu ngempuruka kita baru ari semua endur alai Iya udah ngachirka kita. 4 Taja pan kita ngachir sampai ke ujung dunya, Jehovah, Petara kita, deka ngempuruka kita lalu mai kita pulai baru. 5 Jehovah, Petara kita, deka mai kita ngagai menua ke diempu aki ini kita suba, lalu kita deka ngempu menua nya baru. Iya deka ngasuh kita idup lantang, lalu ngasuh penyampau kita mayuh agi ari penyampau aki ini kita. 6 Jehovah, Petara kita, deka ngasuh ati kita enggau ati bala peturun kita nyadi tuchi. Enggau nya, kita deka rinduka Jehovah, Petara kita, enggau pengabis ati kita sereta enggau pengabis pengidup kita, lalu kita deka mengkang idup. 7 Udah nya, Jehovah, Petara kita, deka ngasuh semua penulah nya ninggang bala munsuh kita ke begedi sereta merinsaka kita.
8 “Kita deka pulai baru ngagai Jehovah, mendingka Iya, sereta nitihka semua pesan Iya ke dipadahka aku ngagai kita seharitu. 9 Jehovah, Petara kita, deka ngenataika mayuh berekat ngagai semua utai ke dikereja kita. Iya deka ngasuh bala peturun kita, jelu tupi, enggau asil utai ke ditanam kita nyadi mayuh. Sekali agi, Jehovah deka gaga ati ngasuh kita idup lantang, baka Iya ke gaga ati ngasuh aki ini kita idup lantang. 10 Kita mesti mending lalu nitihka semua pesan enggau adat Jehovah ke ditulis dalam bup Adat tu. Kita mesti pulai baru ngagai Jehovah, Petara kita, enggau pengabis ati kita sereta enggau pengabis pengidup kita.
11 “Pesan ke dipadahka aku ngagai kita seharitu, enda kelalu tusah dimeretika sereta enda kelalu tusah dititihka.* 12 Pesan nya ukai ba langit din. Nya alai kita enda ibuh nanya: ‘Sapa deka niki ke atas lalu mai iya nurun ngagai kitai, ngambika kitai ulih ninga iya lalu ngasika iya?’ 13 Pesan nya mega ukai ba seberai tasik. Nya alai kita enda ibuh nanya: ‘Sapa deka ngelayang tasik lalu mai iya ngagai kitai, ngambika kitai ulih ninga iya lalu ngasika iya?’ 14 Pesan nya amat semak enggau kita, iya nya bisi ba mulut enggau ba ati kita empu ngambika kita ulih nitihka iya.
15 “Seharitu, aku meri kita dua pilihan, iya nya milih entara berekat enggau pengidup tauka penulah enggau pemati. 16 Enti kita mendingka pesan Jehovah, Petara kita, ke dipadahka aku ngagai kita seharitu, iya nya rinduka Jehovah, idup nitihka jalai Iya, nitihka pesan, atur, enggau adat Iya, kita deka mengkang idup lalu penyampau kita deka nyadi mayuh. Jehovah, Petara kita, deka merekatka kita ba menua ke deka diempu kita.
17 “Tang enti ati kita jauh ari Petara, enggai mendingka pesan Iya, lalu tetarit ati deka nyembah sereta besugang ngagai petara bukai, 18 kita tentu deka dipunaska. Kita enda ulih idup lama ba menua ke deka diempu kita ba seberai Sungai Jordan. 19 Aku udah meri kita dua pilihan, iya nya milih entara berekat enggau pengidup tauka penulah enggau pemati. Langit enggau dunya deka nyadi saksi atas utai ke dikereja kita. Kita enggau bala peturun kita patut milih pengidup ngambika kita ulih mengkang idup. 20 Kita mesti rinduka Jehovah, Petara kita, ngasika pesan Iya, sereta mengkang setia ngagai Iya, laban Jehovah meri kita pengidup lalu Iya ulih ngasuh kita idup lama ba menua ti disemayaka Iya ngagai aki ini kita, iya nya Abraham, Isak, enggau Jakop.”