Jaku-Dalam
22 Manah agi milih nama* ti manah ari ke milih reta ti belimpah;
Dipebasa manah agi ari pirak enggau emas.
2 Bisi siti utai ti sama entara orang kaya enggau orang miskin:
Sida bela digaga Jehovah.
3 Orang ke pintar belalai lebuh meda bahaya,
Tang orang ke nadai pengalaman deka terus bejalai lalu merinsa ketegal nya.
4 Orang ke baruh ati sereta nangika Jehovah
Deka bulih pengaya, basa, enggau pengidup.
5 Jalai orang ti jai penuh laban duri enggau panjuk,
Tang orang ke sayauka nyawa diri deka ngenyauhka diri ari semua nya.
6 Ajar meh anak* jalai ke patut ditengah iya;
Lebuh iya udah tuai pan iya tetap enda limpang ari jalai nya.
7 Orang ke kaya nguasa orang ke miskin,
Lalu orang ke nginjau nyadi ulun orang ke nyali.
8 Orang ke nanam utai ti enda lurus deka ngetau penusah,
Lalu tungkat ke dikena iya ngukum orang lebuh iya ringat deka dipatahka.
9 Orang ke gerah jari deka diberekat,
Laban iya bekunsika pemakai iya enggau orang miskin.
10 Buru meh orang ke rindu ngelese.
Enggau nya, penyarut deka nadai agi;
Laya enggau jaku kelese mega deka nadai agi.
11 Orang ke rinduka ati ti tuchi sereta ke ngena jaku ti lembut
Deka nyadi kaban raja.
12 Mata Jehovah nyaga penemu,
Tang Iya deka ngalahka jaku orang ke pintar nipu.
13 Orang ke ngelusu madah: “Bisi singa ba luar!
Mati aku legi dibunuh iya ba tengah jalai!”
14 Mulut indu ke kamah ulah* baka lubang ti dalam.
Orang ke dikutuk Jehovah deka labuh ke dalam lubang nya.
16 Barang sapa ke nambahka pengaya diri enggau chara nipu orang miskin,
Lalu barang sapa ke meri hadiah ngagai orang kaya
Pengujung iya deka nyadi miskin.
17 Pendingka enggau bejimat utai ke disebut orang ke bepenemu-dalam,
Ngambika nuan ulih nyimpan utai ke diajar aku dalam ati nuan.
18 Enti nuan nyimpan utai ke diajar aku dalam ati nuan, nuan deka gaga ati,
Lalu nuan deka seruran bejaku pasal utai nya.
19 Seharitu, aku meri nuan penemu,
Ngambika nuan yakin ngagai Jehovah.
20 Aku udah nulis ke nuan
Jaku ajar enggau penemu ke deka dipadahka aku,
21 Kena ngajar nuan jaku ti amat sereta ulih dikearapka,
Ngambika nuan ulih pulai lalu meri saut ti betul ngagai orang ke nganjung nuan.
22 Anang ngerumpak orang ke miskin ketegal iya miskin,
Lalu anang nekan orang ke baruh pendiau ba pintu kuta,*
23 Laban Jehovah Empu deka ngarika sida,
Lalu Iya deka ngambi nyawa orang ke nipu sida.
24 Anang bekaban enggau orang ke jampat ringat
Tauka begulai enggau orang ke jampat pedis ati,
25 Ngambika nuan enda nitihka jalai sida
Lalu manjuk diri empu.
26 Anang nyadi orang ke betabi jari sereta setuju
Deka nyadi penjamin utang orang bukai.
27 Enti nuan enda tebayarka utang nya,
Peninduk nuan pan deka dirampas.
28 Anang mindahka kelai sempadan tanah kelia menya
Ke udah ditetapka aki ini kita.
29 Kati nuan bisi meda orang ke landik gawa?
Iya deka gawa ke raja,
Ukai gawa ke orang biasa.