Dua Korint
1 Aku, Paul, ke nyadi rasul Jesus Kristus, sejalai enggau peneka Petara, enggau menyadi kitai, Timoti, nulis surat tu ngagai raban gempuru* Petara ba Korint. Surat tu mega ditujuka ngagai semua nembiak Petara ti kudus ba serata Akaya:
2 Ngarapka semua kita bulih pengelantang sereta pemanah ati ti besai ari Petara ti Apai kitai sereta ari Tuan Jesus Kristus.
3 Puji ke Petara sereta Apai Tuan kitai, Jesus Kristus. Iya Apai ti penuh enggau pengasih sereta Petara ti ngelantangka ati kitai dalam semua pekara. 4 Petara ngelantangka ati* kitai lebuh kitai napi semua macham penguji,* lalu ketegal pengelantang ke diterima kitai ari Iya, kitai mega ulih ngelantangka ati orang bukai ke napi semua macham penguji.* 5 Sama baka kitai ke napi mayuh pemerinsa ketegal nyadi murid Kristus, kitai mega bulih mayuh pengelantang nengah Kristus. 6 Kami napi penguji,* ngambika kita bulih pengelantang enggau pengelepas. Kami bulih pengelantang, ngambika kita mega bulih pengelantang. Nya deka nulung kita betan lebuh napi pemerinsa baka ke ditapi kami. 7 Kami pechaya amat ke kita, laban kami nemu lebuh kita napi pemerinsa baka kami, kita mega deka bulih pengelantang baka kami.
8 Bala menyadi, kami deka kita nemu pasal pemerinsa ke ditapi kami ba Asia.* Pemerinsa ke ditapi kami balat amat, nyentukka kami enda ulih napi nya kediri. Kami enda nemu sekalika kami ulih idup tauka enda. 9 Kami indah ngasaika diri baka ke deka diukum mati. Tang utai nya nyadi ngambika kami pechayaka Petara ke ulih ngidupka orang mati, ukai pechayaka diri empu. 10 Iya udah nyelamatka kami ari utai ke tau nabanka nyawa kami, lalu Iya agi deka nyelamatka kami. Kami mega pechaya Iya deka nyelamatka kami dudi hari. 11 Kita mega ulih bebendar besampika kami kena nulung kami. Enti mayuh orang besampi, Petara deka nyaut sampi nya. Enggau nya, mayuh orang deka ngarika kami besampi meri terima kasih ke tulung ti diterima kami.
12 Kami bisi ati* ti beresi laban lebuh begulai enggau orang ba dunya, kelebih agi enggau bala kita, kami idup enggau kudus sereta enda pura-pura. Kelimpah ari nya, kami enda idup nitihka penemu-dalam dunya, tang nitihka pemanah ati Petara ti besai. Kami temegahka semua nya. 13 Kebendar nya, kami semina nulis ngagai kita pasal pekara ke ulih dibacha* sereta dimeretika kita. Aku ngarapka kita amat-amat meretika semua pekara tu.* 14 Sekeda ari kita udah nemu, kami meh ke ngasuh kita temegah ati, sama baka kita ke ngasuh kami temegah ati ba hari Tuan kitai, Jesus.
15 Ketegal aku andalka nya, aku berunding deka datai ngagai kita dulu, ngambika kita gaga ati kali kedua.* 16 Aku berunding deka nemuai ngagai kita lebuh bejalai mansang ngagai Masedonia, lalu pengudah pulai ari Masedonia, aku deka nemuai baru ngagai kita. Udah nya, kita ulih nganjung aku setengah jalai ngagai Judea. 17 Lebuh aku ngatur pelan nya, kati aku ngumbai nya pekara ti mit? Kati aku sekejap nyebut “Au,” lalu sekejap nyebut “Enda,” ketegal aku berundingka penguntung diri empu lebuh aku ngatur pelan nya? 18 Baka Petara ke ulih dikearapka, jaku kami mega ulih dikearapka. Kami enda nyebut “Au” tang udah nya, nyebut “Enda.” 19 Nya ketegal Anak Petara, iya nya Jesus Kristus, ke dipadahka Silvanus,* Timoti, enggau aku empu ngagai kita, enda kala nyebut “au” tang udah nya, nyebut “enda.” Enti iya nyebut “au,” “au” meh nya. 20 Enda ngira ni pemayuh semaya Petara, semua nya udah nyadi “au” nengah iya. Nya alai, nengah iya mega, kitai nyebut “Amin” ngagai Petara, ngambika Petara dimuliaka. 21 Tang Petara meh ke ngesahka kita enggau kami endang enggi Kristus. Iya meh ke udah milih* kitai. 22 Iya mega udah ngengkahka tanda* Iya ba kitai. Tanda nya kuasa kudus* ke bisi dalam ati kitai, ke nyadi jamin* utai ti deka datai.
23 Aku bedau datai ngagai Korint, laban aku enggai kita majak agi tusah ati. Petara meh ke nyadi saksi pasal nya. 24 Kami ukai tuan atas pengarap kita, laban kita ulih bediri tegap ketegal kita empu ke arap, tang kami semina bala ke sama gawa enggau kita ngambika kita gaga ati.