Dua Korint
11 Aku ngarapka semua kita sabar enggau aku lebuh aku enda entu nemu berunding enggau manah. Kebendar iya, kita endang sabar enggau aku. 2 Baka Petara ke balat ibuhka kita, aku mega balat ibuhka kita. Nya ketegal aku empu udah besemaya ngambika kita jadi enggau siku lelaki, iya nya Kristus. Lalu aku deka nyerahka kita nyadi anak dara ti tuchi ngagai iya. 3 Tang aku irau enggaika runding kita ditesatka, baka Awa ke dipanjuk ular ke pintar nipu. Nya deka ngasuh kita nyadi enda tuchi sereta nadai pengerindu ti bendar ngagai Kristus. 4 Aku nyebut munyi nya, laban enti orang datai nusui pasal Jesus ti bukai, ke enda sama enggau Jesus ke ditusui kami, kita senang nerima utai ku orang nya. Kita senang nerima runding enggau ulah* ke enda sama enggau ke udah dikembuan kita. Kita mega senang nerima berita manah ke enda sama enggau ke udah diterima kita. 5 Ba aku, nadai siti pan utai ke nunjukka aku tu kurang ari bala rasul kita ke balat “manah” nya. 6 Taja pan aku enda landik bejaku, tang aku bepenemu. Kebendar iya, kami udah nunjukka penemu nya enggau terang ngagai kita dalam semua pekara ngena semua chara.
7 Kati aku bedosa, laban aku ngemaruhka diri ngambika kita ulih ditinggika? Kati aku bedosa, laban aku nusui Berita Manah pasal Petara ngagai kita enggau ati ti gaga sereta nadai nerima bayar ari kita? 8 Aku baka ke ngerumpak raban gempuru ke bukai, laban aku nerima bantu ari sida ngambika ulih ngereja pengawa ke kita. 9 Indah lebuh aku enggau kita lalu begunaka utai, aku enda nating sapa-sapa, laban bala menyadi ke datai ari Masedonia udah meri utai ke diguna aku enggau chukup mayuh. Aku deka enggau naka ulih ngiga chara kena nentuka diri enda nating kita, lalu aku deka terus ngereja nya. 10 Seagi-agi aku nyadi murid Kristus, nadai utai ke ulih nagang aku ari temegahka pekara nya ba serata Akaya. 11 Nama kebuah aku enda nating kita? Kati aku enda rinduka kita? Petara nemu aku rinduka kita.
12 Bisi sekeda orang ke bejaku begah, lalu madahka diri rasul baka kami. Nya alai, aku deka terus ngereja utai ke digaga aku ngelama tu, ngambika sida nadai kebuah deka bejaku begah. 13 Orang ke baka nya rasul ti pelesu. Sida nipu orang, lalu nyaru diri nyadi rasul Kristus. 14 Kebendar iya, pekara nya enda ngasuh kitai iran, laban Sitan empu terus nyaru diri nyadi melikat penampak. 15 Nya alai, aku enda iran enti bala ulun Sitan mega terus nyaru diri nyadi bala ulun ke ngereja utai ti lurus. Tang pengujung iya, utai ke deka nyadi ngagai sida deka setipak enggau pengawa sida.
16 Sekali agi aku madahka: Awakka nadai orang ngumbai aku enda entu nemu berunding enggau manah. Tang enti kita agi ngumbai aku baka nya, anang meh badu nerima aku ke enda entu nemu berunding tu, ngambika aku tau temegah mimit. 17 Utai ke disebut aku diatu, ukai nitihka teladan Tuan kitai. Tang aku bejaku baka orang ke enda entu nemu berunding enggau manah, ke bejaku begah sereta kelalu andalka diri empu. 18 Ketegal mayuh orang temegahka utai ba dunya, aku pan deka temegahka utai nya. 19 Laban kita amat “nemu berunding,” kita tentu sanggup sabar enggau orang ke enda entu nemu berunding enggau manah. 20 Kebendar iya, kita sabar lalu nejuka orang ngaga kita nyadi ulun, ngambi ulih ari kita, ngerampas utai ke dikemisi kita, ngeninggika diri lalu ngemaruhka kita, tauka nampar mua kita.
21 Kami malu nyebut nya laban nya nunjukka kami baka ke lemi.
Tang diatu, aku bejaku baka orang ke enda nemu berunding. Enti orang bukai berani, aku pan berani. 22 Kati sida orang Hebrew? Aku pan orang Hebrew. Kati sida orang Israel? Aku pan orang Israel. Kati sida peturun Abraham? Aku pan peturun Abraham. 23 Kati sida ulun Kristus? Aku baka orang gila madahka diri ulun ke manah agi ari sida: Aku ngereja mayuh agi pengawa lalu aku suah agi dijil. Penyuah aku dipalu enda alah itung, lalu beberapa kali aku nyauka mati. 24 Lima kali aku dipalu orang Judah. Tiap kali aku dipalu 39 kali. 25 Tiga kali aku dipalu ngena kayu, lalu bisi sekali aku dituku ngena batu. Tiga kali kapal ke ditepan aku karam, lalu aku kala anyut ba tasik sehari semalam. 26 Aku suah bejalai, lalu nyauka bebadi ba sungai. Aku nyauka bebadi laban perumpak, laban bansa aku empu, laban bansa bukai sereta laban bala menyadi ti pelesu. Aku nyauka bebadi ba nengeri, ba menua puang, enggau ba tasik. 27 Aku bagas sereta enda ngetu gawa, suah enda tinduk malam, lapar sereta aus, suah nadai pemakai, chelap sereta enda chukup gari.*
28 Kelimpah ari semua penusah nya, ninting hari aku balat irauka semua raban gempuru. 29 Aku lemi enti orang lemi. Aku pedis ati enti orang labuh ba pengarap.
30 Enti aku patut temegah, aku deka temegah pasal utai ke nunjukka aku lemi. 31 Petara, iya nya Apai Tuan Jesus, ke patut dipuji belama iya, nemu aku enda bula. 32 Lebuh aku ba Damaskus, gabenor ke bekereja ba baruh Raja Aretas nyaga nengeri nya laban deka nangkap aku. 33 Tang aku diulurka ngena bakul nengah jenila ba dinding kuta nengeri nya, lalu aku mujur ngerarika diri ari iya.