Penyampau

20 Ba bulan ti keterubah, semua orang Israel datai ba menua puang Zin, lalu sida nirika kem ba Kades. Ba dia meh Miriam mati lalu dikuburka.

2 Endur nya nadai ai. Nya alai, orang Israel begelumu lalu angkat ngelaban Moses seduai Aron. 3 Ku sida iya mutap ngagai Moses: “Manah agi kami mati begulai enggau bala menyadi kami ke dibunuh Jehovah! 4 Nama kebuah nuan mai nembiak Jehovah ngagai menua puang tu? Nuan ka kami enggau jelu tupi kami mati ba ditu, pia? 5 Nama kebuah nuan mai kami pansut ari menua Ejip, lalu mai kami ngagai endur ke enda manah tu? Ukai nya bisi alai kami nanam utai. Ni kami ulih nanam buah ara, buah anggur, tauka buah delima ba ditu! Ai ke diirup pan nadai!” 6 Moses enggau Aron pan mupuk ari nya, lalu mansang ngagai pintu penama langkau gempuru. Seduai iya nyungkurka diri ke tanah, lalu mulia Jehovah pan ayan.

7 Udah nya, Jehovah bejaku ngagai Moses: 8 “Ambi tungkat nuan. Nuan enggau menyadi nuan, Aron, mesti ngempuruka semua orang Israel. Ba depan semua sida, bejaku meh ngagai batu ke bisi ba dia lalu ai deka pansut ari batu nya. Udah nya, beri meh orang Israel enggau jelu tupi sida ai irup.”

9 Nyadi, Moses pan ngambi tungkat iya ba depan Jehovah, baka ke udah dipadahka Petara ngagai iya. 10 Udah nya, Moses enggau Aron ngasuh orang Israel begempuru ba depan batu. Ku Moses madah ngagai sida: “Dinga kita, kita ke udu ngelaban! Patut kami mansutka ai ari batu tu ke kita?” 11 Moses pan ngangkatka tungkat iya lalu malu batu nya ngena tungkat iya dua kali. Mayuh amat ai pansut ari batu nya, lalu semua orang Israel enggau jelu tupi sida bela ngirup ai nya.

12 Tang ku Jehovah bejaku ngagai Moses enggau Aron: “Seduai enda tau mai orang Israel ngagai menua ke deka diberi Aku ngagai sida, laban seduai enda arapka Aku sereta enda ngemuliaka Aku ba depan sida.” 13 Utai nya nyadi ba mata ai Meribah.* Ba dia meh orang Israel mutap ngelaban Jehovah, lalu ba dia meh Iya ngemuliaka Diri ba depan sida.

14 Udah nya, Moses nganjung beberapa iku orang ari Kades betemu enggau raja Edom. Ku sida iya: “Tu utai ke dipadahka menyadi nuan, Israel: ‘Nuan nemu amat semua pemerinsa ke ditapi kami. 15 Suba, aki ini kami ngagai menua Ejip lalu diau ba dia betaun-taun. Kami enggau bala aki ini kami balat diperinsa orang Ejip. 16 Nya alai, kami ngangauka Jehovah minta tulung. Iya mendingka kami, lalu nganjung siku melikat ngambika mai kami pansut ari menua Ejip. Diatu, kami ba Kades, iya nya kuta ke ba sempadan menua nuan. 17 Kami minta nuan ngemendarka kami nengah menua nuan. Kami enda nengah ladang tauka kebun anggur, lalu kami mega enda ngirup ai ari telaga nuan. Kami semina deka bejalai nengah Jalai Raja. Kami enda belok ke kiba tauka belok ke kanan sampai ke kami pansut ari menua nuan.’”

18 Tang ku raja Edom nyaut: “Kita enda tau nengah menua aku. Enti kita nengah menua aku, aku tentu deka nyerang kita.” 19 Ku orang Israel madahka: “Kami semina deka nengah jalai besai. Enti kami tauka jelu tupi kami ngirup ai ari kawasan nuan, kami deka mayar iya. Kami semina deka bejalai nengah menua nuan.” 20 Taja pia, raja Edom degil lalu bejaku munyi tu: “Kita enda tau bejalai nengah menua aku.” Udah nya, iya enggau bala soldadu iya ti mayuh sereta kuat betemu enggau orang Israel. 21 Ketegal raja Edom enda ngemendarka orang Israel nengah menua iya, orang Israel pan mupuk ari endur nya.

22 Orang Israel pan mupuk ari Kades, lalu datai ba Gunung Hor. 23 Udah nya, Jehovah bejaku ngagai Moses enggau Aron ba Gunung Hor, iya nya ba sempadan menua Edom. Ku Iya madahka: 24 “Aron deka mati lalu iya deka dikuburka baka aki ini iya. Iya enda ulih tama ngagai menua ke deka diberi Aku ngagai orang Israel, laban seduai enda ngasika pesan ke dipadahka Aku ba mata ai Meribah. 25 Bai Aron enggau anak iya, Eleasar, niki ngagai Gunung Hor. 26 Buka gari Aron lalu pasukka gari nya ba anak iya, Eleasar. Aron deka mati ba gunung nya.”

27 Nyadi, Moses pan ngereja semua utai ke dipadahka Jehovah. Semua orang Israel meda iya, Aron, enggau Eleasar niki Gunung Hor. 28 Udah nya, Moses muka gari Aron, lalu masukka gari nya ba Eleasar. Aron mati ba atas gunung nya, lalu Moses enggau Eleasar nurun ari gunung nya. 29 Pengudah semua orang Israel nemu Aron udah mati, sida pan nyabakka Aron pengelama 30 hari.