Surat Kereja Rasul
14 Ba Ikonium, Paul enggau Barnabas tama ngagai balai gempuru orang Judah. Seduai iya landik bejaku, nyentukka mayuh orang Judah enggau orang Gerika arap. 2 Tang orang Judah ke enda arap ngasut* orang ari bansa bukai ngambika ngelaban Paul enggau Barnabas. 3 Nya alai, seduai iya ngena mayuh awak ba dia nusui berita pasal pemanah ati Petara ti besai. Ngena kuasa ke diberi Jehovah, seduai iya ulih bejaku enggau berani sereta ngaga kereja ajih enggau tanda ti ngalitka ati. 4 Tang orang mayuh ba nengeri nya nyau bebagi nyadi dua raban. Sekeda nyukung orang Judah, lalu sekeda agi nyukung bala rasul nya. 5 Lalu orang ari bansa bukai, orang Judah, enggau bala tuai bansa sida, nguji deka ngemediska Paul enggau Barnabas sereta nuku seduai iya ngena batu. 6 Lebuh Paul enggau Barnabas nemu pasal nya, seduai iya ngerarika diri ngagai nengeri Listra enggau Derbe ba Likonia, sereta ngagai endur ke ngelingi nengeri nya. 7 Ba dia, seduai iya majak nusui Berita Manah.
8 Ba Listra, bisi siku lelaki ke benung duduk. Iya mati kaki kenyau ari ada lalu enda kala bejalai. 9 Iya mendingka Paul maya Paul bejaku. Lebuh Paul merening ngagai iya lalu meda iya bisi pengarap sereta pechayaka diri ulih digeraika, 10 Paul lalu bejaku enggau nyawa ti inggar: “Bediri nuan.” Lelaki nya pan engkejuk angkat lalu bejalai. 11 Lebuh orang mayuh meda utai ke digaga Paul, sida manjung dalam jaku Likonia: “Bala petara udah nyadi baka mensia lalu nurun ngagai kitai!” 12 Sida pan meri gelar Seus ngagai Barnabas lalu gelar Hermis ngagai Paul, laban Paul suah agi bejaku. 13 Nya alai, imam petara Seus, ke bisi rumah sembiang semak enggau nengeri nya, mai sapi ti lelaki enggau sengkilung bungai ngagai pintu penama nengeri nya. Imam nya enggau orang mayuh mai pemeri nya kena nyembah Paul enggau Barnabas.
14 Lebuh Rasul Barnabas enggau Rasul Paul ninga pasal nya, seduai iya nyarikka gari diri lalu belanda ngagai orang mayuh. Ku seduai iya: 15 “Nama kebuah kita ngereja semua tu? Kami pan mensia ke bisi pengelemi baka kita. Kami nusui Berita Manah ngagai kita, ngambika kita ninggalka utai ke nadai guna nya lalu nyembah Petara ti idup. Iya meh ke ngaga langit, dunya, tasik, enggau semua utai dalam nya. 16 Ba rebak ke suba, taja pan Petara nejuka semua bansa ngereja utai nitihka peneka diri, 17 tang Iya agi ngereja utai ti manah kena meri saksi pasal Diri Empu. Iya meri kita ujan ari langit sereta musin ti mansutka mayuh asil. Iya mega meri kita mayuh pemakai kena ngemuaska ati kita sereta ngasuh kita gaga ati.” 18 Taja pan seduai iya bejaku munyi nya, tang seduai iya agi enda ulih nagang orang mayuh ari mai pemeri kena nyembah seduai iya.
19 Tang beberapa iku orang Judah ari Antiok enggau Ikonium datai lalu ngasut* orang mayuh. Nya alai, sida nuku Paul ngena batu lalu ngirit iya pansut ari nengeri nya, laban sida ngumbai iya udah mati. 20 Tang lebuh bala murid Jesus begelumu ngelingi iya, iya angkat lalu tama baru ngagai nengeri nya. Hari siti, iya enggau Barnabas mupuk ngagai Derbe. 21 Seduai iya nusui Berita Manah ba nengeri nya, lalu nulung mayuh orang nyadi murid Jesus. Udah nya, seduai iya pulai baru ngagai Listra, Ikonium, enggau Antiok. 22 Seduai iya ngeringka ati bala murid ba dia, lalu meransang sida ngambika pengarap sida ba Tuan Jesus mengkang tegap. Seduai iya madahka: “Kitai patut napi mayuh pemerinsa ngambika ulih tama ngagai Perintah Petara.” 23 Kelimpah ari nya, Paul enggau Barnabas milih bala tuai gempuru ke tiap iti raban gempuru. Seduai iya besampi sereta bepasa, lalu nyerahka sida ngagai Jehovah laban sida arapka Iya.
24 Pengudah nya, seduai iya bejalai nengah Pisidia lalu datai ba Pampilia. 25 Pengudah seduai iya nusui jaku Petara ba Perga, seduai iya mupuk ngagai Atalia. 26 Ari nya, seduai iya belayar ngagai Antiok. Suba, ba dia meh bala menyadi udah besampi minta Petara meri seduai iya pemanah ati Iya ti besai, ngambika seduai iya ulih bejalaika pengawa ke udah ditembuka seduai iya diatu.
27 Lebuh Paul enggau Barnabas datai ba Antiok, seduai iya ngasuh raban gempuru begelumu, lalu nusui mayuh utai ke udah digaga Petara nengah seduai iya. Paul enggau Barnabas mega madah ngagai sida pasal Petara ke udah muka jalai,* ngambika orang ari bansa bukai ulih arap. 28 Seduai iya lama diau enggau bala murid ba dia.