Pengajar

10 Baka lalat ke mati ngasuh minyak wangi bau but sereta bepupu, baka nya mega pemeli ti mit ngenyaika nama orang ke bepenemu-dalam sereta dipebasa.

2 Ati orang ke bepenemu-dalam mai iya ngagai jalai ti bendar,* tang ati orang ke beli mai iya ngagai jalai ti salah.* 3 Enda ngira baka ni orang ke beli bejalai, ati iya tetap beli, lalu iya mantaika pemeli diri ngagai semua orang.

4 Enti orang ke bekuasa ringat ngagai nuan, anang mupuk ari endur nuan, laban dosa ti besai ulih diseliahka* enti nuan tenang.

5 Bisi utai ke ngenusahka ati ke dipeda aku ba dunya tu, iya nya penyalah ke dikereja orang ke bekuasa. 6 Orang ke beli diberi pangkat ti tinggi, tang orang ke ulih dikearapka* diberi pangkat ti baruh.

7 Aku udah meda ulun nepan kuda, tang pegawai tinggi bejalai kaki baka ulun.

8 Orang ke ngali lubang engka labuh ke dalam lubang nya, lalu orang ke ngeruntuhka dinding batu engka deka dipantuk ular.

9 Orang ke gawa ba lumbung batu engka deka bakal, lalu orang ke melah kayu engka deka telih.*

10 Enti kapak tumpul lalu enda diansah, orang deka bebendar agi mantapka iya. Tang penemu-dalam nulung orang nya mujur.

11 Pengelandik orang ke nemu nyinakka ular nadai guna enti iya nyau dulu dipantuk ular ke bedau jinak.

12 Jaku ke pansut ari mulut orang ke bepenemu-dalam mai pengelantang, tang jaku ke pansut ari mulut orang ke beli mai penusah ngagai diri empu. 13 Utai keterubah pansut ari mulut iya endang jaku ti beli, lalu utai ke penudi pansut ari mulut iya utai ti gila ke mai penusah. 14 Orang ke beli enda nemu ngetu bejaku.

Mensia enda nemu utai ke deka nyadi. Sapa ke ulih madah ngagai iya utai ke deka nyadi pengudah iya mati?

15 Orang ke beli mati-mati gawa ngelelakka diri. Iya indah enda nemu jalai ngagai kuta.

16 Naka meh penusah enti raja ke merintah sesiti menua nya agi nembiak, lalu bala pegawai iya berengkah berami makai besai kenyau ari pagi! 17 Naka meh pengelantang sesiti menua enti raja iya ari peturun orang ke tinggi pangkat, lalu bala pemesai iya makai ba maya ti patut kena ngulihka pengering, ukai laban deka mabuk.

18 Ketegal sesiku orang balat ngelusu, kasau atap rumah iya deka runtuh. Ketegal sesiku orang buruk, atap rumah iya deka tuduh.

19 Roti* ngasuh orang ketawa gaga ati, lalu wain ngasuh pengidup lantang, tang duit ulih meli semua utai ke diguna.

20 Anang nyumpah raja, indah dalam runding* nuan. Anang nyumpah orang kaya dalam bilik tinduk nuan, laban burung engka deka madahka utai* ke disebut nuan, tauka utai idup ti besayap engka deka ngulang utai ke disebut nuan.