Isaiah
54 “Nuan indu ke mandul ke bedau ngadaka anak, manjung meh enggau ati ti gaga!
Nuan ke bedau kala ngasaika pemedis maya beranak, lantang ati meh lalu manjung meh enggau naka pengaga,
Laban indu ke ditinggalka laki deka bisi mayuh agi anak
Ari indu ke bisi laki,”* ku Jehovah.
2 “Gaga besaika agi langkau kain nuan.
Kerembaika kain ba langkau nuan ti besai.
Anang nagang diri, tarit panjaika agi tali langkau nuan,
Lalu teguhka paku langkau nuan.
3 Laban pemesai menua nuan deka nambah ke kiba enggau ke kanan.
Bala peturun nuan deka nguasa bansa bukai,
Lalu sida deka diau ba kuta-kuta ti puang.
4 Anang takut, laban nuan tentu enda dikemaluka;
Lalu anang ngasaika diri dikemelika, laban nuan tentu enda asa ati.
Nuan deka nadai agi ingatka asai ati ti malu lebuh nuan agi biak,
Sereta pemalu ke ninggang nuan lebuh nuan nyadi balu.”
5 “Laban Aku, Petara ke ngaga nuan, baka laki* nuan,
Nama Aku Jehovah, ketuai soldadu serega.
Aku meh Petara Israel ti Kudus sereta Penebus nuan.
Aku deka dikumbai Petara ti bekuasa atas serata dunya.
6 Lebuh Jehovah ngangauka nuan, nuan baka bini ke udah ditinggalka, ke balat tusah ati,
Nuan baka indu ke belaki maya agi biak lalu udah nya enda diterima laki nuan,” ku Petara nuan.
7 “Aku ninggalka nuan enda lama aja.
Tang enggau pengasih ti besai, Aku deka mai nuan pulai baru.
8 Ketegal balat amat ringat, Aku ngelalaika mua Aku ari nuan enda lama.
Tang enggau pengerindu ti setia ti meruan belama iya, Aku deka ngayanka pengasih ngagai nuan,” ku Penebus nuan, Jehovah.
9 “Ba Aku, tu baka jeman Noah suba.
Aku udah besumpah ai bah enda agi ngelamun dunya baka jeman Noah.
Baka nya mega, Aku besumpah enda agi ringat ngagai nuan tauka ngukum nuan.
10 Gunung engka lenyau,
Bukit engka begegar,
Tang pengerindu Aku ti setia tentu enda lenyau ari nuan,
Lalu sempekat pengelantang Aku deka mengkang teguh,” ku Jehovah, Petara ke kasihka nuan.
11 “O indu ke diperinsa, ke dipangka kabut, ke enda bulih pengelantang,
Aku ngaga nuan ngena batu enggau semin,
Lalu ngaga asas nuan ngena batu nilam.
12 Aku deka ngaga menara nuan ngena batu delima.
Aku deka ngaga pintu penama nuan ngena batu ti beperenching,*
Sereta ngaga semua sempadan nuan ngena batu ti berega.
13 Semua anak nuan deka diajar Aku, Jehovah,
Lalu sida deka bulih pengelantang ti belimpah.
14 Nuan deka teguh dalam pengelurus.
Nuan deka dibai jauh ari pemerinsa,
Nuan enda berasai takut lalu nadai utai ke ngasuh nuan takut,
Laban utai nya enda datai semak ngagai nuan.
15 Enti bisi orang nyerang nuan,
Nya ukai ketegal diasuh Aku.
Barang sapa ke nyerang nuan deka alah.”
16 “Peda! Aku Empu ke ngaga orang ke betukang,
Ke nyepu bara api,
Sereta ke ngaga senyata.
Aku mega ngaga orang ke ngemunaska sereta nganchurka utai.
17 Nadai siti pan senyata ke digaga kena ngelaban nuan deka mujur,
Lalu lebuh diakim, nuan deka mantaika penyalah orang ke nguji nuduh nuan.
Tu meh pesaka bala nembiak Aku, Jehovah,
Lalu pengelurus sida datai ari Aku,” ku Jehovah.