Pemandang
18 Udah nya, aku meda siku da agi melikat ke bisi kuasa ti besai nurun ari serega, lalu dunya nyadi terang ketegal mulia iya. 2 Iya lalu bejaku enggau nyawa ti inggar: “Iya udah labuh! Babilon ti Besai udah labuh! Iya udah nyadi endur bala melikat ti jai diau. Iya mega nyadi sarang bala melikat* ti kamah enggau sarang tiap iku burung ti kamah sereta dipegedi! 3 Semua bansa udah nyadi mansa ketegal wain iya ke ngasuh sida bisi pengingin ti balat deka ngereja ulah seks ti kamah.* Bala raja ba dunya udah ngereja ulah seks ti kamah enggau iya. Bala orang ke bedagang ba dunya nyadi kaya, laban iya enda malu ngumpul mayuh barang ti mar rega.”
4 Aku ninga siti da agi nyawa bejaku ari serega: “Bala nembiak Aku, pansut ari iya enti kita enggai sama bedosa enggau iya, lalu enti kita enggai ditinggang sebagi ari bencana ke ninggang iya. 5 Nya ketegal dosa iya udah betugung nyentukka serega, lalu Petara deka ngakim semua pengawa iya ti enda adil.* 6 Kereja ngagai iya utai ke udah dikereja iya ngagai orang bukai. Au, balas utai ke udah dikereja iya dua kali lipat. Iya udah ngaga ai dalam mangkuk. Ba mangkuk nya, gaga ke iya ai dua kali penyampau ai ke udah digaga iya. 7 Ngemalat nya iya udah ngemuliaka diri lalu enda malu idup kaya-raja, ngemalat nya meh iya patut merinsa sereta tusah ati. Nya ketegal iya majak nyebut dalam ati diri: ‘Aku tu kuin ke duduk ba atas kerusi diraja, lalu aku tu ukai indu balu. Aku enda sekali-kali deka tusah ati.’ 8 Nya alai, dalam sehari semua bencana iya deka datai, iya nya pemati, penusah ati, enggau lapar pungkang. Iya deka ditunu abis lengis ngena api laban Petara Jehovah ke ngakim iya, amat bekuasa.
9 “Lebuh meda asap api ke nganguska iya, bala raja ba dunya ke udah ngereja ulah seks ti kamah* enggau iya sereta ke enda malu idup kaya-raja enggau iya, deka nyabak lalu mandam dada diri ketegal balat tusah ati. 10 Sida bediri jauh laban takut enggaika merinsa baka iya. Ku sida: ‘Kasih amat! Kasih amat nuan Babilon, nengeri ti besai enggau nengeri ti kering, laban dalam sejam ukum ke ninggang nuan udah datai!’
11 “Semua orang ke bedagang ba dunya mega nyabak sereta balat tusah ati ketegal iya, laban nadai agi orang ke deka meli semua utai ke dijual sida. 12 Tu meh utai ke dijual sida: Emas, pirak, batu ti berega, mutiara, kain linin ke alus, kain ke bewarna ungu, kain sutera, kain ke bewarna mirah gelap, semua utai ke digaga ari kayu ti bebau rengut, enggau semua utai ke digaga ari gading, ari kayu ti berega, temaga, besi, enggau batu marmar. 13 Sida mega nyual kayu manis, rempah India, menyan, minyak wangi, menyan burak, wain, minyak kana, tepung alus, gandum, sapi, bedus, kuda, kerita kuda, ulun, enggau mensia. 14 Au, buah ti manah ke dikinginka nuan udah ninggalka nuan. Semua pemakai ti nyamai enggau barang ti lawa ke bisi ba nuan, udah lenyau lalu enda ulih ditemu agi.
15 “Bala orang ke bedagang ke nyual semua utai nya sereta ke nyadi kaya ketegal iya deka bediri jauh, laban takut enggaika sida merinsa baka iya. Sida deka nyabak sereta tusah ati, 16 lalu madahka: ‘Kasih amat! Kasih amat nengeri ti besai nya, ke begari ngena kain linin ti alus, kain ke bewarna ungu, enggau kain ke bewarna mirah gelap, sereta ke diias enggau mayuh perengka emas, batu ti berega, enggau mutiara, 17 laban dalam sejam pengaya ti mayuh nya udah anchur!’
“Tiap iku kapten kapal, tiap iku orang ke belayar, bala kelasi, enggau semua orang ke ngiga belanja ba tasik bediri jauh 18 lalu bejaku enggau inggar lebuh sida meda asap api ke nganguska iya. Ku sida: ‘Ni bagi nengeri ke baka nengeri ti besai nya?’ 19 Sida naburka debu atas pala sida. Sida bejaku enggau nyawa ti inggar, nyabak, sereta tusah ati. Ku sida: ‘Kasih amat! Kasih amat nengeri ti besai nya, alai orang ke bisi kapal ba tasik nyadi kaya ketegal pengaya nengeri nya, laban dalam sejam iya udah dipunaska!’
20 “Gaga ati meh serega, bala nembiak Petara ti kudus, bala rasul, enggau bala nabi, laban Petara udah ngarika kita netapka ukum ke deka ninggang iya!”
21 Udah nya, siku melikat ti kering ngangkatka sigi batu ke baka batu kisar ti besai lalu nikauka iya ke tasik. Ku iya madahka: “Baka nya meh Babilon, nengeri ti besai nya, deka ditikauka enggau jampat, lalu iya enda ulih ditemu agi. 22 Ba nuan dia, bunyi nyawa bala penyanyi ke nebah belikan,* bunyi orang ke nebah musik, bunyi orang ke nyepu kesuling, enggau bunyi orang ke nyepu terumpit, enda ulih didinga agi. Ba nuan dia, orang ke landik betukang nadai agi ditemu lalu bunyi batu kisar nadai agi didinga. 23 Ba nuan dia, nadai agi lampu ke deka manchar lalu nadai agi munyi nyawa pengantin lelaki enggau pengantin indu ke ulih didinga. Nya ketegal bala nuan ke bedagang nya orang ke bepangkat tinggi ba dunya, lalu pengawa nuan ke bekaul enggau melikat ti jai* udah nesatka semua bansa. 24 Au, darah bala nabi, darah bala nembiak Petara ti kudus, enggau darah semua orang ba dunya ke udah mati disayat, bisi ditemu ba nengeri nya.”