Ulang Adat
15 “Ba ujung tiap taun ti ketujuh, kita mesti muai semua utang orang ke berutang ba kita. 2 Tu utai ke patut digaga kita: Barang sapa ke nyali duit ngagai orang bukai, iya mesti muai utang orang nya. Iya enda tau nagih utang nya ari orang ke sebansa enggau iya. Utang nya mesti dibuai kena ngemuliaka Jehovah. 3 Kita tau nagih utang ari orang asing, tang kita mesti muai semua utang orang ke sebansa enggau kita. 4 Taja pia, nadai siku ari bala kita deka nyadi miskin, laban Jehovah, Petara kita, deka merekatka kita ba menua ke deka diberi Jehovah ngagai kita nyadika pesaka. 5 Tang, kita mesti enggau bebendar ngasika jaku Jehovah, Petara kita, lalu ngereja semua utai ke dipadahka aku ngagai kita seharitu. 6 Jehovah, Petara kita, deka merekatka kita baka ke udah disemayaka Iya. Kita deka nyali duit ngagai mayuh bengkah bansa, tang kita tau enda ibuh nginjau duit ari orang bukai. Kita deka nguasa mayuh bengkah bansa, tang sida enda ulih nguasa kita.
7 “Enti bisi siku ari bala kita nyadi miskin ba siti ari kuta ba menua ke diberi Petara kita, Jehovah, ngagai kita, kita mesti kasihka iya. Anang kedekut enggau iya. 8 Kita patut gerah jari enggau iya, lalu sedia deka nyali nama-nama utai ke diguna iya. 9 Anang bisi runding ti jai baka tu: ‘Taun ti ketujuh, iya nya Taun Sabat, nyau semak,’ lalu kita enggai gerah jari sereta enggai meri nama-nama utai ngagai bala kita ke miskin nya. Enti kita enggai nulung iya lalu iya ngangauka Jehovah, kita deka dikumbai bedosa. 10 Kita mesti gerah jari meri utai ngagai iya, lalu anang berasai terpaksa lebuh meri utai nya. Enggau nya, Jehovah, Petara kita, deka merekatka semua utai ke dikereja kita. 11 Orang miskin endang seruran bisi ba menua kita. Nya meh kebuah aku meri kita pesan tu: ‘Kita mesti gerah jari ngagai bala kita ke tusah sereta miskin ba menua kita.’
12 “Enti siku ari bala kita, iya nya orang Hebrew, enda ngira iya lelaki tauka indu, dijual ngagai kita ngambika nyadi ulun, kita mesti ngelepaska iya pengudah iya gawa ke kita pengelama enam taun. Kita mesti ngelepaska iya ba taun ti ketujuh. 13 Lebuh kita ngelepaska iya, anang ngasuh iya pulai nadai mai utai. 14 Kita mesti gerah jari meri iya jelu tupi, bijirin, minyak, enggau wain. Kita mesti meri iya utai baka Jehovah, Petara kita, ke udah merekatka kita. 15 Anang enda ingat, suba kita kala nyadi ulun ba menua Ejip, lalu Jehovah, Petara kita, udah ngelepaska kita. Nya meh kebuah aku ngasuh kita ngereja semua utai tu ke udah dipadahka aku ngagai kita seharitu.
16 “Tang, enti ulun nya madah ngagai kita: ‘Aku enggai ninggalka tuan!’ laban iya rinduka kita sereta ruang bilik kita, lalu iya gaga ati gawa ke kita, 17 bai iya ngagai pintu rumah kita lalu achuk cuping pending iya. Enggau nya, iya deka nyadi ulun kita seumur idup. Kita mega patut ngereja utai ti sama ngagai ulun kita ke indu. 18 Lebuh kita ngelepaska iya lalu iya mupuk ninggalka kita, anang berasai rugi. Iya udah gawa ke kita pengelama enam taun, lalu pengawa ke dikereja iya dua kali lipat ari pengawa ke digaga pekereja ke digaji, lalu Jehovah, Petara kita, udah merekatka semua utai ke digaga kita.
19 “Tiap iku anak tuai ke lelaki ari jelu tupi kita patut dikuduska* ke Jehovah, Petara kita. Kita enda tau gawa ngena sapi nya tauka nyukur bulu bedus nya. 20 Kita enggau ruang bilik kita mesti makai dagin jelu nya ba depan Jehovah, Petara kita, ninting taun ba endur ke udah dipilih Jehovah. 21 Tang enti jelu nya bisi penimpang, sekalika nya pinchat, buta, tauka penimpang bukai, anang nyerahka jelu nya ngagai Jehovah, Petara kita. 22 Enda ngira kita nya orang ke tuchi tauka enda, semua kita tau makai dagin jelu nya ba kuta kita, baka kita ke makai dagin kijang tauka rusa. 23 Tang, kita enda tau makai darah jelu nya. Kita mesti nuangka darah nya ngagai tanah baka ke nuang ai.