Rome
13 Kitai patut ngasika orang ke bisi kuasa merintah kitai, laban kuasa sida datai ari Petara. Sida bulih penuduk nya nitihka atur Petara. 2 Enti kitai ngelaban sida, kitai ngelaban Petara. Orang ke ngelaban atur tu deka diukum. 3 Orang ke ngereja penyai takutka bala pemerintah. Tang orang ke ngereja utai ti manah enda takutka sida. Kita enda ibuh takutka orang ke bisi kuasa. Enti kita ngereja utai ti manah, sida deka muji kita. 4 Nya ketegal sida ulun Petara ke ngereja utai ke penguntung kita. Tang enti kita ngereja utai ti jai, kita patut berasai takut, laban sida udah diberi kuasa ngukum orang ke ngereja penyalah. Sida iya ulun Petara ke ngukum orang ke ngereja utai ti jai.
5 Nya alai, kita bisi kebuah ti manah ngasika sida, ukai aja ketegal deka nyeliahka diri ari diukum, tang mega ngambika ati kita enda berasai besalah. 6 Nya mega kebuah kita mayar chukai, laban sida ulun Petara ke seruran bejalaika pengawa ke orang mayuh. 7 Beri ngagai tiap iku orang utai ke patut diterima sida. Bayar chukai ngagai orang ke minta chukai. Enti perintah ngasuh kita bebayar, bayar meh ngagai sida. Nangika orang ke patut dikenangika kita, lalu bebasaka orang ke patut dipebasa kita.
8 Anang berutang nama-nama ba orang. Tang kita patut rinduka pangan diri, laban orang ke rinduka pangan diri udah ngasika adat. 9 Adat baka, “Anang butang,* anang munuh orang, anang ngenchuri, anang inginka utai orang,” enggau semua adat ke bukai tau digempungka nyadi siti adat tu: “Kita patut rinduka orang bukai baka kita ke rinduka diri empu.” 10 Pengerindu enda ngereja utai ti jai ngagai orang bukai. Nya alai, orang ke rinduka orang bukai udah ngasika adat.
11 Kita patut ngereja semua nya laban kita nemu maya alai kita patut dani udah datai. Maya kitai ke deka diselamatka nyau semak agi ari maya kitai ke belabuh arap. 12 Hari nyau udah jauh malam, lalu enda lama agi hari nyauka tawas. Nya alai, kitai patut ngetu ngereja utai ke bekaul enggau pemetang, lalu ngena senyata penampak. 13 Aram meh kitai nyaga ulah, baka ulah orang maya siang hari. Anang berami nyentukka enda tetagangka ulah diri. Kitai enda patut mabuk, belaya, nyadi chemburu, ngereja ulah seks ti kamah tauka enda malu ngereja utai ti jai.* 14 Anang berundingka chara kena ngemuaska pengingin ti bedosa. Tang bebendar meh nitihka teladan Tuan Jesus Kristus.