Rome
16 Aku minta kita nerima penatai Fibi, menyadi indu kitai ke gawa begulai* enggau raban gempuru* ba Kenkria. 2 Terima meh iya dalam nama Tuan, baka kita ke nerima nembiak Petara ti kudus.* Tulung meh iya enti iya begunaka bantu, laban iya udah nulung mayuh menyadi nyengkaum aku empu.
3 Kirumka salam aku ngagai Priska* enggau Akuila ke sama gawa enggau aku ke Jesus Kristus. 4 Seduai iya udah berambun nyawa ketegal aku. Aku enggau semua raban gempuru bansa bukai beterima kasihka seduai iya. 5 Aku mega ngirumka salam ngagai raban gempuru ke begempuru ba rumah seduai iya. Kirumka salam aku ngagai Epinetus ke dikerinduka aku. Iya siku ari orang keterubah ari Asia* ke nyadi murid Kristus. 6 Kirumka salam ngagai Maria ke udah bebendar gawa ke kita. 7 Kirumka salam ngagai Andronikus enggau Junias, kaban belayan aku sereta ke kala sama dijil enggau aku. Bala rasul amat ngelala seduai iya, lalu seduai iya udah lama agi ari aku nyadi murid Kristus.
8 Kirumka salam aku ngagai Ampliatus, kaban ke dikerinduka aku sereta mega murid Tuan. 9 Kirumka salam ngagai Urbanus ke sama gawa enggau kitai ke Kristus, sereta ngagai kaban ke dikerinduka aku, Stakis. 10 Kirumka salam ngagai Apeles, ke tetap ati ngagai Kristus. Kirumka salam ngagai sida Aristobulus serumah. 11 Kirumka salam ngagai kaban belayan aku, Herodion. Kirumka salam ngagai sida Narsisus serumah, ke mega murid Tuan. 12 Kirumka salam ngagai Trifina enggau Trifosa, menyadi indu ke bebendar gawa ke Tuan. Kirumka salam ngagai Persis, menyadi indu ke dikerinduka kitai. Iya mega udah bebendar gawa ke Tuan. 13 Kirumka salam ngagai Rufus, ulun ti amat manah ke udah dipilih Tuan, sereta mega ngagai indai iya, ke baka indai aku empu. 14 Kirumka salam ngagai Asinkritus, Plegon, Hermis, Patrobas, Hermas, enggau bala menyadi ke bukai ke enggau sida. 15 Kirumka salam ngagai Pilologus enggau Julia, Nereus enggau menyadi indu iya, Olimpas, sereta ngagai semua nembiak Petara ti kudus ke enggau sida. 16 Sambut meh pangan diri enggau penuh pengerindu.* Semua orang ba raban gempuru Kristus ngirumka salam ngagai kita.
17 Bala menyadi, diatu aku bebendar minta kita ngambika bejimat enggau sida ke tau ngasuh kita bepechah-belah sereta ngasuh orang limpang ari pengarap. Pengawa sida ngelaban utai ke udah dipelajarka kita. Anang semak enggau sida, 18 laban sida ukai ulun Tuan kitai Kristus, tang sida nyadi ulun pengingin* diri empu. Ngena jaku ti manis enggau jaku kelangkung, sida nipu orang ke enda nemu bagi utai ti jai. 19 Tang aku amat gaga laban semua orang nemu kita ngasi. Aku deka kita nyadi pintar, lalu ngereja utai ti manah. Aku mega deka kita nyadi orang ke nadai penyalah, lalu nyeliahka utai ti jai. 20 Enda lama agi, Petara ke meri pengelantang deka ngeredakka Sitan ba baruh kaki kita. Ngarapka Tuan kitai Jesus ngayanka pemanah ati iya ti besai ngagai kita.
21 Timoti, ke sama gawa enggau aku, ngirumka salam ngagai kita. Pia mega enggau kaban belayan aku, Lusius, Jason, enggau Sosipater.
22 Aku, Tertius, ke nulung nulis surat tu, ngirumka salam Kristian ngagai kita.
23 Gaius, orang ke bempu rumah endur aku diau sereta endur bala menyadi begempuru, mega ngirumka salam iya ngagai kita. Erastus, ke ngemataka duit nengeri, enggau menyadi lelaki iya Kuartus, ngirumka salam ngagai kita. 24* ——
25 Petara ulih negapka kita nengah Berita Manah ke ditusui aku sereta nengah pengawa nginjil pasal Jesus Kristus. Pesan tu udah dipandangka nengah resia ti kudus ke udah lama dipelalaika. 26 Diatu, resia nya udah dipandangka ngagai kitai lalu ulih ditemu nengah ayat Bup Kudus ke ditulis bala nabi. Petara kitai ke idup belama iya udah ngasuh resia nya dipadah ngagai semua bansa, ngambika sida arap lalu ngasi. 27 Ngarapka Petara, ti siku aja ke bepenemu-dalam, dimuliaka nengah Jesus Kristus belama iya. Amin.