Satu Korint

1 Aku tu Paul, ke dikangau nyadi rasul Jesus Kristus, sejalai enggau peneka Petara. Aku enggau menyadi kitai, Sostenis, 2 ngirumka surat tu ngagai raban gempuru* Petara ba Korint, iya nya ngagai kita ke udah dikuduska, ngambika beserakup enggau Jesus Kristus. Kita udah dikangauka Petara nyadi nembiak Iya ti kudus. Surat tu mega ditujuka ngagai semua orang ba serata endur ke ngangauka nama Tuan kitai, Jesus Kristus, iya nya Tuan sida enggau Tuan kitai:

3 Ngarapka kita nerima pengelantang enggau pemanah ati ti besai ari Petara, Apai kitai, enggau ari Tuan Jesus Kristus.

4 Aku seruran beterima kasih ngagai Petara aku ke kita, laban Petara udah ngayanka pemanah ati Iya ti besai ngagai kita nengah Jesus Kristus. 5 Nengah iya, kita udah nerima semua utai. Nya alai, kita mega landik bejaku sereta bisi chukup penemu. 6 Laban pesan ke ditusui pasal Kristus udah beurat dalam bala kita. 7 Nya alai, seraya kita nganti maya Tuan kitai, Jesus Kristus, deka mandangka kuasa iya, kita nadai kurang nama-nama pemeri. 8 Petara deka negapka kita nyentuk ke ujung, ngambika nadai orang ulih nuduh kita lebuh hari Tuan kitai, Jesus Kristus, datai. 9 Petara ke tetap ati udah ngangauka kita ngambika beserakup enggau Anak Iya, Tuan kitai, Jesus Kristus.

10 Bala menyadi, diatu aku bebendar minta kita ngambika dalam nama Tuan kitai, Jesus Kristus, semua kita sejalai ba jaku, lalu enda bepechah-belah. Kita patut amat sepenemu sereta sama runding. 11 Bala menyadi, aku nyebut munyi nya laban sekeda orang ari sida Klowi serumah udah madah ngagai aku pasal kita ke beserekang* penemu enggau pangan diri. 12 Reti ku aku nya, bisi entara kita madahka: “Aku nitihka Paul,” “Aku nitihka Apollos,” “Aku nitihka Kefas,”* lalu bisi mega madahka: “Aku nitihka Kristus.” 13 Kati raban gempuru Kristus udah bepechah-belah? Kati nya Paul ke diukum bunuh ba tiang ke kita? Kati kita dibaptisa dalam nama Paul? 14 Aku beterima kasih ngagai Petara, laban aku nadai maptisa siku pan ari kita, kelimpah ari Krispus enggau Gaius. 15 Nya alai, nadai orang ulih madahka kita dibaptisa dalam nama aku. 16 Kelimpah ari nya, aku mega maptisa sida Stepanas serumah. Lalu ke temu aku, nadai agi orang bukai ke dibaptisa aku. 17 Kristus nganjung aku ngambika nusui Berita Manah, ukai maptisa orang sereta ukai nginjil ngena jaku orang ke bepelajar. Enggau nya, pemati Kristus ba tiang perinsa* enda lebu ngapa.

18 Ba orang ke deka dipunaska, pesan pasal tiang perinsa* Kristus dikumbai sida utai ti beli. Tang ba kitai ke deka diselamatka, pesan nya bukti kuasa Petara. 19 Laban baka ke dipadah ba Bup Kudus: “Aku deka muai penemu-dalam orang ke bepenemu-dalam, lalu Aku deka nulak pemintar orang ke bepelajar.” 20 Ni orang ke bepenemu-dalam? Ni bala penulis Adat?* Ni orang ke rindu belaban jaku ba dunya tu? Endaka Petara udah nunjukka penemu-dalam dunya* tu utai ti beli? 21 Orang enda ulih ngelala Petara nengah penemu-dalam dunya tu, tang nengah pesan ke dikumbai orang beli, Petara nyelamatka orang ke arapka pesan nya. Enggau nya, Petara nunjukka penemu-dalam Iya.

22 Orang Judah minta tanda, lalu orang Gerika ngiga penemu-dalam, 23 tang kitai nusui pasal Kristus ke dibunuh ba tiang. Ba orang Judah, pesan nya baka batu ti ngasuh labuh, lalu ba bansa bukai, pesan nya baka utai ti beli. 24 Tang ba orang Judah enggau orang Gerika ke dikangau Petara, Kristus nya kuasa enggau penemu-dalam Petara. 25 Utai ke datai ari Petara, ke dikumbai mensia beli sereta lemi, kebendar iya lebih agi bepenemu-dalam sereta kering agi ari mensia.

26 Bala menyadi, kita ulih beratika, lebuh kita dikangau Petara, enda mayuh ari kita ke bepenemu-dalam ba mata mensia, enda mayuh ari kita ke bekuasa, lalu enda mayuh ari kita ke datai ari ruang bilik ke tinggi pangkat. 27 Tang Petara udah milih utai ke dikumbai dunya beli, kena ngemaluka orang ke bepenemu-dalam. Petara udah milih orang ke dikumbai dunya lemi, kena ngemaluka orang ke kering. 28 Petara milih utai ke enda beguna ba dunya tu, ke enda diperening orang, enggau ke enda berega, ngambika utai ke bisi reti nyadi nadai reti. 29 Enggau nya, nadai siku pan orang ke ulih temegahka diri ba mua Petara. 30 Ketegal Petara meh, kita diatu beserakup enggau Jesus Kristus. Jesus udah ngayanka penemu-dalam Petara, lalu nunjukka utai ti lurus. Nengah iya, kitai dikuduska, lalu nengah tebus iya, kitai dilepaska. 31 Nya alai, baka ke ditulis ba Bup Kudus: “Barang sapa ke temegah ati, awakka iya temegah ati ketegal Jehovah.”*