Satu Korint
2 Bala menyadi, lebuh aku datai madahka resia ti kudus ari Petara ngagai kita, aku enda mantaika penemu-dalam aku tauka ngena jaku ti bebungai. 2 Lebuh aku enggau kita, aku mutuska diri enggai kiruh pasal utai bukai, kelimpah ari pasal Jesus Kristus enggau pasal iya ke diukum bunuh ba tiang. 3 Lebuh aku datai ngagai kita, aku lemi, nangi, sereta balat takut. 4 Lebuh aku bejaku enggau ngajar, aku enda ngena jaku ti ngembuan penemu-dalam kena ngasuh orang andal. Tang aku ngena jaku ke ngayanka pemesai kuasa kudus* Petara, 5 ngambika kita arapka kuasa Petara, ukai penemu-dalam mensia.
6 Kitai bejaku pasal penemu-dalam ngagai orang ke tegap ba pengarap. Tang penemu-dalam tu ukai penemu-dalam ari dunya tu, tauka penemu-dalam ari pemerintah ba dunya* tu ke deka dipunaska. 7 Kitai bejaku pasal penemu-dalam Petara ke dilalaika dalam resia ti kudus. Pekara tu udah ditentuka Petara sebedau dunya* tu bisi, ngambika kitai dimuliaka. 8 Nadai siku pan ari bala pemerintah ba dunya* tu nemu pasal penemu-dalam nya. Enti sida nemu nya, sida tentu enda munuh Tuan kitai ti bemulia ba tiang. 9 Baka ke ditulis ba Bup Kudus: “Utai ke disediaka Petara ngagai orang ke rinduka Iya bedau kala dipeda mata, didinga pending, tauka pansut dalam ati mensia.” 10 Taja pia, Petara ngena kuasa kudus Iya madahka utai nya ngagai kitai, laban kuasa kudus nya meresa semua utai, nyengkaum penemu Petara ti dalam.
11 Sapa bagi mensia ke ulih nemu runding orang bukai? Semina orang nya empu ke ulih nemu utai ke bisi dalam runding iya empu. Pia mega, orang enda ulih nemu runding Petara enti enda nengah kuasa kudus Petara. 12 Kitai ukai nerima runding enggau ulah* dunya, tang kitai nerima kuasa kudus Petara, ngambika kitai nemu utai ke diberi Petara kitai ti amat manah ati. 13 Nya alai, lebuh nusui pasal utai nya, kitai enda ngena jaku ke datai ari penemu-dalam mensia, tang kitai ngena jaku ke diajar kuasa kudus Petara. Kitai nerangka utai ti bekaul enggau Petara ngena jaku ti datai ari Petara.
14 Orang ke nitihka pengingin diri empu enggai nerima utai ari kuasa kudus Petara laban iya ngumbai nya utai ti beli. Iya enda ulih meretika utai nya laban utai nya semina ulih dipansik nengah bantu ari kuasa kudus Petara. 15 Tang orang ke nitihka iring kuasa kudus Petara mansik semua utai, lalu nadai orang ulih ngakim iya. 16 Ayat Bup Kudus bisi madahka: “Sapa ke ulih nemu runding Jehovah nyentukka orang nya ulih ngajar Iya?” Taja pia, kitai ngembuan runding Kristus.