Jaku-Dalam
24 Anang ngining orang ke jai,
Lalu anang bekaban enggau sida,
2 Laban dalam ati sida, sida ngaga pelan deka ngereja penyai,
Lalu mulut sida udu bejaku pasal deka ngereja utai ti jai.
3 Ngena penemu-dalam, rumah* nyadi tegut;
Ngena pemereti ati, rumah ditegapka;
4 Lalu ngena penemu, semua bilik iya
Deka penuh laban mayuh macham reta ti lawa sereta berega.
5 Orang ti bepenemu-dalam amat bekuasa,
Lalu penemu deka nambahka kuasa iya.
7 Orang ke beli enda teulihka penemu-dalam ti bendar;
Nadai utai ulih disebut iya ba pintu kuta.*
8 Barang sapa ke ngaga pelan ti jai
Deka dikumbai kepala orang ke ngereja penyai.
9 Pelan ti beli* ngujungka dosa,
Lalu orang ke udu ngelese deka dipegedika orang.
10 Enti nuan asa ati lebuh dituntung penusah,
Pengering nuan deka kurang.
11 Selamatka meh sida ke deka diukum mati,
Lalu tulung meh sida ke nyauka dibunuh.
12 Enti nuan madah: “Tang kami enda nemu pasal tu,”
Kati nuan ngumbai Iya ke meresa ati* enda nemu pasal nya?
Iya ke beratika nuan sigi nemu,
Lalu Iya deka malas pengawa tiap iku orang nitihka utai ke dikereja orang nya.
13 Anak, empa meh madu laban nya manah ke nuan;
Madu ke pansut ari sarang manyi asai iya manis.
14 Pia mega, penemu-dalam manah ke nuan.
Enti nuan tetemuka iya, nya baru nuan deka diau lantang jemah ila,
Lalu harapan ke dianti nuan enda lenyau.
15 Anang baka orang ke jai ke nganti deka nyerang semak rumah orang ke lurus;
Anang nganchurka endur orang ke lurus diau.
16 Orang ke lurus engka rebah tujuh kali, lalu iya deka angkat baru,
Tang orang ke jai deka alah laban penusah.
17 Anang lantang ati lebuh munsuh nuan rebah,
Lalu anang gaga ati lebuh iya tesangkut.
18 Enggaika Jehovah meda nya lalu Iya enda lantang ati,
Lalu Iya enda nyadi ringat ngagai munsuh nuan nya.
19 Anang pedis ati ketegal orang ke jai;
Anang ngining orang ke jai,
20 Laban orang ke jai nadai masa depan ti manah;
Orang ke jai baka lampu ti deka padam.
21 Anak, anang enda nangika Jehovah enggau raja.
Anang begulai enggau orang ke angkat ngelaban,*
22 Laban orang ke baka nya deka ngenyit ditinggang penusah.
Sapa ke ulih nemu penusah ke deka dikenataika seduai iya* ngagai orang ke ngelaban?
23 Jaku tu mega datai ari orang ke bepenemu-dalam:
Enda manah bepilih mata lebuh ngakim sesiti pekara.
24 Barang sapa madah ngagai orang ke jai: “Nuan orang ke lurus”
Deka disumpah lalu dipegedika semua bansa.
25 Tang barang sapa ngerara orang ke jai deka lantang;
Sida deka diberekat enggau utai ti manah.
26 Orang deka nyium kuyu orang ke nyaut enggau beterus terang.
27 Aduka dulu pengawa nuan ba luar, lalu aduka pengawa nuan ba ladang nuan.
Udah nya, dirika rumah* nuan.
28 Anang besaksi ngelaban pangan diri enti nadai kebuah ti nyengala,
Lalu anang ngena mulut nuan nipu orang bukai.
29 Anang nyebut: “Aku deka ngerejaka iya baka utai ke udah dikereja iya ngagai aku;
Aku deka malas iya baru.”
30 Aku bejalai nengah ladang orang ke buruk gawa,
Nengah ladang anggur orang ke enda nemu berunding.
31 Aku meda endur nya penuh laban madang lalang,
Tanah iya penuh laban utai tumbuh ti beduri,
Lalu dinding batu iya udah runtuh.
32 Aku beratika lalu berundingka utai nya;
Aku beratika, lalu tu dipelajarka aku:
33 Tinduk meh sekejap, pejamka mata kita enda lama,
Lipatka jari kita, berehat meh enda lama,
34 Lalu kita deka jampat nyadi miskin, baka perumpak ke ngenyit datai nyerang kita,
Baka orang ke besenyata ke datai ngambi semua utai ke enggi kita.