Pengajar
3 Semua utai ke nyadi bisi maya iya empu.
Bisi maya ke tiap iti utai ti nyadi ba baruh langit:
2 Bisi maya ada, lalu bisi maya mati;
Bisi maya nanam, lalu bisi maya nyabut utai ke udah ditanam;
3 Bisi maya munuh, lalu bisi maya nyuman;
Bisi maya ngeruntuh, lalu bisi maya negi;
4 Bisi maya nyabak, lalu bisi maya ketawa;
Bisi maya tusah ati, lalu bisi maya betanda;
5 Bisi maya muai batu, lalu bisi maya ngumpul batu;
Bisi maya beberap, lalu bisi maya enda beberap;
6 Bisi maya begigaka utai, lalu bisi maya badu begigaka utai;
Bisi maya besimpanka utai, lalu bisi maya bebuaika utai;
7 Bisi maya nyarik, lalu bisi maya bejait;
Bisi maya enda bemunyi, lalu bisi maya bejaku;
8 Bisi maya ngayanka pengerindu, lalu bisi maya begedi;
Bisi maya beperang, lalu bisi maya bebaik.
9 Nama asil usaha siku pekereja? 10 Aku meda Petara udah meri pengawa ngagai mensia ngambika sida mengkang kisuk. 11 Petara udah ngaga semua utai enggau manah ba maya ti ngena. Iya udah nyimpan pengingin deka idup meruan belama iya* ba dalam ati mensia. Taja pia, mensia enda ulih meretika pengawa Petara ti bendar ari pun sampai ke ujung.
12 Aku ulih madah, utai ti pemadu manah ke ulih dikereja mensia, iya nya ngelantangka diri sereta ngereja utai ti manah sepemanjai pengidup sida. 13 Semua orang patut makai, ngirup, lalu ngelantangka diri ngena asil pengawa iya ti bebendar. Semua utai nya pemeri ari Petara.
14 Aku sedar, semua utai ke dikereja Petara ti bendar meruan belama iya. Nadai utai ke ulih ditambah tauka dikurangka. Petara ti bendar udah ngaga semua utai baka nya, ngambika semua orang bisi basa ti dalam ngagai* Iya.
15 Utai ke benung nyadi udah nyadi, lalu utai ke deka nyadi pan udah nyadi. Petara ti bendar ngiga utai ke udah digiga.*
16 Aku mega meda utai tu nyadi ba dunya tu: Ba endur ti lurus sereta adil, ba dia mega bisi penyai. 17 Nya alai, aku bejaku dalam ati diri: “Petara ti bendar deka ngakim orang ke lurus enggau orang ke jai, laban tiap iti utai ke dikereja sereta tiap iti pengawa bisi maya iya empu.”
18 Dalam ati aku mega madah, Petara ti bendar deka nguji mensia lalu nunjukka ngagai sida, mensia sama baka jelu, 19 laban utai ke deka nyadi ba mensia deka nyadi ba jelu. Pengujung sida tetap sama. Mensia mati lalu jelu mega mati. Semua sida bela bisi seput pengidup. Nya alai, mensia nadai lebih ari jelu, laban semua utai nadai guna. 20 Mensia enggau jelu nuju ngagai endur ti sama. Sida sama datai ari debu tanah, lalu deka pulai baru ngagai debu tanah. 21 Sapa ke ulih nemu sekalika seput pengidup mensia niki ke atas tauka seput pengidup jelu nurun ngagai dunya? 22 Aku meda utai ti pemadu manah ke mensia, iya nya ngelantangka diri ngena asil pengawa iya ti bebendar. Nya meh upah iya, laban sapa ke ulih nunjukka ngagai iya utai ke deka nyadi pengudah iya mati?