Jaku-Dalam
23 Lebuh nuan makai begulai enggau raja,
Bejimat enggau utai ke ba depan nuan:
2 Taja pan nuan amat rindu makai,
Tagang meh diri empu.*
3 Anang tetengukka pemakai iya ti nyamai,
Ngambika nuan enda kena tipu.
4 Anang ngelelakka diri ngulihka pengaya.
Ngetu lalu ayanka penemu-dalam.*
5 Lebuh nuan malik ngagai pengaya, iya udah lenyau;
Pengaya nuan nya ngerembaika sayap iya lalu terebai ke langit, baka burung menaul.
6 Anang makai pemakai orang ke rangka;
Anang tetengukka pemakai iya ti nyamai,
7 Laban iya kelalu bekira.
Mulut iya nyebut: “Makai enggau ngirup,” tang ati iya enda ikhlas.
8 Nuan deka mutahka semua utai ti udah diempa nuan,
Lalu semua jaku puji nuan deka tebasau ngapa.
9 Anang bejaku enggau orang ke beli,
Laban iya deka ngeleseka jaku nuan ti bepenemu-dalam.
10 Anang mindahka kelai sempadan tanah kelia menya,
Lalu anang ngambi ladang anak ke nadai apai.*
11 Laban Penyelamat* sida kering;
Iya deka ngarika sida ngelaban nuan.
12 Terima meh disiplin enggau pengabis ati,
Lalu pendingka jaku ti bepenemu-dalam.
13 Anang nangi lebuh deka disiplin anak.*
Enti nuan nyipat iya ngena rutan, nya enda munuh iya.
14 Sipat iya ngena rutan,
Kena nyelamatka iya ari Kubur.*
15 Anak, enti ati nuan bepenemu-dalam,
Ati aku deka gaga amat.
16 Ati aku deka balat amat gaga,
Enti mulut nuan nyebut utai ti amat.
17 Anang ngining orang ke bedosa,
Tang awakka nuan seruran nangika Jehovah.
18 Nya baru nuan deka diau lantang jemah ila,
Lalu harapan ke dianti nuan enda lenyau.
19 Pendingka jaku aku, anak, lalu anang enda bepenemu-dalam;
Kuingka ati nuan ngagai jalai ti betul.
20 Anang begulai enggau orang ke pengirup
Tauka begulai enggau orang ke bam makai dagin,
21 Laban orang ke mabuk enggau orang ke bam deka nyadi miskin.
Ketegal sida udu ka tinduk, sida deka begari ngena gari ti charik.
22 Pendingka jaku apai nuan, laban iya meri nuan pengidup;
Anang begedika* indai nuan semina ketegal iya udah tuai.
23 Ulihka meh pemendar lalu anang ngelepaska iya;*
Pia mega enggau penemu-dalam, disiplin, enggau runding ti ulih meretika utai.
24 Anak ti lurus ngasuh apai iya lantang ati,
Lalu anak ti bepenemu-dalam ngasuh apai iya gaga ati.
25 Apai indai nuan deka gaga ati,
Lalu indai nuan ke ngadaka nuan deka lantang ati.
26 Anak, pendingka utai ke disebut aku enggau manah;
Awakka nuan lantang ati nitihka jalai aku.
27 Indu pelacur baka lubang ti dalam,
Lalu indu ke enda bemoral* baka telaga ti sempit.
28 Iya ngipa baka perumpak;
Iya ngasuh mayuh lelaki nyau enda setia.
29 Sapa ke merinsa? Sapa ke kesal?
Sapa ke udu belaya? Sapa ke udu mutap?
Sapa ke bakal enggau nadai kebuah? Mata sapa ke nyau mirah?
30 Orang ke masau awak ngelaban arak;
Orang ke begelumu ngirup* wain ti ngasuh mabuk.
31 Anang merening wain ke mirah redam,
Ke beperenching dalam cawan lalu nyamai diirup,
32 Laban pengujung iya, wain nya deka mantuk baka ular,
Lalu nyemburka rachun baka ular ti bisa.
33 Mata nuan deka meda utai ti nyelai,
Lalu nuan deka mansutka jaku ti enda manah.
34 Nuan deka nyadi baka orang ke garing-garing ba tengah tasik,
Baka orang ke gali ba atas tiang kapal.
35 Lalu ku nuan bejaku: “Aku udah dipalu orang, tang aku nadai pedis.
Aku diinsah orang, tang aku enda ingat.
Kemaya aku deka dani?
Aku deka ngirup baru.”