Satu Timoti
5 Anang kasar jaku enggau sida ke lelaki ti udah tuai. Tang bejaku enggau sida baka ke bejaku enggau apai nuan, lalu bejaku meh enggau sida ke lelaki ti agi biak baka ke bejaku enggau menyadi nuan. 2 Bejaku meh enggau sida ke indu ke udah tuai baka ke bejaku enggau indai nuan, lalu bejaku meh enggau sida ke indu ke agi biak enggau ati ti tuchi baka ke bejaku enggau menyadi nuan.
3 Ayanka basa sereta intu meh bala indu ke balu ke nadai orang nulung. 4 Tang enti indu balu bisi anak tauka uchu, awakka bala anak tauka bala uchu ngintu sida sebilik dulu kena nunjukka sida enda bebagi ati nyembah Petara. Sida patut malas budi apai indai sereta aki ini sida laban nya ngelantangka ati Petara. 5 Indu balu ke nadai orang nulung sereta ke nadai utai ke dikemisi ngarapka Petara, lalu iya enda ngetu minta sereta bebendar besampi siang enggau malam. 6 Tang indu balu ke semina deka ngemuaska pengingin* diri, kebendar iya udah mati taja pan iya agi idup. 7 Anang ngetu meri iring* tu ngambika nadai orang ulih nyalahka sida. 8 Enti orang enda nyediaka utai ke diguna diri sebilik, kelebih agi sida ke diau serumah enggau iya, iya udah ngelengkaka pengarap diri lalu jai agi ari orang ke enda arap.
9 Nama siku indu balu patut ditepuka dalam lis orang ke begunaka bantu, enti iya lebih ari 60 taun lalu suba iya kala nyadi bini ke siku aja laki. 10 Iya mega patut ditemu orang ngereja pengawa ti manah baka ngemesaika anak enggau manah, rindu ngelaluka orang, masu kaki nembiak Petara ti kudus, nulung orang ke napi penusah, sereta bebendar ngereja tiap iti pengawa ti manah.
11 Tang, anang nepuka nama indu balu ke biak dalam lis nya laban lebuh pengingin seks sida nekul pengawa sida ke Kristus, sida deka belaki baru. 12 Enti pia, sida deka dikumbai besalah laban sida enda ngamatka semaya ke udah digaga sida.* 13 Nambahka nya, nyau kelama sida engka nyau nyadi buruk lalu bejegau ari rumah siti ngagai rumah siti. Sida ukai aja buruk tang sida rindu bejakuka orang,* masuk champur enggau pengawa orang, sereta bejaku pasal utai ke enda patut. 14 Nya alai, aku dekaka indu balu ke agi biak belaki baru, ngadaka anak, sereta ngintu ruang bilik ngambika orang ke ngelaban enda bejaika kitai. 15 Kebendar iya, sekeda indu balu udah limpang lalu nitihka Sitan. 16 Enti indu ke arap bisi kaban belayan ke balu, awakka iya nulung sida ngambika enda nating raban gempuru. Enggau nya, raban gempuru ulih nulung bala indu balu ke nadai orang nulung.
17 Bala tuai gempuru ke ngiring enggau manah patut diberi basa dua kali lipat, kelebih agi sida ke bebendar nusui sereta ngajar pasal jaku Petara, 18 laban Bup Kudus madahka, “Anang mampul mulut sapi ke lelaki lebuh sapi nya benung ngindik gandum,” sereta, “Siku pekereja endang patut nerima gaji iya.” 19 Anang mendingka jaku tuduh pasal siku tuai gempuru enti nadai dua tauka tiga iku saksi. 20 Orang ke majak ngereja dosa patut dirara ba mua orang mayuh kena nangkan orang bukai. 21 Ba mua Petara, Jesus Kristus, enggau bala melikat ke dipilih Petara, aku meri pesan tu ngagai kita ngambika kita enda bepilih mata tauka berat sepiak lebuh kita nitihka iring tu.
22 Anang kelalu beguai ngengkahka jari ba atas sapa-sapa,* lalu anang bisi bagi dalam dosa orang bukai. Tentuka nuan mengkang tuchi.
23 Anang semina ngirup ai amat aja, tang irup meh mimit wain laban nuan suah enda nyamai perut sereta selalu sakit.
24 Dosa sekeda orang ditemu orang mayuh lalu sida deka terus diukum, tang dosa orang bukai deka ditemu dudi hari. 25 Pia mega, pengawa ti manah deka ditemu orang mayuh lalu enti bisi pengawa ti manah ke enda ditemu orang, nya pan enda ulih terus dilalaika.