Jaku-Dalam

 2 Petara dimuliaka ketegal ngelalaika sesiti pekara,

Lalu raja dimuliaka ketegal meresa sesiti pekara.

 3 Baka langit ti tinggi sereta bumi ti dalam,

Baka nya meh ati raja enda ulih diperagam.

 4 Buai utai ti kamah ari pirak,

Ngambika bulih pirak ti amat-amat tulin.

 5 Buru orang ke jai ari depan raja,

Lalu kerusi diraja iya deka bediri tegap ba atas pengelurus.

 6 Anang ngeninggika diri ba depan raja,

Lalu anang ngulihka tempat duduk begulai enggau orang ke tinggi pangkat,

 7 Laban manah agi enti raja empu ngangauka nuan munyi tu: “Aram, duduk ditu,”

Ari ke dikemaluka iya ba depan orang ke tinggi pangkat.

 8 Anang kelalu jampat mai sesiti kes ngagai kot,

Laban enti orang bukai nemu nuan salah, nama agi utai ke ulih digaga nuan?

 9 Putarka pekara nya enggau orang nya,

Tang anang madahka resia orang bukai,

10 Ngambika orang ke ninga enda ngemaluka nuan,

Sereta ngambika nuan enda nusui utai ti jai* ke enda ulih ditarit pulai baru.

11 Jaku ke disebut ba maya ti ngena

Baka buah ipul emas ba pinggai pirak.

12 Jaku lalau ke diberi orang ke bepenemu-dalam ngagai orang ke deka ninga

Baka antin emas enggau perengka ias ari emas ti tulin.

13 Penetap ati orang ke mai pesan

Baka seleju ti chelap maya musin ngetau,

Laban iya ngelantangka ati tuan iya.

14 Orang ke bejaku begah madahka diri deka meri hadiah tang lalu enda meri hadiah nya

Baka ribut enggau mua hari ke nadai ngasuh hari ujan.

15 Sabar ulih ngelembutka ati orang ke bekuasa,

Lalu jaku ti nelap ulih ngelaban semua sakal ti balat.*

16 Enti nuan bulih madu, empa meh ni ke ulih nuan aja,

Enggaika nuan mutah, enti nuan makai iya kelalu mayuh.

17 Anang kelalu suah nemuai ngagai rumah orang,

Enggaika iya leju meda nuan lalu begedika nuan.

18 Baka pedang, baka pemalu, enggau baka anak panah ti tajam,

Baka nya meh orang ke meri saksi ti pelesu pasal orang bukai.

19 Bepanggai ba orang ke enda ulih dikearapka* lebuh maya penusah

Baka kaki ke pinchat lebuh bejalai tauka baka ngunyah utai ngena ngeli ti simpak.

20 Belaguka orang ti tusah ati

Baka orang ke muka baju lebuh hari chelap,

Baka nuang chuka ngagai soda.*

21 Enti munsuh* kita lapar, beri iya roti ke diempa;

Enti iya aus, beri iya ai irup.

22 Enggau nya, kita ulih ngelembutka ati iya,*

Lalu Jehovah deka merekatka kita.

23 Angin utara mai ujan,

Lalu dilah ke rindu begosip ngasuh orang bukai ringat.

24 Manah agi diau ba perabung rumah,

Ari ke diau serumah enggau bini ke udu kutap-kutap.*

25 Berita manah ari menua ti jauh

Baka ai chelap ke orang ti lelak.

26 Orang ke lurus ke ngalahka diri lalu nurutka orang ke jai

Baka mata ai ke bechampur enggau tanah luchak sereta baka telaga ti kamah.

27 Enda manah makai kelalu mayuh madu,

Baka nya mega, enda manah enti kitai ngiga mulia ke diri empu.

28 Orang ke enda ulih nagang diri ringat

Baka kuta ke udah runtuh dinding.