Jaku-Dalam

26 Baka seleju ke enda ngam ba musin panas enggau ujan ba musin ngetau,

Basa enda ngam ke orang ti beli.

 2 Baka burung ke bisi kebuah ngelepaska diri, lalu baka burung lelayang ke bisi kebuah deka terebai,

Jaku sumpah mega bisi kebuah iya disebut.*

 3 Penyipat ke kuda, kekang ke keledai,

Lalu rutan ke orang ti beli.

 4 Anang nyaut orang ke beli nitihka chara iya ti beli,

Ngambika nuan enda sama beli baka iya.

 5 Lebuh nuan nyaut orang ke beli, bantaika pemeli utai ke disebut iya,

Ngambika iya enda ngumbai diri bepenemu-dalam.

 6 Orang ke ngandalka orang ke beli ngereja sesiti pengawa,

Baka orang ke ngelumpuhka kaki diri lalu ngemediska diri empu.

 7 Baka orang ti tachat kaki ke enda ulih bejalai,

Baka nya meh jaku ti dalam ke pansut ari mulut orang ke beli.

 8 Orang ke ngemuliaka orang ke beli,

Baka ke nanchang batu ba pangwang.*

 9 Baka utai tumbuh ke beduri ba jari orang ke mabuk,

Baka nya meh jaku ti dalam ke pansut ari mulut orang ke beli.

10 Orang ke ngupah orang ke beli tauka ngupah sebarang orang,

Baka orang ke nimbakka anak panah sengapa aja.*

11 Baka ukui ke pulai baru lalu makai mutah iya empu,

Baka nya meh orang ke beli ngulang pemeli iya.

13 Orang ke ngelusu madah: “Bisi anak singa ba jalai,

Bisi singa ba tengah jalai!”

14 Baka pintu ke telenga tikup,

Baka nya meh orang ke ngelusu bekalih kiba kanan ba peninduk iya.

15 Orang ke buruk gawa nepuka jari iya ke dalam mangkuk,

Tang iya kelalu lelak nyentukka enda tesuapka pemakai.

16 Orang ke ngelusu ngumbai diri bepenemu-dalam agi

Ari tujuh iku orang ke meri saut ti betul.

17 Orang* ke masuk champur dalam laya orang bukai

Baka orang ke nyangkam pending ukui.

18 Baka orang gila ke nimbakka senyata ti berapi sereta anak panah ke ulih munuh,

19 Baka nya meh orang ke nipu orang bukai lalu madah: “Aku betundi aja!”

20 Api padam enti nadai kayu,

Lalu enti nadai orang betenahka pangan diri, orang badu agi belaya.

21 Baka arang enggau kayu ke ngasuh api idup,

Baka nya meh orang ke rindu belaya ngasuh laya majak nyadi.

22 Jaku fitnah baka pemakai ti nyamai,*

Lalu ditelan terus ke dalam perut.

23 Baka pirak ke ngelapis rekah ba periuk tanah,

Baka nya meh jaku pengerindu ari ati ti jai.

24 Orang ngelalaika ati diri ti begedi ngena jaku,

Tang iya ke amat, ati iya bisi pelan deka nipu orang bukai.

25 Taja pan iya nyebut utai ti ngelantangka ati, tang anang pechayaka iya,

Laban ati iya penuh enggau utai ti jai.*

26 Taja pan iya nipu kena ngelalaika ati iya ti begedi,

Tang penyai iya deka ditemu ba raban gempuru.

27 Orang ke ngali lubang deka labuh ke dalam lubang nya,

Lalu orang ke ngulingka batu, deka diindik batu nya.

28 Orang ti bula begedika orang ke dikemediska iya,

Lalu mulut manis mai penusah.