Jaku-Dalam
27 Anang bejaku begah pasal pagila,
Laban nuan enda nemu utai ke deka nyadi pagila.
2 Awakka orang bukai muji nuan, lalu ukai mulut nuan empu;
Awakka orang asing muji nuan, lalu ukai mulut nuan empu.
3 Batu enggau pasir endang sigi berat,
Tang penusah ke nyadi ketegal orang ke beli berat agi ari batu enggau pasir.
4 Pengeringat nya kejam lalu ati ti pedis nya baka ai bah,
Tang sapa ke ulih tan enggau orang ke chemburu?
5 Ngerara orang beterus-terang manah agi ari bisi pengerindu tang enda ngayanka pengerindu nya.
6 Jaku rara ari kaban ti setia engka ngasuh pedis,
Tang nya manah agi ari pemanah ati ke diayanka munsuh ke enda ikhlas.
7 Orang ke kenyang enggai nerima ai manyi,
Tang orang ke lapar, indah pemakai ti pait deh asai iya manis.
8 Orang ke rari ari rumah
Sempama burung ke terebai ninggalka sarang iya.
9 Minyak enggau menyan ngasuh ati lantang,
Pia mega enggau kaban ke meri jaku ajar ari ati.
10 Anang enda ibuhka kaban nuan tauka kaban apai nuan,
Lalu anang tama ngagai rumah menyadi kandung nuan lebuh nuan bisi penusah;
Kaban ti rapat manah agi ari menyadi kandung diri ti jauh.
11 Anak, bepenemu-dalam meh lalu lantangka meh ati aku,
Ngambika aku ulih nyaut iya ke ngeleseka aku.
12 Orang ke pintar belalai lebuh meda bahaya,
Tang orang ke nadai pengalaman deka terus bejalai lalu merinsa ketegal nya.
13 Enti sesiku orang nyadi penjamin utang orang ke enda dikelala, ambi meh gari iya;
Enti iya ngereja utai ti sama ke indu bansa bukai, rampas meh reta iya nyadika jamin.
14 Jaku berekat ke disebut enggau nyawa ti inggar maya tumu pagi,
Deka dikumbai jaku sumpah.
15 Bini ke udu kutap-kutap* baka atap ke seruran buchur maya hari ujan.
16 Barang sapa ke ulih nagang iya ulih nagang angin
Lalu ulih ngenggam minyak ngena jari kanan iya.
17 Baka besi ke ngansah besi,
Baka nya meh mensia belajar ari pangan diri.
18 Orang ke ngintu pun kayu ara deka makai buah iya,
Lalu orang ke nyaga tuan iya deka dipebasa.
19 Baka orang ke ulih meda mua diri ba ai,
Baka nya meh orang ulih meda diri empu ba ati orang bukai.
21 Baka pirak ke ditulinka ngena periuk tanah lalu emas ditulinka ngena serumbung api,
Orang diuji ngena jaku puji ke diterima iya.
22 Taja pan nuan nutuk orang ke beli ngena alu
Baka nganchurka bijirin dalam lesung,
Pemeli iya agi ba iya.
23 Kelala meh raban jelu nuan enggau manah.
Ibun* meh bedus nuan enggau manah.
24 Reta enda ulih tan belama iya,
Makota pan enda ulih diwariska ngagai bala peturun belama iya.
25 Rumput ti gadung layu lalu rumput ti baru tumbuh,
Lalu utai tumbuh ba gunung digumpulka.
26 Bulu bedus lelaki ti biak dikena ngaga baju,
Lalu rega kambin lelaki dikena meli ladang.
27 Nuan mega deka bisi chukup ai tusu kambin ke nuan empu,
Ke ruang bilik nuan, sereta ke bala ulun indu nuan.