Jaku-Dalam
2 Orang ke mansutka jaku ti manah deka bulih asil ti manah,
Tang orang ke pintar nipu rinduka utai ti ganas.
3 Orang ke nyaga mulut diri ngelindung nyawa diri empu,
Tang orang ke enda nyaga mulut* diri deka bulih penusah.
4 Orang ke buruk gawa mayuh utai ke dikingin, tang iya nadai utai ke diulih,
Tang orang ke bagas deka puas ati.
5 Orang ke lurus begedika pemula,
Tang pengawa orang ke jai ngasuh malu sereta dikemaruhka.
6 Pengelurus ngelindung orang ke nadai bepenyalah,
Tang penyai mai penusah ngagai orang ke bedosa.
7 Bisi orang ngaga diri kaya, tang kebendar iya nadai utai;
Bisi mega ke ngaga diri miskin, tang kebendar iya kaya.
8 Orang ke kaya nebus nyawa diri ngena pengaya,
Tang orang ke miskin nadai ninga jaku emba.*
9 Orang ke lurus baka lampu ti manchar terang,*
Tang orang ke jai baka lampu ti deka padam.
10 Orang ke ngenemuka diri semina ngasuh laya nyadi,
Tang penemu-dalam enggi orang ke minta jaku lalau.*
11 Pengaya ke diulih enggau jampat deka jampat abis,
Tang pengaya ke digumpul mimit-mimit deka betambah.
12 Harapan ke laun nyadi* ngasuh ati pedis,
Tang pengingin ti nyadi nyata baka pun kayu ke meri pengidup.
13 Orang ke begedika jaku ajar deka bulih penusah,
Tang orang ke bebasaka pesan deka bulih berekat.
14 Jaku ajar orang ke bepenemu-dalam meri pengidup
Sereta ulih nyelamatka orang ari panjuk pemati.
15 Orang ke nemu berunding enggau dalam dikerinduka orang bukai,
Tang jalai orang ke pintar nipu enda rata.
16 Orang ke nemu berunding ngereja utai ngena penemu,
Tang orang ke beli mantaika pemeli diri.
17 Seruan* ti jai mai penusah,
Tang seruan ti setia mai penguntung.
18 Orang ke enda pedulika disiplin deka nyadi miskin sereta dikemaruhka,
Tang orang ke nerima jaku rara deka dimuliaka.
19 Pengingin ke nyadi nyata ngasuh ati gaga,
Tang orang ke beli enggai ngelengkaka penyai.
20 Orang ke begulai* enggau orang ke bepenemu-dalam deka nyadi orang ke bepenemu-dalam,
Tang orang ke bekaban enggau orang ke beli deka bulih penusah.
21 Penusah begagaika orang ke bedosa,
Tang orang ke lurus deka bulih mayuh berekat.
22 Orang ti manah ninggalka pesaka ke bala uchu iya,
Tang reta orang ke bedosa deka disimpan ke orang ke lurus.
23 Ladang orang miskin ke diradu ngasilka mayuh pemakai,
Tang ladang nya engka dirampas* ketegal utai ti enda lurus.
24 Orang ke enda nyipat* anak begedika anak diri,
Tang orang ke sayauka anak seruran* disiplin anak diri.
25 Orang ke lurus makai sampai kenyang sereta puas,
Tang orang ke jai deka lapar.