Isaiah
29 “Tulah meh Ariel,* Ariel, iya nya kuta endur David nirika kem!
Ari taun siti ngagai taun siti,
Terus meh ngintu pengerami ke diintu kita ninting taun.
2 Aku deka ngenataika penusah ngagai Ariel,
Sabak tusah ati sereta sebana deka bisi ba dia.
Ba Aku, iya deka nyadi baka endur ngidupka api ba alta.
3 O Ariel, Aku deka nirika kem ngelingi nuan kena ngelaban nuan,
Aku deka ngujakka kayu ti tajam ngelingi nuan
Kena ngepung lalu nyerang nuan.
4 Nuan deka dikemaruhka;
Nuan deka bejaku ari tanah.
Ketegal debu, utai ke disebut nuan enda terang.
Nyawa nuan deka pansut ari tanah
Baka nyawa siku manang.
Jaku nuan deka nyadi baka jaku telai ke pansut ari debu.
5 Bala munsuh nuan deka nyadi baka serbuk ti alus.
Bala pemerintah ti kejam deka dikebuka baka ampa.
Tu deka ngenyit nyadi sereta enda dijangka.
6 Jehovah, ketuai soldadu serega, deka nyelamatka nuan
Ngena guntur, tanah berenyang, enggau bunyi ti inggar,
Sereta ngena kabut, ribut ti balat, enggau api ti mau.
7 Semua bansa bukai beperang ngelaban Ariel;
Semua sida beperang nyerang iya;
Sida ngaga mesin* kena ngepung iya,
Lalu sida ke ngenataika penusah ngagai iya
Deka nyadi baka mimpi maya malam hari.
8 Au, baka orang ke lapar bemimpi iya benung makai,
Tang lebuh iya dani, iya agi lapar.
Baka orang ke aus bemimpi iya benung ngirup,
Tang lebuh iya dani, iya agi lelak sereta aus.
Nya meh penyadi ngagai semua bansa bukai
Ke beperang ngelaban Gunung Sion.
9 O rayat Ariel, kita patut berasai tekenyit sereta alit ati;
Asuh mata kita buta ngambika kita enda ulih meda.
Sida mabuk ukai ketegal wain;
Sida bejalai guir-guir ukai ketegal ai bisa.
10 Jehovah udah ngasuh kita tinduk jenak;
Iya udah nutup mata kita, iya nya bala nabi kita,
Lalu Iya udah mungkur pala kita, iya nya bala kita ke ngumbai diri ulih meda utai ke dipandangka Petara dalam runding sida.
11 Ba kita, semua utai ke dipandangka nya deka nyadi baka jaku ke ba bup ke udah dichop. Lebuh sida meri bup nya ngagai orang ke nemu macha, lalu madah ngagai iya: “Bacha meh bup tu enggau inggar,” orang ke nemu macha nya deka madah: “Enda ulih aku, laban bup tu udah dichop.” 12 Lebuh sida meri bup nya ngagai orang ke enda nemu macha, lalu madahka iya: “Bacha bup tu,” iya deka nyaut: “Nadai aku tu nemu macha.”
13 Ku Jehovah madahka: “Bansa tu nyembah Aku ngena jaku sida,
Lalu sida bebasaka Aku ngena mulut aja,
Tang ati sida jauh ari Aku;
Sida nangika Aku ketegal adat mensia ke diajar ngagai sida.
14 Nya alai, Aku meh ke deka ngereja utai ti ngalitka ati ngagai bansa tu baru;
Utai ti luar biasa deka nyadi betangkan-tangkan;
Penemu-dalam orang ke bepenemu-dalam deka nadai agi,
Lalu penemu orang ke pintar deka lenyau.”
15 Tulah meh orang ke bebendar ngelalaika pelan sida ari Jehovah.
Sida ngereja pengawa sida ba endur ti petang,
Lalu madahka: “Sapa ke ulih meda kitai?
Sapa ke nemu pasal kitai?”
16 Nemu amat kita nunsangka utai!
Patut kita ngumbai tukang periuk tanah sama enggau tanah liat?
Patut utai ke digaga madah munyi tu pasal orang ke ngaga iya:
“Ukai iya ke ngaga aku”?
Patut utai ke ditempa* madah munyi tu pasal orang ke nempa* iya:
“Iya enda nemu utai”?
17 Enda lama da agi, Lebanon deka nyadi kebun buah,
Lalu kebun buah nya deka nyadi baka utan.
18 Ba hari nya, orang ke bengal deka ninga lebuh orang macha bup,
Mata orang ke buta deka dilepaska ari pemetang lalu ulih meda.
19 Orang ke baruh ati* deka balat gaga ati ketegal Jehovah,
Lalu orang ke miskin deka lantang ati ketegal Petara Israel ti kudus.
20 Pemerintah ti kejam deka nadai agi,
Orang ke bejaku begah deka dipunaska,
Lalu orang ke selalu ngiga peluang ngereja penyai deka dianchurka.
21 Sida nya meh ke nyebut utai ti bula ngambika orang dikumbai salah,
Sida nya meh ke manjuk orang ke ngetanka kes pechara* ba pintu kuta,
Sereta ke ngena jaku tuduh ke nadai bukti ngambika orang ke lurus enda diakim enggau adil.
22 Nya alai, Jehovah, ke nebus Abraham, madah ngagai peturun Jakop:
“Jakop enda agi berasai malu,
Lalu mua iya enda agi puchat.*
23 Lebuh iya meda anak iya bisi enggau iya,
Iya nya asil ari pengawa jari Aku Empu,
Sida deka nguduska nama Aku.
Au, sida deka nguduska Petara ti kudus ke disembah Jakop,
Sida deka ngayanka basa sereta ati ti nangi ngagai Petara orang Israel.
24 Sida ke limpang deka bulih penemu,
Lalu sida ke mutap deka nerima jaku ajar.”