Jaku-Dalam
11 Jehovah amat begedika orang ke nipu* lebuh ngena dachin,
Tang Iya lantang ati ngagai orang ke ngena dachin ti betul.
2 Lebuh orang ngenemuka diri, nya ngujungka iya enda dipebasa,
Tang penemu-dalam bisi ba orang ke baruh ati.
3 Orang ti lurus diiring ati iya ti setia ngagai Petara,
Tang orang ke enda setia deka dipunaska ketegal iya pintar nipu.
4 Pengaya enda beguna ba hari Petara mantaika pengeringat Iya,
Tang pengelurus deka nyelamatka orang ari pemati.
5 Orang ke nadai bepenyalah deka ngasuh jalai iya lurus ketegal pengelurus diri,
Tang orang ke jai deka labuh ketegal penyai diri empu.
6 Ulah ti manah ke dikereja orang ke lurus deka nyelamatka iya,
Tang orang ke enda setia deka dipanjuk pengingin diri empu.
7 Lebuh orang ke jai mati, harapan iya lenyau,
Lalu harapan ke dipanggaika iya ba pengering iya empu mega deka lenyau.
8 Orang ke lurus diselamatka ari penusah,
Lalu orang ke jai deka merinsa ketegal penusah.
9 Mulut orang ke ngelaban Petara* ngasuh orang bukai anchur,
Tang penemu nyelamatka orang ke lurus.
10 Pemanah orang ti lurus ngasuh serata kuta rami gaga ati,
Lalu lebuh orang ke jai dipunaska, orang manjung gaga ati.
11 Berekat orang ke lurus ngasuh kuta dikemegahka,
Tang mulut orang ke jai ngasuh kuta nya runtuh.
12 Orang ke enda entu nemu berunding ngemaruhka orang bukai,
Tang orang ke nemu berunding mengkang diau diri.
13 Orang ke naburka fitnah kulu-kili mantaika resia orang bukai,
Tang orang ke ulih dikearapka, nyimpan resia.
15 Orang ke nyadi penjamin utang orang ke enda dikelala deka bulih penusah,
Tang orang ke enggai besemaya* enggau orang nya deka selamat.
16 Indu ke manah ati* deka bulih basa,
Tang lelaki ke kejam semina deka ngulihka pengaya.
17 Utai ke dikereja orang ke manah* mai penguntung ngagai diri empu,
Tang orang ke kejam ngenusahka* diri empu.
18 Orang ke jai deka bulih upah ke enda tan lama,
Tang orang ke ngereja utai ti lurus deka bulih upah ti bendar.
19 Orang ke bepegai rat ba utai ti lurus nuju ngagai pengidup,
Tang orang ke belanda begagaika penyai nuju ngagai pemati.
20 Jehovah amat begedika orang ke ngembuan ati ti jai,
Tang orang ti nadai bepenyalah ngelantangka ati Iya.
21 Andal meh orang ke jai tentu deka diukum,
Tang bala anak orang ke lurus deka selamat.
22 Baka antin emas ba idung babi,
Baka nya meh pemajik indu ke enda nemu berunding.
23 Pengingin orang ti lurus mai asil ti manah,
Tang utai ti dikingin orang ke jai mai pengeringat.
24 Orang ke gerah jari deka bulih mayuh agi utai,
Orang ke enggai meri utai ke patut diberi deka nyadi miskin.
25 Orang ke gerah jari deka nyadi kaya,
Lalu orang ke meri orang bukai ai irup deka diberi ai irup.
26 Orang ke enggai nyual bijirin ngagai orang bukai deka disumpah,
Tang orang ke nyual iya deka diberekat.
27 Orang ke bagas ngereja utai ti manah deka dibalas enggau pemanah,
Tang orang ke rindu ngereja penyai tentu deka dituntung utai ti jai.
28 Orang ke bepanggai ba pengaya deka labuh,
Tang orang ti lurus deka galak baka daun ti subur.
29 Orang ke ngenusahka* ruang bilik diri nadai bulih pesaka,
Lalu orang ke beli deka nyadi ulun orang ke bepenemu-dalam.
30 Utai ke dikereja orang ke lurus baka pun kayu pengidup,
Lalu orang ke meransang orang bukai ngereja utai ti betul dikumbai bepenemu-dalam.
31 Enti orang ke lurus ba dunya nerima upah,
Orang ke jai enggau orang ke bedosa tentu deka nerima balasan sida!