Jaku-Dalam
20 Wain ngasuh orang mapap bejaku, lalu ai bisa ngasuh orang enda tetagangka diri;
Orang ke limpang ketegal ai bisa enda bepenemu-dalam.
2 Asai takutka raja baka takutka singa ti negung;
Barang sapa ke ngasuh raja ringat tau ngujungka diri dibunuh.
3 Orang ke nyeliahka laya deka dipebasa,
Tang orang ke beli enggau orang belaya.
4 Orang ke buruk gawa enda ngeradu tanah maya musin chelap.
Nya alai, iya terpaksa minta utai ari orang maya musin ngetau, laban iya nadai utai ke dikemisi.*
5 Runding* sesiku orang baka ai ba telaga ti dalam,
Tang orang ke ngembuan runding ti dalam ulih ngauk ai nya.
6 Mayuh orang ngumbai diri ngembuan pengerindu ti setia,
Tang orang ke amat-amat setia tusah ditemu.
7 Orang ke lurus nunjukka diri setia.
Lantang ati meh bala anak iya.
8 Lebuh raja duduk ngakim ba kerusi diraja iya,
Mata iya meresa semua utai enggau silik ngambika ulih muai semua penyai.
9 Ulih orang madah: “Aku udah nuchi ati aku;
Aku enda agi bedosa”?
10 Jehovah amat begedika
Orang ke ngena takar enggau dachin ti enda betul.
11 Indah siku anak deh ulih dikelala ari utai ke dikereja iya,
Sekalika pendiau iya betul sereta lurus.
12 Jehovah meh ke ngaga
Mata kena meda enggau pending kena ninga.
13 Anang selalu tinduk, ngambika nuan enda nyadi miskin.
Enchelakka mata nuan, lalu nuan deka bisi mayuh utai diempa.
14 Orang ke meli utai madah: “Jai utai tu!”
Tang pengudah iya meli utai nya, iya mupuk lalu temegahka diri nemu betawar.
15 Bisi mayuh emas enggau bisi mayuh batu ti berega,*
Tang mulut ke nyebut penemu berega agi ari utai nya.
16 Enti sesiku orang nyadi penjamin utang orang ke enda dikelala, ambi meh gari iya;
Enti iya ngereja utai ti sama ke indu bansa bukai, rampas meh reta iya nyadika jamin.
17 Roti ke diulih ngena chara nipu asai iya nyamai,
Tang udah nya, asai iya baka keresik pasir.
18 Pelan deka mujur enti berandau dulu,
Lalu giga iring ti manah* sebedau mupuk beperang.
19 Orang ke naburka fitnah kulu-kili mantaika resia orang bukai;
Anang begulai enggau orang ke rindu begosip.
20 Barang sapa ke nyumpah apai indai diri,
Lampu kelita iya deka padam lebuh dalam pemetang.
21 Taja pan ba pun iya orang ke amu bulih pesaka,
Tang pengujung iya, pesaka nya nadai mai berekat.
22 Anang nyebut: “Aku deka malas penyai!”
Panggaika pengarap ba Jehovah, lalu Iya deka nyelamatka nuan.
23 Jehovah amat begedika orang ke ngena dachin ti enda betul,
Lalu enda manah ngena penimbang ti enda betul.
24 Jehovah nentuka singkang pengidup mensia;
Baka ni ku mensia ulih nemu jalai ke patut ditengah iya?
25 Enti orang beguai-guai nyebut: “Kudus!” sebedau berunding panjai pasal sumpah ke digaga iya,
Nya deka manjuk iya empu.
26 Baka seku ke diseraraka ari bijirin,
Baka nya meh orang jai dibuai raja ti bepenemu-dalam.
27 Seput sesiku orang baka lampu kelita Jehovah
Ke mancharka utai ke bisi dalam ati orang nya.
28 Pengerindu ti setia enggau penetap ati ngelindung raja;
Pengerindu ti setia deka negapka kerusi diraja iya.
29 Pengering orang ke biak nya mulia sida,
Lalu uban ba pala orang ke tuai nya basa sida.