Satu Timoti
6 Bala ulun* patut ngumbai tuan sida layak diberi basa enggau pengabis ati, ngambika nama Petara sereta ajar Iya enda dipejaika orang. 2 Nambahka nya, enti tuan sida menyadi ke sepengarap, sida patut bebasaka iya. Indah, sida patut gawa enggau bagas agi, laban orang ke nerima penguntung ari pengawa sida ti manah nya orang ke arap sereta dikerinduka.
Anang ngetu ngajar sereta madahka jaku lalau pasal utai tu. 3 Enti bisi orang ngajar pasal ajar ti bukai sereta ke enda sejalai enggau ajar ti manah* ke datai ari Tuan kitai, Jesus Kristus, tauka enda sejalai enggau ajar ti ngasuh kitai enda bebagi ati nyembah Petara, 4 iya orang ti sumbung sereta enda meretika nama-nama utai. Iya rindu* bekelikuh sereta belaban penemu pasal leka jaku. Semua utai tu ngasuh orang kepapas, belaya, bejaika orang bukai,* nyangka utai ti enda manah pasal orang bukai, 5 sereta enda ngetu bekelakar pasal pekara ti mit ke berengkah ketegal orang ti rusak runding sereta ke enda agi meretika pemendar. Sida ngumbai sida deka bulih untung enti sida enda bebagi ati nyembah Petara. 6 Endang amat, orang ke nyembah Petara enggau ati ti enda bebagi sereta enggau ati ti puas deka bulih untung ti besai. 7 Nya ketegal kitai nadai mai nama-nama utai tama ngagai dunya tu, lalu kitai mega enda ulih mai nama-nama utai pansut. 8 Nya alai, enti kitai bisi utai diempa* enggau gari,* kitai deka puas ati.
9 Tang, orang ke keran deka nyadi kaya deka alah laban penguji, kena sintak panjuk, sereta alah laban mayuh pengingin ke beli ti ngemediska. Pengingin ke baka nya deka ngerusak sereta ngemunaska sida. 10 Pengerindu ke duit deka mai semua macham penyai. Sekeda orang udah limpang ari pengarap lalu ngachuk diri ngena mayuh pemedis ketegal sida rinduka duit.
11 Tang nuan ke ulun Petara, rari ari semua utai nya. Bebendar meh ngiga pengelurus. Sembah meh Petara enggau ati ti enda bebagi. Kemansangka pengarap, pengerindu, pengeliat ati, sereta penelap. 12 Bebendar meh belaban kena ngetanka pengarap. Bepegai rat ba pengidup ti meruan belama iya. Ketegal nya meh nuan udah dikangau lalu nuan udah meri saksi enggau manah ba mua orang mayuh.
13 Ba mua Petara ke nyaga pengidup semua utai, sereta ba mua Jesus Kristus ke meri saksi ti manah ngagai Pontius Pilate ba mua orang mayuh, aku ngasuh nuan 14 nitihka pesan tu ngambika nuan mengkang tuchi lalu nadai orang nyalahka nuan nyentuk ngagai maya Tuan Jesus Kristus mandangka diri. 15 Ba maya ti ditetapka, Penguasa ti gaga ati nya deka mandangka diri. Iya meh Raja atas sida ke merintah nyadi raja sereta Tuan atas sida ke merintah nyadi tuan, 16 lalu semina iya aja meh ke enda ulih mati. Iya diau ba dalam penampak lalu nadai sapa ke ulih datai semak ngagai penampak nya. Nadai orang kala meda iya lalu nadai orang ulih meda iya. Awakka iya dipebasa lalu kuasa iya meruan belama iya. Amin.
17 Beri meh jaku ajar* ngagai sida ke kaya ba dunya* tu ngambika enda sumbung sereta enda ngarapka pengaya ti nemu lenyau. Tang, sida patut ngarapka Petara ke meri kitai semua utai ti dikerinduka kitai enggau chukup mayuh. 18 Asuh sida ngereja utai ti manah. Au, sida mesti ngereja mayuh utai ti manah, gerah jari sereta rindu bekunsika utai ke dikembuan sida. 19 Enggau nya, sida deka ngumpul pengaya ari Petara ke deka nyamin* pengidup sida dudi hari ngambika sida ulih bepegai rat ba pengidup ti bendar.
20 Timoti, jaga utai ke udah diberi ngagai nuan. Anang mendingka jaku ti nadai reti ke ngelaban utai ti kudus, sereta utai ke dikumbai orang “penemu” ke belaban enggau utai ti bendar. 21 Ketegal mandangka penemu ke baka nya, sekeda orang limpang ari pengarap.
Ngarapka nuan nerima pemanah ati ti besai ari Petara.